ອົງຄະນະພັກກອງບັນຊາການປ້ອງກັນຄວາມສະຫງົບ (ປກສ) ນະຄອນຫຼວງວຽງຈັນ ແມ່ນຄະນະພັກໜຶ່ງຢູ່ພາຍໃຕ້ການນຳ ພາໂດຍກົງ ເດັດຂາດ ແລະ ຮອບດ້ານ ຂອງຄະນະບໍລິຫານງານພັກນະຄອນຫຼວງວຽງຈັນ ແລະ ຄະນະພັກກະຊວງປ້ອງກັນ ຄວາມສະຫງົບ ມີພາລະບົດບາດເປັນເສ ນາທິການເຮັດວຽກງານປ້ອງກັນຄວາມສະ ຫງົບດ້ານການເມືອງ ແລະ ຄວາມເປັນ ລະບຽບຮຽບຮ້ອຍທາງດ້ານສັງຄົມຢູ່ນະ ຄອນຫຼວງວຽງຈັນ ຮັບຜິດຊອບຊີ້ນຳ-ນຳ ພາກໍ່ສ້າງພັກ ກໍ່ສ້າງກຳລັງຢູ່ໃນຂອບເຂດ ຄວາມຮັບຜິດຊອບຂອງຕົນ ໃຫ້ມີຄວາມໜັກແໜ້ນທາງດ້ານການເມືອງ ເຂັ້ມແຂງທາງດ້ານການຈັດຕັ້ງ ລະບຽບວິໄນ ແລະ ວິຊາສະເພາະເປັນຫຼັກແຫຼ່ງ ໃຫ້ແກ່ການປະຕິບັດແນວທາງປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ແນໃສ່ຮັບ ປະກັນຄວາມສະຫງົບ ມີສະຖຽນລະພາບ ດ້ານການເມືອງ ຄວາມເປັນລະບຽບຮຽບ ຮ້ອຍ ແລະ ຄວາມປອດໄພທົ່ວນະຄອນ ຫຼວງວຽງຈັນ.
ສະຫາຍ ພັນເອກ ສຸກພະຈັນ ບຸດດາ ຄຳ ຫົວໜ້າກອງບັນຊາການ ປກສ ນະ ຄອນຫຼວງວຽງຈັນ ໄດ້ຜ່ານຮ່າງບົດລາຍງານການເມືອງທີ່ກອງປະຊຸມໃຫຍ່ຜູ້ແທນ ຄັ້ງທີ V ຂອງອົງຄະນະພັກ ກອງບັນຊາການ ປກສ ນະຄອນຫຼວງວຽງຈັນ ເມື່ອບໍ່ດົນຜ່ານມານີ້ວ່າ: ຄະນະພັກ-ຄະນະກອງບັນຊາການ ໄດ້ສຸມໃສ່ແກ້ໄຂບັນດາປາກົດການຫຍໍ້ທໍ້ໃນສັງຄົມ ຮັບປະກັນໃຫ້ສັງຄົມມີຄວາມສະຫງົບປອດໄພ ໂດຍການນຳໃຊ້ວຽກງານວິຊາສະເພາະ ເຂົ້າສະກັດກັ້ນແກ້ໄຂໜໍ່ແໜງປັດໄຈທີ່ບໍ່ດີ ຈຳກັດບັນດາໄພສັງຄົມທີ່ກະທົບຕໍ່ຄວາມໝັ້ນຄົງຂອງຊາດ ນຳພາແກ້ໄຂປະກົດການຫຍໍ້ທໍ້ຕາມຄຳສັ່ງເລກທີ 27/ນຍ ຄຳສັ່ງເລກທີ 1470/ປກສ ວ່າດ້ວຍການເພີ່ມທະວີສະກັດກັ້ນແກ້ໄຂປະກົດການຫຍໍ້ທໍ້ໃນສັງຄົມ ແລະ ສຸມໃສ່ແກ້ໄຂອຸບັດຕິເຫດ ຢາເສບຕິດ ອັກຄີໄພ ແລະ ຂໍ້ຂັດແຍ້ງທີ່ດິນ (4 ຫຼຸດ) ຕິດພັນກັບການຈັດຕັ້ງປະຕິບັດ 4 ແຜນງານສະເພາະກິດ ເພື່ອສ້າງເງື່ອນໄຂຄວາມພ້ອມໃນທຸກດ້ານ ຄື: ໃນ 5 ປີຜ່ານມາ ມີລາຍຄະດີອາຍາເກີດຂຶ້ນທັງໝົດ 14.614 ເລື່ອງ ແກ້ໄຂໄດ້ 10.964 ເລື່ອງ ກັກຕົວຜູ້ກະທຳຜິດມາດຳເນີນຄະດີ 12.906 ຄົນ ຍິງ1.689 ຄົນ ເກັບກູ້ຊັບສິນ ແລະ ຂອງກາງຄະດີສົ່ງຄືນໃຫ້ລັດລວມໝູ່ ແລະ ພົນລະເມືອງເປັນເງິນ 3 ຕື້ກວ່າກີບ ຄຳຮູບປະພັນ 13 ກິໂລ ແລະ 26 ບາດ ລົດໃຫຍ່ຈຳນວນ 25 ຄັນ ລົດຈັກ 1.874 ຄັນ ມີອັກຄີໄພເກີດຂຶ້ນທັງໝົດ 165 ຄັ້ງ ສ້າງຜົນເສຍຫາຍປະມານ 56 ຕື້ກວ່າກີບ ເສຍຊີວິດ 1 ຄົນ ໄດ້ສະກັດກັ້ນ ແລະ ແກ້ໄຂກຸ່ມແກ້ງກວນເມືອງຕາມຖະໜົນ ສາມາດກັກລົດຈັກບໍ່ມີປ້າຍ ບໍ່ມີເອກະສານ ແລະ ລົດດັດແປງສະພາບໄດ້ 554 ຄັນ ລົດໃຫຍ່ 6 ຄັນ ແກ້ໄຂລົດທີ່ກັກມາໄດ້ 457 ຄັນ ພ້ອມທັງສຶກສາອົບຮົມປັບໃໝເຈົ້າຂອງລົດ ເອົາໃຈໃສ່ຕິດຕາມກວດກາ ຈັດສັນຄວາມເປັນລະບຽບຮຽບຮ້ອຍຕາມເສັ້ນທາງ ໂຄສະນາກົດລະບຽບຈະລາຈອນ ແລະ ເຜີຍແຜ່ຂໍ້ຕົກລົງວ່າດ້ວຍການຫຼຸດຜ່ອນອຸປະຕິເຫດ ແລະ ຂັບຂີ່ປອດໄພ ເພື່ອຫຼຸດຜ່ອນອຸປະຕິເຫດ ຜ່ານມາໄດ້ກວດກາພົບເຫັນຜູ້ລະເມີດກົດລະບຽບຈະລາຈອນ 55.477 ຄົນ ຍິງ 5.119 ຄົນ ສຶກສາອົບຮົມກ່າວເຕືອນ 22.753 ຄົນ ຍິງ 7.976 ຄົນ ກັກເອກກະສານ 31.161 ໃບ ຕະຫຼອດໄລຍະ 5 ປີຜ່ານມາ ມີອຸບັດເຫດເກີດຂຶ້ນທັງໝົດ 6.975 ລາຍ ມີພາຫະນະເປ່ເພເສຍຫາຍ 6.259 ຄັນ ຄົນບາດເຈັບ 4.559 ຄົນ ແລະ ເສຍຊີວິດ 742 ຄົນ.
ໄດ້ເປັນເຈົ້າການສະກັດກັ້ນ ຕ້ານກຸ່ມແກ້ງຜະລິດ ຄ້າຂາຍ ມົ້ວສຸມ ແລະ ເສບຢາເສບຕິດ ຕິດຕາມກວດກາຂຶ້ນບັນຊີກຳນົດເປົ້າໝາຍ ແລະ ໄດ້ສົມທົບກັບ ປກສ ກຸ່ມບ້ານ ແລະ ອຳນາດການປົກຄອງບ້ານ ສາມາດແກ້ໄຂເປົ້າໝາຍຊື້ຂາຍ ຂົນສົ່ງ ແລະ ມົ້ວສຸມຢາເສບຕິດໄດ້ທັງໝົດ 4.158 ເລື່ອງ ໃນນັ້ນ ຊື້-ຂາຍ 2.907 ເລື່ອງ ມົ້ວສຸມເສບຢາເສບຕິດ 1.251 ເລື່ອງ ກັກຕົວມາດຳເນີນຄະດີ 7.042 ຄົນ ຍິງ 760 ຄົນຄົນຕ່າງປະເທດ 19 ຄົນ ຍິງ 2 ຄົນ ໄດ້ບຳ ບັດປິ່ນປົວຜູ້ຕິດຢາເສບຕິດຢູ່ສູນສົມສະຫງ່າຈຳນວນ 6.100 ຄົນ.
ສຳລັບທິດທາງ ແລະ ຄາດໝາຍການພັດທະນາ ວຽກງານປ້ອງກັນຄວາມສະຫງົບທົ່ວນະຄອນຫຼວງວຽງຈັນ ແຕ່ນີ້ຮອດປີ 2025 ຄະນະພັກ-ຄະນະກອງບັນຊາການ ຈະເພີ່ມທະວີຈັດຕັ້ງຜັນຂະຫາຍແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ເລິກເຊິ່ງ ກາຍເປັນໜ້າທີ່ຂອງທົ່ວປວງຊົນ ຍົກສູງບົດບາດການນຳພາຂອງພັກຕໍ່ວຽກງານປ້ອງກັນ ຄວາມສະຫງົບ ທາງດ້ານການເມືອງ ແລະ ເປັນລະບຽບຮຽບຮ້ອຍໃນສັງຄົມຢ່າງຮອບດ້ານຢູ່ໃນນະຄອນຫຼວງວຽງຈັນ ຕັ້ງໜ້າແກ້ໄຂປະກົດການຫຍໍ້ທໍ້ໃນສັງຄົມໃຫ້ມີການຫັນປ່ຽນຢ່າງຕັ້ງໜ້າ ຈຳກັດ ແລະ ສະກັດກັ້ນໜໍ່ແໜ່ງທີ່ຈະພາໃຫ້ກະທົບຕໍ່ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ ກໍຄື ຕໍ່ຄວາມໝັ້ນ ຄົງການເມືອງ ເສດຖະກິດ ແລະ ວັດທະ ນະທຳ-ສັງຄົມ ແລະ ອື່ນໆ.