ທີ່ອິນໂດເນເຊຍ: ມີຂ່າວອ່າວເກົ່າແຕ່ໜ້າສົນໃຈອອກມາຈາກອິນໂດເນເຊຍ ເມື່ອປະມານ 5 ປີຢ້ອນຫຼັງ ກ່ຽວກັບມາດຕະການຄວບຄຸມນັກ ໂທດຄະດີຢາເສບຕິດ ຜູ້ຂຽນເຄີຍໄດ້ສະເໜີບົດໜຶ່ງຜ່ານມາກ່ຽວກັບນະໂຍບາຍໃໝ່ຂອງອິນໂດເນເຊຍ ຕໍ່ຜູ້ຕິດຢາບ້າ ແລະ ຢາເສບຕິດຊະນິດອື່ນໆ.
ໃນເມື່ອກ່ອນໆຢູ່ອິນໂດເນເຊຍ ນັ້ນບໍ່ມີການແຍກ ຫຼື ຈຳແນກລະຫວ່າງຜູ້ເສບກັບຜູ້ຄ້າຂາຍຢາເສບຕິດ ດັ່ງນັ້ນ ທັງຜູ້ເສບ ແລະ ຜູ້ຄ້າຂາຍຈຶ່ງລ້ວນແຕ່ມີໂທດທາງອາຍາແບບຕົກນ້ຳຫົວພຽງກັນ ແຕ່ສຸດທ້າຍ ຫວ່າງບໍ່ດົນມານີ້ ທາງການຂອງອິນໂດເນເຊຍ ໄດ້ກຳນົດນະໂຍບາຍໃໝ່ຕໍ່ຜູ້ເສບ ຄື ບໍ່ຖືວ່າພວກເຂົາເປັນຜູ້ກະທຳຜິດ ແຕ່ຖືວ່າເປັນຜູ້ທີ່ຕົກເປັນເຫຍື່ອທີ່ໄດ້ຮັບຜົນຮ້າຍຈາກການເສບຕິດດັ່ງກ່າວ ດັ່ງນັ້ນ ຜູ້ເສບຕິດຈະຕ້ອງໄດ້ຮັບການປິ່ນປົວ ແລະ ພັກຟື້ນສຸຂະພາບຢູ່ສູນປິ່ນປົວ ໂດຍສະເພາະ ແທນທີ່ຈະຖືກສົ່ງເຂົ້າຄຸກຄືເມື່ອກ່ອນ ສ່ວນໂທດທາງອາຍານັ້ນ ແມ່ນຈະໄດ້ກຳນົດໃສ່ຜູ້ຄ້າຢາເສບຕິດ ໂດຍສະເພາະ (ຜູ້ຜະລິດມີໄວ້ໃນຄອບຄອງເພື່ອຈຳໜ່າຍ ແລະ ຈຳໜ່າຍຢາເສບຕິດ) ນີ້ຄືນະໂຍບາຍທີ່ຖືກຕ້ອງຂອງທາງການອິນໂດເນເຊຍ ຕໍ່ຜູ້ທີ່ຕົກເປັນທາດຂອງຢາເສບຕິດ ພ້ອມດຽວກັນນັ້ນ ທາງການກໍໄດ້ເພີ່ມມາດຕະການລົງໂທດ ແລະ ຄວບຄຸມນັກໂທດຄະດີຄ້າຢາເສບຕິດຢ່າງໜັກໜ່ວງ ແລະ ແໜ້ນໜາກວ່າເກົ່າ ດັ່ງມີຂ່າວໜຶ່ງທີ່ບອກວ່າ ຄະນະກຳມະການຕ້ານຢາເສບຕິດແຫ່ງຊາດ ອິນໂດເນເຊຍ ໄດ້ຂຶ້ນແຜນສົ່ງນັກໂທດຄະດີຄ້າຢາເສບຕິດໄປກັກຂັງຢູ່ເກາະດອນທີ່ແຍກປ່ຽວຢູ່ເຂດນ່ານນ້ຳທີ່ເຕັມໄປດ້ວຍຝູງແຂ້ທີ່ຮ້າຍຂາດເປັນອັນຕະລາຍທີ່ສຸດ ທັງນີ້ກໍເພື່ອປ້ອງກັນບໍ່ໃຫ້ພວກນັກໂທດລັກໂຕນຄຸກ ເພາະຖ້າໂຕນຄຸກແລ້ວລອຍນ້ຳໜີກໍຈະຖືກແຂ້ງັບເປັນອາຫານ ຂ່າວບອກວ່າ ທ່ານບຸດີ ວາເຊໂຊ (Budi Waseso) ອຳນວຍການຄະນະກຳມະການຕ້ານຢາເສບຕິດແຫ່ງຊາດໄດ້ເດີນທາງໄປຊອກສະຖານທີ່ຢູ່ 3 ແຂວງ ເກາະດອນບ່ອນທີ່ມີຝູງແຂ້ທີ່ເປັນອັນຕະລາຍທີ່ສຸດມາແລ້ວ ເຫດຜົນທີ່ຢາກແຍກນັກໂທດຄະດີຢາເສບຕິດໄປຢູ່ບ່ອນສະເພາະ ກໍເພື່ອບໍ່ໃຫ້ນັກໂທດເຫຼົ່ານີ້ມີໂອກາດໂຕນຄຸກ ຫຼື ມີໂອກາດຕິດຕໍ່ກັບພາຍນອກເພື່ອສືບຕໍ່ຄ້າຂາຍຢາເສບຕິດໃນຂະນະປະຕິບັດໂທດຢູ່ໃນຄຸກ.
ທີ່ສິງກະໂປ: ໃນຕົ້ນເດືອນກຸມພາ 2019 ຂ່າວຈາກສິງກະໂປ ໃຫ້ຮູ້ວ່າ: ທາງການຂອງປະເທດນີ້ໄດ້ສະແດງຈຸດຢືນຢ່າງຈະແຈ້ງວ່າ ຈະຄົ້ນຄວ້າ ແລະ ນຳໃຊ້ກັນຊາເພື່ອທາງການແພດ ໂດຍສະເພາະ ພາຍໃຕ້ລະບຽບການຄຸ້ມຄອງຢ່າງເຄັ່ງຄັດ ພ້ອມດຽວກັນ ກໍຈະນັງຮັກສາຖານະຂອງກັນຢາເປັນຢາເສບຕິດທີ່ຜິດກົດໝາຍໄວ້ຄືເກົ່າ ຖະແຫຼງການຮ່ວມລະຫວ່າງກະຊວງພາຍໃນ ແລະ ກະຊວງສາທາລະນະສຸກ ສິງກະໂປ ໄດ້ຊີ້ອອກວ່າ ກັນຊາແມ່ນປະເພດຢາເສບຕິດໃຫ້ໂທດ ແລະ ບໍ່ມີຫຼັກຖານດ້ານວິທະຍາສາດໃດໆເລີຍທີ່ຮັບຮອງຄວາມປອດໄພ ແລະ ປະສິດທິຜົນຂອງການນຳໃຊ້ກັນຊາດິບ ດັ່ງນັ້ນ ຕ້ອງແຍກໃຫ້ເຫັນຈະແຈ້ງຄວາມແຕກຕ່າງລະຫວ່າງກັນຊາດິບກັບຜະລິດຕະພັນກັນຊາທາງການແພດ ຈຸດນີ້ລະຄືຄວາມແຕກຕ່າງກັບການນຳໃຊ້ກັນຊາຢູ່ບາງປະເທດໃນປັດຈຸບັນ ໂດຍບາງປະເທດໄດ້ລຶບຊື່ກັນຊາອອກຈາກບັນຊີຢາເສບຕິດ ບາງປະເທດເນັ້ນກັນຊາທາງການແພດ ແລະ ການເສບເພື່ອຜ່ອນຄາຍ ບາງປະເທດອະນຸຍາດໃຫ້ປູກກັນຊາເພື່ອຊົມໃຊ້ໃນຄອບຄົວ ຫຼື ສ່ວນບຸກຄົນໄດ້ ແຕ່ຢູ່ສິງກະໂປນັ້ນ ທາງການຈະເນັ້ນການນຳໃຊ້ກັນຊາເພື່ອທາງການແພດຢ່າງດຽວ ພາຍໃຕ້ການຄວບຄຸມຢ່າງເຄັ່ງຄັດດ້ວຍລະບຽບກົດໝາຍ ແລະ ກັນຊາ ຍັງຈະນອນຢູ່ໃນບັນຊີຢາເສບຕິດທີ່ຜິດກົດໝາຍດັ່ງເດີ່ມ.