ທ່ານ ແພງທອງ ບານຈັນທະວົງ ຮອງຫົວໜ້າສູນເລືອດແຫ່ງຊາດ ອົງການກາແດງລາວ ໃຫ້ສຳພາກເມື່ອບໍ່ດົນມານີ້ວ່າ: ເນື່ອງໃນໂອກາດວັນສ້າງຕັ້ງສື່ມວນຊົນລາວ ແລະ ການພິມຈຳໜ່າຍ ຄົບຮອບ 70 ປີ (13 ສິງຫາ 1950-13 ສິງຫາ 2020) ທີ່ຈະມາເຖິງໃນໄວໆນີ້ ໃນນາມຕາງໜ້າໃຫ້ພະນັກງານ-ລັດຖະກອນສູນເລືອດແຫ່ງຊາດ ແລະ ບັນດາສູນເລືອດທົ່ວປະເທດ ຂໍສະແດງຄວາມຊົມເຊີຍ ແລະ ຂອບໃຈເປັນຢ່າງສູງ ມາຍັງສື່ມວນຊົນລາວທຸກພາກສ່ວນ ທີ່ໄດ້ເຮັດໜ້າທີ່ຂອງຕົນຢ່າງຕັ້ງໜ້າ ໃນການປະກອບສ່ວນເຜີຍແຜ່ຂໍ້ມູນຂ່າວສານ ແນວທາງນະໂຍບາຍຂອງພັກ-ລັດ ເວົ້າສະເພາະ ການເຜີຍແຜ່ຂໍ້ມູນຂ່າວສານກ່ຽວກັບວຽກງານການປຸກລະດົມຂົນຂວາຍຜູ້ບໍລິຈາກເລືອດແບບສະໝັກໃຈ ເພື່ອຊ່ວຍເຫຼືອສັງຄົມໄດ້ຮັບຮູ້ຢ່າງກວ້າງຂວາງ.
ປັດຈຸບັນ ວຽກງານການບໍລິຈາກເລືອດໄດ້ຖືກຈັດຕັ້ງປະຕິບັດ ແລະ ມີຜົນສຳເລັດຢ່າງໜ້າພໍໃຈ ພິເສດແມ່ນມີພະນັກງານສື່ມວນຊົນຈຳນວນໜຶ່ງ ໄດ້ເປັນແບບຢ່າງທີ່ດີຕໍ່ການປະກອບສ່ວນບໍລິຈາກເລືອດເພື່ອສັງຄົມໃນແຕ່ລະໄລຍະ ທັງເຮັດວຽກໂຄສະນາເຜີຍແຜ່ ທັງເປັນຜູ້ບໍລິຈາກເລືອດເປັນປະຈຳ ຈົນໄດ້ຮັບການຍ້ອງຍໍຊົມເຊີຍຈາກການຈັດຕັ້ງ ພັກ-ລັດ ແລະ ພາກສ່ວນອື່ນໆ.
ໃນໂອກາດວັນສ້າງຕັ້ງສື່ມວນຊົນລາວ ແລະ ການພິມຈຳໜ່າຍທີ່ຈະມາເຖິງນີ້ ຂໍອວຍໄຊໃຫ້ພອນມາຍັງພະນັກງານ-ລັດຖະກອນຂອງສື່ມວນຊົນລາວທຸກຂະແໜງການ ຈົ່ງມີແຕ່ຄວາມຜາສຸກ ແລະ ມີຜົນສຳເລັດໃນໜ້າທີ່ ທີ່ພັກ-ລັດມອບໝາຍໃຫ້ ພິເສດຂໍອວຍພອນໄຊອັນປະເສີດມາຍັງຜູ້ນຳພັກ-ລັດ ຈົ່ງມີສຸຂະພາບເຂັ້ມແຂງ ສືບຕໍ່ຊີ້ນຳສື່ມວນລາວໃຫ້ກ້າວໄປຢ່າງບໍ່ຢຸດຢັ້ງ.