ທ່ານ ກາບຊ້ອນ ສຸວັນນະຣາຊ໌ ເລຂາທິການສະຫະພັນລົດຖີບແຫ່ງຊາດລາວ ແຈ້ງໃຫ້ຊາບວ່າ: ສະຫະພັນລົດຖີບແຫ່ງຊາດລາວ ໄດ້ສົມທົບກັບສູນກາງແນວລາວສ້າງຊາດ (ສນຊ) ຈະໄດ້ຈັດການແຂ່ງຂັນກີລາລົດຖີບປະເພດເສືອໝອບ 3 ຮຸ່ນ ກໍຄື ຮຸ່ນໂອເພັນ ຮຸ່ນອາຍຸ 39 ປີລົງມາ ແລະ ຮຸ່ນອາຍຸ 40 ປີຂຶ້ນໄປ ຊີງຂັນປະທານສູນກາງແນວລາວສ້າງຊາດ ແລະ ຂະບວນຂີ່ລົດຖີບສາມັກຄີເພື່ອສຸຂະພາບຂຶ້ນ ໃນວັນທີ 8 ສິງຫາ 2020 ແນໃສ່ສ້າງຂະບວນການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 70 ປີ ສຳລັບລາຍການແຂ່ງຂັນລົດຖີບ 3 ຮຸ່ນ ໄດ້ກຳນົດເສັ້ນທາງຈຸດປ່ອຍທີ່ເດີ່ນພະທາດຫຼວງ ໄປໂຄ້ງທີ່ປະຕູໄຊ ເມືອງຈັນທະບູລີ ເພື່ອມຸ່ງໜ້າໄປຕາມເສັ້ນທາງ 13 ໃຕ້ ເມືອງໄຊເສດຖາ ແລະ ເມືອງໄຊທານີ ກ່ອນຈະໂຄ້ງເຂົ້າເສັ້ນທາງ 450 ປີ ໄປຕາມເສັ້ນທາງເມືອງໄຊເສດຖາ ຫາເມືອງຫາດຊາຍຟອງ ໄປໂຄ້ງສາມແຍກບ້ານທ່ານາແລ້ງ ເມືອງຫາດຊາຍຟອງ ກັບຄືນເສັ້ນທາງເດີມ ດ້ວຍໄລຍະທາງ 70 ກິໂລແມັດ ທັງ 3 ຮຸ່ນດັ່ງກ່າວ ຄາດວ່າຈະມີນັກກີລາເຂົ້າຮ່ວມຊີງໄຊເຖິງ 100 ກວ່າຄົນ ແລະ ຜູ້ໜຶ່ງຕ້ອງລົງສະໝັກເພື່ອເສຍຄ່າທຳນຽມຜູ້ລະ 1 ແສນກີບ ພ້ອມທັງໄດ້ຮັບເສື້ອຜູ້ລະ 1 ຜືນ ພ້ອມອາຫານເຊົ້າ ແລະ ສວຍ ກຳນົດລົງທະບຽນລະຫວ່າງວັນທີ 31 ກໍລະກົດ ຫາ 5 ສິງຫາ 2020.
ສຳລັບກົດກະຕິກາການແຂ່ງຂັນໃນ 3 ຮຸ່ນດັ່ງກ່າວ ຜູ້ເຂົ້າຮ່ວມແຂ່ງຂັນຕ້ອງໃຊ້ລົດ 2 ລໍ້ ປະເພດລົດກວັກ ຫຼື ເສືອໝອບເທົ່ານັ້ນ ຫ້າມຕິດຕັ້ງແອໂຣບາທຸກຊະນິດ ທຸກຄົນຕ້ອງໃສ່ໝວກກັນກະທົບຕະຫຼອດການແຂ່ງຂັນ ລົດເຊີວິດຂອງແຕ່ລະທີມ (ຖ້າມີ) ໃຫ້ຂັບຢູ່ຫຼັງນັກແຂ່ງ ແລະ ກຳມະການເທົ່ານັ້ນ ຫ້າມໃຫ້ນ້ຳແກ່ນັກກີລາໃນເວລາແຂ່ງຂັນເດັດຂາດ ຜູ້ເຂົ້າຮ່ວມຕ້ອງຕິດປ້າຍ ແລະ ເບີຢູ່ເສື້ອ ແລະ ລົດທຸກຄັນຕ້ອງມີເງື່ອນໄຂອາຍຸຕາມການກຳນົດ ແລະ ນັກກີລາອາຍຸຕ່ຳກວ່າ 18 ປີ ຕ້ອງໄດ້ຮັບຄວາມຍິນຍອມຈາກຜູ້ປົກຄອງ ເນື່ອງຈາກການແຂ່ງຂັນໄດ້ທາງສາທາລະນະທາງຫຼວງ ດັ່ງນັ້ນ ຜູ້ເຂົ້າຮ່ວມແຂ່ງຂັນຕ້ອງປະຕິບັດກົດຈາລະຈອນ ແລະ ລະບຽບການແຂ່ງຂັນໃຫ້ເຂັ້ມງວດ ແລະ ຫ້າມດູດຮຸ່ນແຂ່ງຂັນອື່ນ ແລະ ລົດທຸກຊະນິດ.
ສ່ວນຂະບວນຖີບລົດສາມັກຄີ ລົງທະບຽນຕອນເຊົ້າວັນທີ 8 ສິງຫາ 2020 ຈະໄດ້ຮັບເສື້ອ 1 ຜືນ ພ້ອມກັບອາຫານເຊົ້າ ແລະ ສວຍເຊັ່ນກັນ ຄາດວ່າຈະມີນັກກິລາຖີບລົດສະໝັກຫຼິ້ນເຂົ້າຮ່ວມ 400 ຄົນ ກຳນົດເສັ້ນທາງຈາກຈຸດເລີ່ມຕົ້ນເດີ່ນພະທາດຫຼວງ ຖີບລົດໄປຕາມເສັ້ນທາງບ້ານໂພນສະອາດ ບ້ານສາຍລົມ ແລະ ອອກເລາະເສັ້ນທາງແຄມຂອງໄປອານຸສາວະລີ ເຈົ້າຟ້າງຸ່ມ ແລ້ວໄປໂຄ້ງທີ່ 4 ແຍກວິທະຍາໄລເຕັກນິກ ລາວ-ເຢຍລະມັນ ມຸ່ງໜ້າໄປທາງທາດຂາວ ສີເມືອງ ແລະ ເລາະອອກຕາມເສັ້ນທາງ 3 ແສນໄທ ລ້ຽວຂວາຂຶ້ນທາງປະຕູໄຊ ແລະ ໄປທີ່ຈຸດເດີມ ເດີ່ນພະທາດຫຼວງດ້ວຍໄລຍະທາງ 12 ກິໂລແມັດ.