ສະຫາຍ ຮທ ນາງ ຈວນແກ້ວ ມະລິນທອງພັນ ຊາວໜຸ່ມຕົວແບບດ້ານການປູກຝັງ-ລ້ຽງສັດ ຢູ່ກອງພັນນ້ອຍທະຫານຮາບ 513 ກອງບັນຊາການທະຫານນະຄອນຫຼວງວຽງຈັນ (ນວ) ໃຫ້ສຳພາດເມື່ອບໍ່ດົນມານີ້ວ່າ: ພາຍຫຼັງຮຽນຈົບສາຍສາມັນ (ມ6) ຕົນໄດ້ມີຄວາມຕື່ນຕົວສະໝັກເຂົ້າຮັບໃຊ້ວຽກງານໃນກອງທັບ ຢູ່ກອງພັນ 661 ແລະ ໄດ້ໄປຍົກລະດັບວິຊາສະເພາະສື່ສານ (ໂຮງຮຽນ 205) ພາຍຫຼັງຮຽນຈົບ ໄດ້ຖືກຊັບຊ້ອນມາປະຕິບັດໜ້າທີ່ຢູ່ກອງພັນນ້ອຍທະຫານຮາບ 513 ກອງບັນຊາການທະຫານ ນວ ຈົນເຖິງປັດຈຸບັນ.
ຫຼັງຈາກທີ່ເຂົ້າສັງກັດຢູ່ຖັນແຖວກອງທັບແລ້ວ ຕົນກໍໄດ້ເອົາໃຈໃສ່ເຝິກຝົນຫຼໍ່ຫຼອມຕົນເອງ ສຶກສາຮ່ຳຮຽນນຳໝູ່ຄູ່ ແລະ ການຈັດຕັ້ງ ໂດຍປະຕິບັດຕາມທິດຊີ້ນຳຂອງຄະນະພັກ-ຄະນະບັນຊາ ກໍຄືທິດທາງຂອງກົມວາງອອກ ໂດຍສະເພາະ 4 ປູກ 4 ລ້ຽງ ເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໄປພ້ອມໆກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ທີ່ຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວວາງອອກ ເພື່ອສ້າງໃຫ້ຕົນກາຍເປັນຊາວໜຸ່ມນຳໜ້າ 4 ບຸກ ໄລຍະຜ່ານມາ ຕົນໄດ້ໃຊ້ເວລາຫວ່າງຈາກວຽກລວມ ເພື່ອທຳການຜະລິດປູກຝັງ-ລ້ຽງສັດ ໂດຍການປູກຜັກຊະນິດຕ່າງໆ ເຊັ່ນ: ພືດລົ້ມລຸກ ໜໍ່ໄມ້ ແລະ ພືດຕາມລະດູການ ສະໜອງເຂົ້າເຮືອນຄົວລວມ ແລະ ຂາຍໃຫ້ແມ່ຄ້າໄດ້ 20-30 ກິໂລ ສ້າງລາຍຮັບ 200.000-300.000 ກີບຕໍ່ເດືອນ ພ້ອມນີ້ ຍັງໄດ້ລ້ຽງສັດປີກ ເຊັ່ນ: ນົກກາງແກ ເປັດ ໄກ່ ຂາຍ 70-80 ໂຕ ສ້າງລາຍຮັບໄດ້ 1-2 ລ້ານກີບຕໍ່ເດືອນ ລ້ຽງກົບພໍ່-ແມ່ 120 ໂຕ ເພາະພັນກົບນ້ອຍຈຳໜ່າຍໄດ້ 10.000 ໂຕ ເປັນເງິນ 5 ລ້ານກີບຕໍ່ປີ ປ່ອຍປາຊະນິດຕ່າງໆ 150.000-200.000 ໂຕ ໃນ 7 ໜອງ ສ້າງລາຍຮັບ 25-26 ລ້ານກີບ ລ້ຽງໝູພໍ່-ແມ່ພັນ 35 ໂຕ ເພາະພັນໝູນ້ອຍຂາຍ 24-25 ລ້ານກີບ ສະເລ່ຍແລ້ວສາມາດສ້າງລາຍຮັບຈາກການປູກຝັງ-ລ້ຽງສັດ 65-70 ລ້ານກີບຕໍ່ປີ.
ສະຫາຍ ຮທ ນາງ ຈວນແກ້ວ ມະລິນທອງພັນ ກ່າວຕື່ມອີກວ່າ: ເພື່ອເຮັດໃຫ້ການປູກຝັງ-ລ້ຽງສັດມີຄວາມຍືນຍົງ ແລະ ຂະຫຍາຍຕົວຂຶ້ນເລື້ອຍໆ ໃນຕໍ່ໜ້າຈະສືບຕໍ່ປູກຝັງ ແລະ ລ້ຽງສັດໃຫ້ຫຼາຍຂຶ້ນກວ່າເກົ່າ ເປັນຕົ້ນຈະໄດ້ສຸມໃສ່ລ້ຽງສັດປີກໃຫ້ໄດ້ 1.000-1.200 ໂຕຕໍ່ປີຂຶ້ນໄປ ປ່ອຍ ແລະ ລ້ຽງປາຊະນິດຕ່າງໆໃຫ້ໄດ້ 250.000–300.000 ໂຕຕໍ່ປີ ຂະຫຍາຍເພາະພັນກົບໃຫ້ໄດ້ 11.000-12.000 ໂຕຕໍ່ປີ ເພື່ອສ້າງລາຍຮັບໃຫ້ໄດ້ 70-75 ລ້ານກີບຕໍ່ປີ.