ໂຮງຮຽນພອນສະຫວັນກີລາ-ກາຍຍະກຳ (ຮພກ) ສະຖາບັນກີລາ-ກາຍຍະກຳ ກະຊວງສຶກສາທິການ ແລະ ກີລາ (ສສກ) ເປີດບັ້ນສອບເສັງເພື່ອຄັດເລືອກນັກຮຽນກີລາ ໃນຂອບເຂດທົ່ວປະເທດ ລະຫວ່າງວັນທີ 3-14 ສິງຫາ 2020 ຢູ່ໂຮງຮຽນດັ່ງກ່າວ ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນໂດຍມີທ່ານ ສິງຄຳ ນາລິນ ຮັກສາການຜູ້ອຳນວຍການສະຖາບັນກີລາ-ກາຍຍະກຳ ທ່ານ ກິ່ງລັດຕະນະ ທອງສະໝຸດ ຮອງຜູ້ອຳນວຍການສະຖາບັນກີລາ-ກາຍຍະກຳ ທັງເປັນຜູ້ອຳນວຍການສູນເຝິກກີລາແຫ່ງຊາດ ແລະ ທ່ານນາງ ເກດສຸດາ ເລັ່ງສະຫວັດ ຮອງຜູ້ອຳນວຍການສະຖາບັນກີລາ-ກາຍຍະກຳ ຜູ້ອຳນວຍການໂຮງຮຽນພອນສະຫວັນກີລາ-ກາຍຍະກຳ ພ້ອມດ້ວຍບັນດາກົມກ່ຽວຂ້ອງ ຄະນະພະແນກ ຕາງໜ້ານຳພານັກຮຽນກີລາຈາກ 13 ແຂວງ ແລະ 1 ນະຄອນຫຼວງ ຄະນະອຳນວຍການສູນ ຮພກ ພະນັກງານ ຄູອາຈານ ແລະ ນ້ອງນັກຮຽນ ຕະຫຼອດຮອດພໍ່ແມ່ຜູ້ປົກຄອງນັກຮຽນເຂົ້າຮ່ວມຢ່າງຫຼວງຫຼາຍ.
ໂອກາດນີ້ ທ່ານ ສູນທອນ ຄຳສານ ຮັກສາການຮອງຜູ້ອຳນວຍການ ຮພກ ລາຍງານໃຫ້ຊາບວ່າ: ຮພກ ໄດ້ມີແຜນຮັບນັກຮຽນກີລາຊັ້ນ ມ5 ໃນສົກຮຽນ 2020-2021 ເຂົ້າຮຽນ ແລະ ເຝິກແອບໃນ 12 ປະເພດກີລາ ຄື: ເທຄວັນໂດ ຢູໂດ ຄາຣາເຕໂດ ມວຍປ້ຳ ມວຍສາກົນສະໝັກຫຼິ້ນ ວູຊຸ ຍິງທະນູ ແລ່ນ-ລານ ຍົກນ້ຳໜັກ ເປຕັງ ປິ່ງປ່ອງ ແລະ ກະຕໍ້ ຜ່ານມາໄດ້ຂໍອະນຸມັດອອກແຈ້ງການຈາກຫ້ອງການກະຊວງ ສສກ ຫາບັນດາພະແນກສຶກສາທິການ ແລະ ກີລານະຄອນຫຼວງ ແຂວງຕ່າງໆໃນຂອບເຂດທົ່ວປະເທດ ເພື່ອຮັບສະໝັກ ແລະ ຄັດເລືອກນັກກີລາທີ່ມີຄວາມມັກຮັກໃນການຫຼິ້ນກີລາ ແລະ ມີພອນສະຫວັນໃນກີລາປະເພດຕ່າງໆ ໃຫ້ແກ່ໂຮງຮຽນພອນສະຫວັນກີລາ-ກາຍຍະກຳ ໂດຍໄດ້ກຳນົດເງື່ອນໄຂ ແລະ ມາດຖານສະເພາະຂອງແຕ່ລະປະເພດກີລາໄວ້ ເຊິ່ງມີຜູ້ສະໝັກທັງໝົດ 524 ຄົນ ຈາກ 13 ແຂວງ ມາຮອດປັດຈຸບັນ ສາມາດເລືອກໄດ້ນັກຮຽນກີລາ ຈຳນວນ 132 ຄົນ ທີ່ມີເງື່ອນໄຂ ແລະ ມາດຖານຕາມຄວາມຕ້ອງການຂອງແຕ່ລະປະເພດກີລາໂດຍພື້ນຖານ ເພື່ອມາເຂົ້າສູນເຝິກແອບຄັດເລືອກຮອບສຸດທ້າຍ ລະຫວ່າງວັນທີ 3-14 ສິງຫາ 2020 ຈາກຈຳນວນ 13 ແຂວງ ແລະ ນະຄອນຫຼວງວຽງຈັນ ປະກອບມີ: ນະຄອນຫຼວງວຽງຈັນ 8 ຄົນ ແຂວງວຽງຈັນ 12 ຄົນ ແຂວງຊຽງຂວາງ 3 ຄົນ ແຂວງຫຼວງພະບາງ 8 ຄົນ ແຂວງອຸດົມໄຊ 32 ຄົນ ແຂວງຫຼວງນ້ຳທາ 8 ຄົນ ແຂວງບໍລິຄຳໄຊ 9 ຄົນ ແຂວງສະຫວັນນະເຂດ 10 ຄົນ ແຂວງສາລະວັນ 15 ຄົນ ແຂວງຈຳປາສັກ 15 ຄົນ ແຂວງໄຊຍະບູລີ 4 ຄົນ ແຂວງຫົວພັນ 4 ຄົນ ແລະ ແຂວງຜົ້ງສາລີ 4 ຄົນ.
ໃນການເຂົ້າສູນເຝິກແອບຄັດເລືອກຮອບສຸດທ້າຍນີ້ ຈະຄັດເອົານັກຮຽນເຂົ້າຮຽນຊັ້ນ ມ5 ທັງໝົດ 60 ຄົນ ໃນ 12 ປະເພດ ເຊິ່ງຈະໃຊ້ເວລາຄັດເລືອກ 14 ວັນ ເລີ່ມເຝິກແອບແຕ່ວັນທີ 3-12 ສິງຫາ 2020 ສຳລັບວັນທີ 13 ສິງຫາ 2020 ເປັນມື້ທົດສອບຄັ້ງສຸດທ້າຍ ວັນທີ 14 ສິງຫາ 2020 ເປັນມື້ປະກາດຜົນການສອບຄັດເລືອກ ຢ່າງໃດກໍຕາມ ຫວັງເປັນຢ່າງຍິ່ງວ່າ ພວກເຮົາຈະບັນລຸເປົ້າໝາຍຕາມແຜນການທີ່ຕັ້ງໄວ້ ສາມາດເລືອກໄດ້ນັກຮຽນກີລາທີ່ມີຄວາມສາມາດ ມີພອນສະຫວັນ ຖືກຕ້ອງຕາມເປົ້າໝາຍຂອງແຕ່ລະປະເພດ ເພື່ອເຂົ້າຮຽນໂຮງຮຽນພອນສະຫວັນກີລາ-ກາຍຍະກຳ ໃນສົກຮຽນ 2020-2021 ທີ່ຈະມາເຖິງນີ້.
ທ່ານ ສິງຄຳ ນາລິນ ກໍໄດ້ສະແດງຄວາມຍ້ອງຍໍຊົມເຊີຍ ມາຍັງບັນດາຄະນະອຳນວຍການ ຄູ-ອາຈານທຸກໆຄົນ ທີ່ໄດ້ພ້ອມພຽງກັນຈັດຕັ້ງປະຕິບັດການຮຽນ-ການສອນວິຊາສະເພາະຂອງຕົນ ສາມາດປະກອບສ່ວນສ້າງບຸຄະລາກອນ ກາຍເປັນທ່າແຮງ ແລະ ກຳລັງສຳຄັນຂອງຊາດ ພ້ອມທັງສ້າງກຽດສັກສີ ແລະ ຊື່ສຽງມາສູ່ປະເທດຊາດໄດ້ຢ່າງໜ້າພາກພູມໃຈ ແລະ ຕະຫຼອດໄລຍະການສ້າງຕັ້ງໂຮງຮຽນພອນສະຫວັນກີລາ-ກາຍຍະກຳ 7 ປີຜ່ານມາ ນັກຮຽນກີລາທີ່ຈົບຈາກນີ້ໄປ ກໍສາມາດສືບຕໍ່ຮຽນສາຍວິຊາຊີບທີ່ວິທະຍາໄລພະລະສຶກສາ ແລະ ຄະນະວິທະຍາສາດການກິລາ-ກາຍຍະກຳ ມະຫາວິທະຍາໄລແຫ່ງຊາດ ຈາກຜົນງານທີ່ກ່າວມານັ້ນ ຫວັງວ່າຈະເປັນແຮງຊຸກດັນໃຫ້ນ້ອງໆທຸກຄົນ ມີກຳລັງໃຈທີ່ດີຕໍ່ການເຂົ້າຮ່ວມສອບເສັງໃນຄັ້ງນີ້ ແລະ ຂໍຮຽກຮ້ອງມາຍັງຄູ-ອາຈານ ຜູ້ນຳພາ ແລະ ພໍ່ແມ່ນັກຮຽນກີລາທຸກຄົນ ຈົ່ງເອົາໃຈໃສ່ໃນການຕິດຕາມ ແລະ ໃຫ້ກຳລັງໃຈເຂົາເຈົ້າ ເພື່ອໃຫ້ປະສົບຜົນສຳເລັດໃນການຮ່ວມຄັດເລືອກໃນຄັ້ງນີ້ ປາກົດຜົນເປັນຈິງ.