ອີງຕາມຂໍ້ມູນຈາກເຟສບຸກ ສະຫະພັນບານເຕະແຫ່ງຊາດລາວ (ສຕລ) ໃຫ້ຮູ້ວ່າ: ໃນວັນທີ 30 ກໍລະກົດ 2020 ຢູ່ກົວລາລຳເປີ ປະເທດມາເລເຊຍ ຄະນະກຳມະການລະບຽບວິໄນ ສະຫະພັນບານເຕະອາຊີ (AFC) ໄດ້ມີມະຕິຕົກລົງລົງວິໄນ ທ. ທິບພອນໄຊ ອິນທະວົງສາ ຫ້າມບໍ່ໃຫ້ຫຍຸ້ງກ່ຽວກັບທຸກໆກິດຈະກຳກ່ຽວກັບກີລາບານເຕະຕະຫຼອດຊີວິດ ໂດຍທີ່ຜູ້ກ່ຽວໄດ້ລະເມີດມາດຕາ 66.1 ຂອງກົດລະບຽບວ່າດ້ວຍວິໄນ ແລະ ຈັນຍາບັນຂອງ AFC ໂດຍມີສ່ວນກ່ຽວຂ້ອງກັບການລ໋ອກສະກໍ ໃນການແຂ່ງຂັນນັດມິດຕະພາບລະຫວ່າງທີມຊາດຮົງກົງ ແລະ ທີມຊາດລາວ ໃນວັນທີ 5 ຕຸລາ 2017 ທີ່ເຂດປົກຄອງພິເສດຮົງກົງ ຜົນປາກົດວ່າທີມຊາດລາວ ເສຍໃຫ້ກັບທີມຊາດຮົງກົງ 0-4.
ຜູ້ກ່ຽວແມ່ນບໍ່ໄດ້ຮ່ວມທີມໄປແຂ່ງຂັນໃນນັດດັ່ງກ່າວ ແຕ່ຫາກເປັນຜູ້ຕິດຕໍ່ປະສານງານໃຫ້ມີການລ໋ອກສະກໍ ໃນໜ້າຂ່າວຫຼາຍສຳນັກ ທັງພາຍໃນ ແລະ ຕ່າງປະເທດ ໄດ້ລົງຂ່າວກ່ຽວກັບກໍລະນີນີ້ ເຊິ່ງຮູບພາບປະກອບນັ້ນ ແມ່ນຜູ້ຮັກສາປະຕູທີ່ລົງແຂ່ງຂັນໃນນັດດັ່ງກ່າວ ທີ່ບໍ່ມີສ່ວນກ່ຽວຂ້ອງກັບການລ໋ອກສະກໍ ເຊິ່ງອາດເຮັດໃຫ້ມວນຊົນເຂົ້າໃຈຜິດ ວ່າແມ່ນຜູ້ກະທຳຜິດດັ່ງນັ້ນ ສຕລ ຈຶ່ງຂໍແຈ້ງມາຍັງບັນດາມວນຊົນ ເພື່ອຊີ້ແຈງລາຍລະອຽດຂອງກໍລະນີດັ່ງກ່າວ.
ສຕລ ໄດ້ຮ່ວມມືກັບ FIFA ແລະ AFC ໃນການສະກັດກັ້ນການລ໋ອກສະກໍໃນກີລາບານເຕະຢ່າງເຄັ່ງຄັດ ນອກນັ້ນ ສຕລ ຍັງໄດ້ຈັດການເຝິກອົບຮົມຢ່າງເປັນປະຈຳ ໃຫ້ກັບນັກກີລາ ແລະ ຄະນະຄູເຝິກທີມຊາດລາວທຸກໆລຸ້ນ ກ່ອນເຂົ້າຮ່ວມການແຂ່ງຂັນລະດັບພາກພື້ນ ແລະ ສາກົນ ລວມທັງບັນດາສະໂມສອນບານເຕະສະມາຊິກ ທີ່ເຂົ້າຮ່ວມການແຂ່ງຂັນຂອງ ສຕລ ໃນທຸກໆລາຍການ ກ່ຽວກັບຄວາມອັນຕະລາຍຂອງການລ໋ອກສະກໍ.