ພະແນກຕຳຫຼວດຈະລາຈອນ ນະຄອນຫຼວງວຽງຈັນ ແຈ້ງໃຫ້ຊາບເມື່ອບໍ່ດົນມານີ້ ວ່າ: ເດືອນກໍລະກົດ 2020 ນະຄອນຫຼວງວຽງຈັນ ມີອຸບັດເຫດເກີດຂຶ້ນ 99 ກໍລະນີ ຜູ້ເສຍຊີວິດ 10 ຄົນ ທຽບໃສ່ເດືອນມິຖຸນາ ການເກີດອຸບັດເຫດເພີ່ມຂຶ້ນ 23 ລາຍ ແຕ່ຄົນເສຍຊີວິດຫຼຸດລົງ 3 ຄົນ ມູນຄ່າຄວາມເສຍຫາຍປະມານ 1,9 ຕື້ກີບ ອັນດັບໜຶ່ງຂອງການເກີດອຸບັດເຫດ ຍັງແມ່ນເມືອງໄຊທານີ.
ອຸບັດເຫດທັງໝົດນັ້ນ ໄດ້ເຮັດໃຫ້ມີພາຫະນະເປ່ເພເລັກໜ້ອຍ 58 ຄັນ ສົມຄວນ 137 ຄັນ ໃຊ້ບໍ່ໄດ້ 3 ຄັນ ຄົນໄດ້ຮັບບາດເຈັບເລັກໜ້ອຍ 11 ຄົນ ສົມຄວນ 31 ຄົນ ສາຫັດ 8 ຄົນ ເສຍຊີວິດ 10 ຄົນ ສ່ວນຄົນຂັບໄດ້ຮັບ ບາດເຈັບເລັກໜ້ອຍ 11 ຄົນ ສົມຄວນ 31 ຄົນ ສາຫັດ 8 ຄົນ ເສຍຊີວິດ 10 ຄົນ ອຸບັດເຫດສ່ວນໃຫຍ່ແມ່ນເກີດຂຶ້ນກັບຜູ້ໃຊ້ ແຮງງານ ແລະ ນັກສຶກສາ ສຳລັບເມືອງຈັນທະບູລີ ມີອຸບັດເຫດເກີດຂຶ້ນ 5 ລາຍ ສີໂຄດຕະບອງ 12 ລາຍ ສີສັດຕະນາກ 11 ລາຍ ໄຊເສດຖາ 15 ລາຍ ຫາດຊາຍຟອງ 15 ລາຍ ໄຊທານີ 33 ລາຍ ນາຊາຍທອງ 2 ລາຍ ປາກງື່ມ 4 ລາຍ ເມືອງສັງທອງ 1 ລາຍ.
ສາເຫດຕົ້ນຕໍຂອງການເກີດອຸບັດເຫດທີ່ເຮັດໃຫ້ມີຄົນໄດ້ຮັບບາດເຈັບ ແລະ ເສຍຊີວິດເປັນຈຳນວນຫຼາຍນັ້ນ ຍ້ອນຜູ້ຂັບຂີ່ບໍ່ຮູ້ກົດລະບຽບຈະລາຈອນດີເທົ່າທີ່ຄວນ ຂາດທັກສະຂັບຂີ່ປອດໄພ ລວມເຖິງການມີວິໄນ ນ້ຳໃຈການໃຊ້ລົດໃຊ້ຖະໜົນຮ່ວມກັບຄົນອື່ນ ອຸບັດເຫດທີ່ເກີດຂຶ້ນຈາກລົດໃຫຍ່ ສ່ວນຫຼາຍແມ່ນໃຊ້ຄວາມໄວເກີນກຳນົດ ດື່ມສິ່ງມືນເມົາແລ້ວຂັບ ລ້ຽວຊ້າຍ-ຂວາບໍ່ຮັບປະກັນຄວາມປອດໄພ ແລະ ອື່ນໆ.