ກອງປະຊຸມໃຫຍ່ ຄັ້ງທີ VI ຂອງຄະນະພັກຮາກຖານ ພະແນກໂຍທາທິການ ແລະ ຂົນສົ່ງ ນະ ຄອນຫຼວງວຽງຈັນ (ຍທຂ ນວ) ຈັດຂຶ້ນວັນທີ 31 ກໍລະກົດ ຜ່ານມາ ຢູ່ສູນການຄ້າລາວ-ໄອເຕັກ ໂດຍເປັນປະທານຂອງສະຫາຍ ສຸລິວັນ ພົມມະຫາໄຊ ເລຂາຄະນະພັກຮາກຖານ ຫົວໜ້າພະແນກ ຍທຂ ນວ ມີສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເລຂາຄະນະພັກ ເຈົ້າຄອງ ນວ ພ້ອມດ້ວຍຄະພັກ ແຂກຖືກເຊີນ ແລະ ສະຫາຍສະມາຊິກພັກ ເຂົ້າຮ່ວມ.
ສະຫາຍ ສຸລິວັນ ພົມມະຫາໄຊ ກ່າວວ່າ: ຄະນະພັກຮາກຖານພະແນກ ຍທຂ ນວ ມີໜ່ວຍພັກຂຶ້ນກັບ 8 ໜ່ວຍ ສະມາຊິກພັກ 229 ສະຫາຍ ຍິງ 52 ສະຫາຍ 5 ປີຜ່ານມາ ໜ່ວຍພັກໄດ້ຮັບນາມມະຍົດໜ່ວຍພັກເຂັ້ມແຂງ-ຮູ້ນຳພາຮອບດ້ານ 3 ປີຕິດຕໍ່ກັນ ພ້ອມນີ້ຍັງໄດ້ເອົາໃຈໃສ່ປະຕິບັດວຽກງານວິຊາສະ ເພາະຂອງຕົນຢ່າງມີຜົນສຳເລັດ ໂດຍສົມທົບກັບຂະແໜງການກ່ຽວຂ້ອງ ກວດກາໂຄງການລົງທຶນຂອງລັດເລີ່ມແຕ່ຫົວທີ ຄື: ໂຄງການກໍ່ສ້າງທາງເບຕົງແຕ່ 3 ແຍກຈີນາຍໂມ້-ບໍ່ໂອ-ບ້ານຫ້ອມ-ຊາຍຟອງ ສຳ ເລັດ 100% ໂຄງການກໍ່ສ້າງເສັ້ນທາງແຕ່ 4 ແຍກຕານມີໄຊ-3 ແຍກສີເກີດ ຕືບໜ້າ 86,42% (ຊ້າກວ່າແຜນການ 13,58%) ກວດກາ 20 ເປົ້າໝາຍ ກວດກາສະເພາະກິດ 65 ໂຄງການ ສະເໜີດັດແກ້ມູນຄ່າ 14 ໂຄງການ ອະນຸຍາດສິ່ງປຸກສ້າງ 7.122 ຫຼັງ ເນື້ອທີ່ 5 ລ້ານກວ່າຕາແມັດ ແກ້ໄຂຄວາມບໍ່ເປັນລະບຽບຮຽບຮ້ອຍ ເປັນຕົ້ນການມ້າງເທີບ-ເງີບ ການຂາຍເຄື່ອງຕາມແຄມທາງ ຂາຍເຄື່ອງຊະຊາຍ ຮື້ຖອນ ແລະ ຕັດປ້າຍໂຄສະນາທີ່ບໍ່ຖືກຕ້ອງ 4.500 ຈຸດ ແກ້ໄຂການຮ້ອງຟ້ອງປຸກສ້າງທີ່ສົ່ງຜົນກະທົບຕໍ່ຜູ້ຢູ່ໃກ້ຄຽງ ແລະ ເສັ້ນທາງເປິເປື້ອຍ 150 ກໍລະນີ ກວດກາບໍລິມາດ ແລະ ລາຄາໂຄງການລົງທຶນຂອງລັດ 69 ໂຄງການ ເຮັດໃຫ້ລາຄາຜິດດ່ຽງ ຫຼຸດລົງ 109 ຕື້ກີບ ຕິດຕາມ ຊຸກຍູ້ໂຄງການລົງທຶນຂອງລັດ ແລະ ເອກະຊົນ 45 ໂຄງການ ປັບປຸງ-ກໍ່ສ້າງເສັ້ນທາງເກົ່າສາຍຫຼັກ ປຸກລະດົມປະຊາຊົນປະກອບສ່ວນວຽກງານໄກ່ເກ່ຍ-ຍົກຍ້າຍສິ່ງກີດຂວາງ ໂຄງການກໍ່ສ້າງທາງລົດໄຟ ລາວ-ຈີນ ເຮັດໃຫ້ການກໍ່ສ້າງມີຄວາມຄືບໜ້າ 89,8% ບູລະນະ ຮັກສາ ແລະ ສ້ອມແປງເສັ້ນທາງໃນຕົວເມືອງ 11.410 ຕາແມັດ ປັດຈຸບັນພື້ນຖານໂຄງລ່າງເສັ້ນທາງໂທລະຄົມມະນາຄົມທົ່ວ ນວ ຍາວ 2.740,18 ກິໂລແມັດ ໃນນີ້ທາງເບຕົງ ກວມ 61,6% ທາງອັດສະຟານ 49,1% ທາງປູຢາງ 2 ຊັ້ນ 12,1% ທາງປູແຮ່ 1,6% ທາງທຳມະຊາດ 7,3%.
ວຽກງານຄຸ້ມຄອງພາຫະນະ ແລະ ການຂັບຂີ່ ໄດ້ຮັບການການປັງປຸງນັບມື້ດີຂຶ້ນ ສາມາດເຊື່ອມໂຍງຂໍ້ມູນພາຫະນະກັບພາກສ່ວນຕ່າງໆ ເຮັດໃຫ້ການຍື່ນເອກະສານ ການຂຶ້ນທະບຽນລົດໄວຂຶ້ນ ປີ 2014-2019 ສ້າງລາຍຮັບໄດ້ 140,14 ຕື້ກີບ ມອບເຂົ້າງົບປະມານ 31,19 ຕື້ກີບ 5 ປີຜ່ານມາ ສຳເລັດໂຄງ ການກໍ່ສ້າງປ້ອງກັນຕາຝັ່ງເຈື່ອນຕາມເຂດຕ່າງໆໃນຄວາມຮັບຜິດຊອບ ມີລະບົບປ້ອງກັນຕາຝັ່ງເຈື່ອນ ຍາວ 65,5 ກິໂລແມັດ ກວມ 36% ຂອງ 182 ກິໂລແມັດ ຕາມຊາຍແດນທາງນ້ຳ ພ້ອມນີ້ຍັງສາມາດຂົນສົ່ງສິນຄ້າໄດ້ 2 ລ້ານໂຕນ ຂົນສົ່ງໂດຍສານໄດ້ 50 ລ້ານກວ່າຄົນ ການຂົນສົ່ງທາງນ້ຳ ແລະ ຂຸດຄົ້ນຫີນ ແຮ່ ຊາຍ ໄດ້ຮັບການຄຸ້ມຄອງໃຫ້ເຂົ້າສູ່ລະບຽບການ ຂຶ້ນທະບຽນເຮືອ 109 ລຳ ກວດກາເຕັກນິດເຮືອ 180 ລຳ ອອກໃບອະນຸຍາດແລ່ນເຮືອນ 26 ລຳ ອະນຸຍາດຂຸດຄົ້ນຫີນ ແຮ່ ຊາຍ ຕາມລຳນ້ຳຂອງ ນ້ຳງື່ມ 34 ບໍລິສັດ 105 ຈຸດ ເນື້ອທີ່ 419 ເຮັກຕາ ສາມາດສະໜອງຫີນ-ຊາຍໃນການພັດທະນາເສດຖະ ກິດ-ສັງຄົມ 10,92 ລ້ານແມັດກ້ອນ.
ເພື່ອໃຫ້ບັນລຸວິໄສທັດ ຍຸດທະສາດ ແລະ ຄາດໝາຍ ທີ່ກຳນົດໄວ້ ແຜນການຕໍ່ໜ້າຕ້ອງໄດ້ເອົາໃຈ ໃສ່ພັດທະນາວຽກງານ ຍທຂ ໃຫ້ເປັນປາຍແຫຼມ ມີຈຸດສຸມ ມີປະສິດທິຜົນ ເປັນໃຈກາງເຊື່ອມໂຍງກັບອະ ນຸພາກພື້ນ ແລະ ສາກົນ ພັດທະນາຕົວເມືອງວຽງຈັນໃຫ້ຫຼຸດພົ້ນຈາກຄວາມດ້ວຍພັດທະນາດ້ານພື້ນຖານໂຄງລ່າງຄົມມະນາຄົມ ແລະ ເຄຫາສະຖານ ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນໃຫ້ໄດ້ປີລະ 85% ກໍ່ສ້າງປັບປຸງຕາໜ່າງເສັ້ນທາງໃຫ້ໄດ້ 40 ເສັ້ນ ຍາວ 291 ກິໂລແມັດ ຂົວ 1 ແຫ່ງ ຮ່ອງລະບາຍ ນ້ຳ 6 ຮ່ອງ ສະໜັບສະໜູນ ແລະ ສົ່ງເສີມວິທີທາງອອກການແກ້ໄຂໜີ້ສິນໂຄງການກໍ່ສ້າງໂຄງລ່າງພື້ນ ຖານໃຫ້ຫຼຸດລົງ ຢັບຢັ້ງການສ້າງໜີ້ສິນໃໝ່ດ້ວຍຮູບການເກັບລາຍຮັບຈາກອາກອນຕົວເມືອງ ແລະ ກອງທຶນທາງ ນວ ກໍ່ສ້າງປ້ອງກັນຕາຝັ່ງເຈື່ອນພັດທະນາແຄມຂອງ ແລະ ແມ່ນ້ຳງື່ມ 18 ໂຄງການ ຍາວ 48 ກິໂລແມັດ ຂະຫຍາຍນ້ຳປະປາໃຫ້ໄດ້ 400.000 ແມັດກ້ອນຕໍ່ມື້ ຕອບສະໜອງຄວາມຕ້ອງການ 7 ຕົວເມືອງໃຫ້ໄດ້ 100% ແລະ 2 ເມືອງນອກໃຫ້ໄດ້ 95% ພັດທະນາຂົນສົ່ງລະບົບມວນຊົນໃຫ້ມີຄວາມທັນສະໄໝ ແກ້ໄຂການເກີດອຸປະຕິເຫດຕາມທ້ອງຖະໜົນ ຍ້ອນຄວາມບົກຜ່ອງຂອງວຽກງານ ຍທຂ ໃຫ້ຫຼຸດລົງ 50% ຂະຫຍາຍຈຸດບໍລິການຂຶ້ນທະບຽນ ກວດກາເຕັກນິກ ສອບເສັງການຂັບຂີ່ໃຫ້ໄດ້ 3 ຈຸດ ໃນ 3 ເມືອງ ແລະ ສູ້ຊົນສ້າງລາຍຮັບເຂົ້າງົບປະມານໃຫ້ໄດ້ 30 ຕື້ກວ່າກີບຕໍ່ປີ.
ໂອກາດນີ້ ຍັງໄດ້ປ່ອນບັດຄັດເລືອກເອົາຄະນະພັກຮາກຖານ ຊຸດໃໝ່ ໂດຍມີຜູ້ສະໝັກ 12 ສະຫາຍ ເລືອກເອົາ 9 ສະຫາຍ ໃນນີ້ໄດ້ເລືອກເອົາສະຫາຍ ສຸລິວັນ ພົມມະໄຊ ເປັນເລຂາ ສະຫາຍ ສີວອນ ຊັບທະວີ ເປັນຮອງເລຂາ ທັງເປັນປະທານກວດກາ ສະຫາຍ ໄຊຍາ ໄຊມຸງຄຸນ ເປັນຮອງປະທານກວດກາ ພ້ອມນີ້ຍັງໄດ້ເລືອກເອົາຜູ້ແທນສົມບູນ ແລະ ສຳຮອງ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ VII ຂອງອົງ ຄະນະພັກ ນວ ແລະ ຮັບຟັງການໂອ້ລົມຈາກສະຫາຍ ສິນລະວົງ ຄຸດໄພທູນ ຕື່ມອີກ.