ສະຫະພັນບານເຕະອາຊຽນ ຫຼື AFF ຈັດປະຊຸມຄະນະຈັດການແຂ່ງຂັນເຕະບານຊາຍ ຊີງແຊັມອາຊຽນ ຫຼື AFF Suzuki Cup ຄັ້ງທີ 13 ປີ 2020 ທາງວິດີໂອຄອນເຟີເຣນ ໃນທ້າຍເດືອນກໍລະກົດຜ່ານມາ ໂດຍໄດ້ປຶກສາຫາລືເຖິງການຈັດງານດັ່ງກ່າວ ແລະ ມີມະຕິເຫັນດີໃຫ້ເລື່ອນການແຂ່ງຂັນອອກໄປຈັດໃນປີ 2021 ຍ້ອນການລະບາດຂອງພະຍາດໂຄວິດ-19 ເພື່ອຄວາມປອດໄພຂອງທຸກພາກສ່ວນ.
ກ່ອນໜ້ານີ້ມີພຽງປະເທດຫວຽດນາມ ໃນສະມາຊິກອາຊຽນ ບໍ່ເຫັນດີໃຫ້ເລື່ອນການແຂ່ງຂັນ ໂດຍໃຫ້ເຫດຜົນວ່າຕາຕະລາງການແຂ່ງລະດັບທີມຊາດ ປີ 2021 ແມ່ນມີຫຼາຍ ທັງບານໂລກ 2022 ຮອບຄັດເລືອກບານໂລກ ຮຸ່ນອາຍຸບໍ່ເກີນ 17 ປີ ແລະ 20 ປີ ຈະເຮັດໃຫ້ປະຕິທິນການແຂ່ງຂັນຫຼາຍເກີນໄປ.
ສຳລັບການແຂ່ງຂັນເຕະບານຊີງແຊັມອາຊຽນ ເລີ່ມມາໃນປີ1996 ທີມຊາດໄທ ເປັນທີມທີ່ໄດ້ແຊັມລາຍການນີ້ສູງສຸດ 5 ສະໄໝ ຮອງລົງມາສິງກະໂປ 4 ສະໄໝ ຫວຽດນາມ 2 ສະໄໝ ມາເລເຊຍ 1 ສະໄໝ ຄັ້ງລ້າສຸດປີ 2018 ຫວຽດນາມເປັນແຊັມ ຮອບຊີງສາມາດເອົາຊະນະ ມາເລເຊຍ ລວມຜົນສອງນັດ 3-2 ສ່ວນທີມຊາດລາວ ເຂົ້າຮ່ວມຮອບສຸດທ້າຍ 11 ຈາກ 12 ຄັ້ງຫຼັງສຸດ ບໍ່ເຄີຍຜ່ານຮອບແບ່ງກຸ່ມ.