ພິທີສະເຫຼີມສະຫຼອງສັບປະດາສາກົນ ການລ້ຽງລູກດ້ວຍນົມແມ່ ຈັດຂຶ້ນວັນທີ 5 ສິງຫາ 2020 ຢູ່ມະຫາວິທະຍາໄລ ວິທະຍາສາດສຸຂະພາບ (ມວສ) ພາຍໃຕ້ຄຳຂວັນ “ສົ່ງເສີມການລ້ຽງລູກດ້ວຍນ້ຳນົມແມ່ ເພື່ອສຸຂະພາບທີ່ດີໃນໂລກ” ໂດຍມີທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທ່ານນາງ Pia Rebello Britto ຜູ້ຕາງໜ້າອົງການ UNICEF ປະຈຳລາວ ທ່ານ Leo Faber ເອກອັກຄະລັດຖະທູດສະຫະພາບເອີຣົບ (EU) ປະຈຳລາວ ພ້ອມດ້ວຍບັນດາກົມ ສູນ ສະຖາບັນ ຄະນະອະທິການບໍດີ ມວສ ຄູ່ຮ່ວມພັດທະນາ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ພູທອນ ເມືອງປາກ ກ່າວວ່າ: ທຸກໆປີ ໄລຍະວັນທີ 1-7 ສິງຫາ ປະເທດຕ່າງໆໃນໂລກໄດ້ພ້ອມກັນສະເຫຼີມສະຫຼອງວັນສັບປະດາສາກົນ ການລ້ຽງລູກດ້ວຍນ້ຳນົມແມ່ ດ້ວຍການຈັດງານ ແລະ ສ້າງຂະບວນການຕ່າງໆຫຼາຍຮູບແບບ ປີ 2020 ນີ້ ອົງກອນພັນທະມິດສາກົນລ້ຽງລູກດ້ວຍນ້ຳນົມແມ່ ໄດ້ເນັ້ນໜັກໃສ່ຫົວຂໍ້ “ສົ່ງເສີມການລ້ຽງລູກດ້ວຍນ້ຳນົມແມ່ ເພື່ອສຸຂະພາບທີ່ດີໃນໂລກ” “ສະໜັບສະໜູນການລ້ຽງລູກດ້ວຍນົມແມ່ ເພື່ອສຸຂະພາບທີ່ດີໃນໂລກ” ໝາຍເຖິງການຮັກລູກ ຮັກຫຼານ ຮັກເຮົາເອງ ຮັກໂລກ ຕ້ອງສະໜັບສະໜູນການລ້ຽງລູກດ້ວຍນ້ຳນົມແມ່ຢ່າງດຽວແຕ່ມື້ເກີດຮອດອາຍຸ 6 ເດືອນ ແລະ ສືບຕໍ່ລ້ຽງລູກດ້ວຍນ້ຳນົມແມ່ຮອດອາຍຸໄດ້ 2 ປີ ຫຼື ຫຼາຍກວ່ານັ້ນ ຄຽງຄູ່ກັບການໃຫ້ອາຫານເສີມ ເມື່ອອາຍຸໄດ້ 6 ເດືອນຂຶ້ນໄປ ໂດຍສະເພາະຊ່ວຍໃຫ້ບັນດາແມ່ທີ່ເຮັດວຽກນອກບ້ານ ໃຫ້ສາມາດຜ່ານຜ່າຂໍ້ຫຍຸ້ງຍາກຕ່າງໆໄດ້ ພ້ອມນີ້ ການລ້ຽງລູກດ້ວຍນ້ຳນົມແມ່ ຍັງຊ່ວຍປະຢັດລາຍຈ່າຍ ເພາະນ້ຳນົມແມ່ແມ່ນຜະລິດຕາມທຳມະຊາດໂດຍແມ່ເອງ ແລະ ນ້ຳນົມແມ່ ມີສານອາຫານຄົບຖ້ວນ ສົມສ່ວນ ແລະ ພຽງພໍສຳລັບເດັກ ການປະຕິບັດ 3 ດູດ (ດູດໄວທັນທີຫຼັງເກີດ ດູດເລື້ອຍໆ ແລະ ດູດຖືກວິທີ) ຈະຊ່ວຍປ້ອງກັນການຂາດສານອາຫານໃນເດັກ ສຳຄັນກວ່ານັ້ນ ໃນນ້ຳນົມແມ່ຍັງມີພູມຄຸ້ມກັນ ປ້ອງກັນເດັກຈາກພະຍາດຊຶມເຊື້ອຕ່າງໆ ຫຼຸດຜ່ອນການເຈັບປ່ວຍ ແລະ ການເສຍຊີວິດຂອງເດັກ ຍິ່ງລູກກິນນ້ຳນົມແມ່ດົນເທົ່າໃດ ກໍຈະໄດ້ຮັບພູມຕ້ານທານພະຍາດດົນເທົ່ານັ້ນ.
ທ່ານນາງ Pia Rebello Britto ກ່າວວ່າ: ການລ້ຽງລູກດ້ວຍນ້ຳນົມແມ່ ບໍ່ພຽງແຕ່ເປັນພື້ນຖານຂອງການພັດທະນາເດັກໃຫ້ແຂງແຮງ ຍັງເປັນພື້ນຖານການພັດທະນາປະເທດອີກດ້ວຍ ມັນຄຸ້ມຄ່າ ແລະ ເປັນການປະຢັດ ປັບປຸງຊີວິດຂອງເດັກ ຄອບຄົວ ແລະ ສັງຄົມໃຫ້ດີຂຶ້ນ ດ້ວຍການຢຸດຕິການຕາຍຂອງເດັກທີ່ສາມາດປ້ອງກັນໄດ້ ດ້ວຍການປັບປຸງສຸຂະພາບຂອງແມ່ ແລະ ເດັກໃຫ້ດີຂຶ້ນ ສັງຄົມຈະເກັບກ່ຽວຜົນປະໂຫຍດຂອງຕົນ ດ້ວຍການເພີ່ມທະວີການບັນລຸເປົ້າໝາຍດ້ານການສຶກສາ ແລະ ມີຜະລິດຕະຜົນເພີ່ມຂຶ້ນ.