ການພົບປະສອງຝ່າຍ ລະຫວ່າງ ປະທານຄະນະມິດຕະພາບລັດຖະສະພາ ລາວ-ກຳປູເຈຍ ແລະປະທານຄະນະມິດຕະພາບລັດຖະສະພາ ກຳປູເຈຍ-ລາວ ຈັດຂຶ້ນວັນທີ 27 ກຸມພາ 2020 ຢູ່ສະພາແຫ່ງຊາດລາວ ຝ່າວລາວນຳໂດຍທ່ານ ສາຍທອງ ແກ້ວດວງດີ ປະທານຄະນະມິດຕະພາບລັດຖະສະພາລາວ-ກຳປູເຈຍ ປະທານກຳມາທິການກົດໝາຍສະພາແຫ່ງຊາດລາວ ແລະ ຝ່າຍກຳປູເຈຍນຳໂດຍທ່ານ ເຈີຍວັນເດດ ປະທານຄະນະມິດຕະພາບລັດຖະສະພາກຳປູເຈຍ-ລາວ ປະທານກຳມາທິການທີ 3 (ປະທານກຳມາທິການແຜນການ ການລົງທຶນກະສິກຳພັດທະນາຊົນນະບົດສິ່ງແວດລ້ອມ ແລະ ແຫຼ່ງນ້ຳ) ສະພາແຫ່ງຊາດກຳປູເຈຍ.
ການພົບປະກັນຄັ້ງນີ້ ສອງຝ່າຍໄດ້ຕີລາຄາສູງຕໍ່ໝາກຜົນການຈັດຕັ້ງປະຕິບັດ ບົດບັນທຶກຄວາມເຂົ້າໃຈວ່າດ້ວຍການຮ່ວມມືສອງຝ່າຍທີ່ໄດ້ເຊັນກັນ ໃນວັນທີ 14 ມັງກອນ 2019 ເປັນຕົ້ນ ສອງສະພາໄດ້ແລກ ປ່ຽນຄະນະຜູ້ແທນລະດັບປະທານສະພາແຫ່ງຊາດ ໃນນັ້ນ ມີຄະນະຜູ້ແທນຂັ້ນສູງຂອງສະພາແຫ່ງຊາດລາວ ນຳໂດຍທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ເຂົ້າຮ່ວມກອງປະຊຸມ APPF ແລະ ຢ້ຽມຢາມສັນຖະວະໄມຕີທີ່ລາຊະອານາຈັກກຳປູເຈຍໃນເດືອນມັງກອນ 2019 ຄະນະຜູ້ແທນຂັ້ນສູງສະພາແຫ່ງຊາດກຳປູເຈຍ ນຳໂດຍ ສົມເດັດ ເຮັງຊຳຣິນ ປະທານສະພາແຫ່ງຊາດໄດ້ຢ້ຽມຢາມລາວ ໃນເດືອນພຶດສະພາ 2019 ນອກນີ້ ຍັງມີການແລກປ່ຽນການຢ້ຽມຢາມ ແລກປ່ຽນບົດຮຽນເຊິ່ງກັນ ແລະ ກັນ ລະດັບປະທານກຳມາທິການ ແລະ ໄດ້ຮັບເອົາພະນັກງານວິຊາການຈຳນວນໜຶ່ງສະພາແຫ່ງຊາດລາວ ໄປເຝິກອົບຮົບວຽກງານລັດຖະສະພາ ແລະ ພາສາອັງກິດຢູ່ກຳປູເຈຍ ພ້ອມນີ້ ສອງສະພາຍັງໄດ້ພົບປະປຶກສາຫາລືກ່ຽວກັບການຮ່ວມມືສອງຝ່າຍ ແລະໃຫ້ການສະໜັບສະໜູນເຊິ່ງກັນ ແລະ ກັນເປັນຢ່າງດີ ໃນໂອກາດເຂົ້າຮ່ວມກອງປະຊຸມລັດຖະສະພາພາກພື້ນ ແລະ ສາກົນເປັນຕົ້ນ AIPA APPFIPU ASEP ແລະ ອື່ນໆ.
ສຳລັບທິດທາງການຮ່ວມມືຕໍ່ໜ້າ ສອງຝ່າຍສະເໜີໃຫ້ສະພາສືບຕໍ່ຈັດຕັ້ງປະຕິບັດເນື້ອໃນຈິດໃຈ ຂອງບົດບັນທຶກຄວາມເຂົ້າໃຈວ່າດ້ວຍການຮ່ວມມື ຂອງສອງສະພາສະບັບປີ 2019 ໃຫ້ຕໍ່ເນື່ອງ ແລະ ມີປະສິດທິຜົນ ໃນການຮ່ວມມືທີ່ສອງລັດຖະບານໄດ້ລົງນາມຮ່ວມໃຫ້ເປັນຮູບປະທຳ ແລະ ມີປະສິດທິຜົນດີກວ່າເກົ່າ ມີການແລກປ່ຽນຂໍ້ມູນຂ່າວສານນຳກັນກ່ຽວກັບການຕິດຕາມກວດກາ ການສ້າງ ແລະ ປັບປຸງກົດໝາຍ ກໍຄື ການເຝິກອົບຮົມໃຫ້ບຸຄະລາກອນໃນຫົວຂໍ້ຕ່າງໆທີ່ແຕ່ລະຝ່າຍມີຄວາມສົນໃຈ ເພີ່ມທະວີການສະໜັບສະໜູນ ແລະ ການຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.
ໂອກາດດຽວກັນນີ້ ທ່ານປະທານຄະນະມິດຕະພາບລັດຖະສະພາ ກຳປູເຈຍ-ລາວ ປະທານກຳມາທິການທີ 3 ພ້ອມຄະນະ ຍັງໄດ້ເຂົ້າຢ້ຽມຄຳນັບທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ຕື່ມອີກ.