ພະແນກສາທາລະນະສຸກ ນະຄອນຫຼວງວຽງຈັນ (ນວ) ຈັດກອງປະຊຸມຖອດຖອນບົດຮຽນຄະນະກຳມະການຕ້ານ ແລະ ຄວບຄຸມໄຂ້ຍຸງລາຍປີ 2019 ແລະ ທິດທາງແຜນການປີ 2020 ຂຶ້ນວັນທີ 27 ກຸມພາ 2020 ທີ່ຫ້ອງວ່າການປົກຄອງ ນວ ເປັນປະທານຂອງທ່ານນາງ ໄຊພອນ ນັນທະພອນ ຫົວໜ້າພະແນກສາທາລະນະສຸກ ນວ ມີຮອງຫົວໜ້າພະແນກ ນາຍບ້ານ ອາສາສະໝັກບ້ານ ແລະ ຂະແໜງກ່ຽວຂ້ອງເຂົ້າຮ່ວມ.
ທ່ານນາງ ໄຊພອນ ນັນທະພອນ ກ່າວວ່າ: ການຈັດຕັ້ງປະຕິບັດວຽກງານສາທາລະນະສຸກ ຫຼື ວຽກງານກ່ຽວກັບການຮັກສາສຸຂະພາບ ໂດຍສະເພາະ ການມີສ່ວນຮ່ວມໃນວຽກງານການຕ້ານໄຂ້ຍຸງລາຍມີຄວາມຫຍຸ້ງຍາກພໍສົມຄວນເນື່ອງຈາກປະຊາຊົນຈຳນວນໜຶ່ງບໍ່ທັນເຂົ້າໃຈຢ່າງເລິກເຊິ່ງກ່ຽວກັບການມີສ່ວນຮ່ວມ ແລະ ການເປັນເຈົ້າການຕ້ານພະຍາດໄຂ້ຍຸງລາຍ ສະນັ້ນ ຈຶ່ງເຮັດໃຫ້ມີການລະບາດຂອງພະຍາດດັ່ງກ່າວຂະຫຍາຍເປັນບໍລິເວນກວ້າງ ປີ 2019 ທົ່ວປະເທດມີຄົນເຈັບເປັນໄຂ້ຍຸງລາຍ 39.003 ກໍລະນີ ເສຍຊີວິດ 76 ກໍລະນີ ໃນນີ້ ນວ ມີກໍລະນີຄົນເຈັບສູງກວ່າໝູ່ ມີ 10.813 ກໍລະນີ ເສຍຊີວິດ 25 ຄົນ ແຂວງສະຫວັນນະເຂດມີ 6.401 ກໍລະນີ ເສຍຊີວິດ 22 ກໍລະນີ ແຂວງສາລະວັນ 3.538 ກໍລະນີ ເສຍຊີວິດ 5 ກໍລະນີ ສ່ວນປີ 2020 ເລີ່ມຈາກອາທິດທີ 1 ຫາອາທິດທີ 8 ຢູ່ ນວ ມີລາຍງານໄຂ້ຍຸງລາຍທັງໝົດ 167 ກໍລະນີ ໃນນີ້ ເມືອງໄຊທານີມີ 49 ກໍລະນີ ໄຊເສດຖາ 24 ກໍລະນີ ແລະ ເມືອງນາຊາຍທອງ 18 ກໍລະນີ.
ຕໍ່ກັບສະພາບການລະບາດພະຍາດດັ່ງກ່າວ ປີ 2020 ຕ້ອງໄດ້ເພີ່ມທະວີຄວາມເປັນເຈົ້າການໃນການສະກັດກັ້ນ ແລະ ຕ້ານພະຍາດໄຂ້ຍຸງລາຍ ໂດຍນຳໃຊ້ມາດຕະການທີ່ສຳຄັນໃນການຄວບຄຸມ ໂດຍຫັນເອົາຊຸມຊົນເປັນກະແຈສຳຄັນ ເຊັ່ນ: ການເປັນເຈົ້າການຂອງບຸກຄົນ ຄອບຄົວ ໃນການປະຕິບັດຫຼັກການ 5 ປ ດ້ວຍຕົນເອງ ເຊິ່ງຂະແໜງສາທາລະນະສຸກເປັນຜູ້ເຜີຍແຜ່ ແລະ ແນະນຳວິທີການປະຕິບັດ ສ່ວນການປະຕິບັດຕົວຈິງຕ້ອງແມ່ນໜ້າທີ່ຂອງໝົດທຸກຄົນ ຄອບຄົວຕ້ອງເປັນເຈົ້າການປະຕິບັດ ເພາະວ່າຍຸງລາຍເກີດ ແລະ ແຜ່ພັນຢູ່ກັບເຮືອນຄົນ ດັ່ງນັ້ນ ຮຽກຮ້ອງມາຍັງອຳນາດການປົກຄອງທຸກຂັ້ນ ບັນດາພະແນກການຕ່າງໆຕ້ອງຖືເອົາວຽກງານດັ່ງກ່າວ ເປັນບຸລິມະສິດສຳຄັນຕິດພັນກັບການສ້າງຂະບວນການຄຳນັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ ເພື່ອບໍ່ໃຫ້ມີໜອນນ້ຳຍຸງລາຍເຮັດໃຫ້ປະຊາຊົນ ປາສະຈາກການເປັນພະຍາດໄຂ້ຍຸງລາຍ ເຮັດໃຫ້ຕົວເລກການລາຍງານກໍລະນີເຈັບເປັນຍ້ອນໄຂ້ຍຸງລາຍຫຼຸດລົງເຖິງ 70% ທຽບໃສ່ປີ 2019.