ຖ້າເວົ້າເຖິງນ້ຳອັ່ງໃນເຂດຕົວເມືອງນະຄອນຫຼວງວຽງຈັນແລ້ວ ກໍຖືໄດ້ວ່າເປັນບັນຫາໃຫຍ່ສຳລັບຊາວນະຄອນຫຼວງວຽງຈັນ ເພາະມັນໄດ້ສົ່ງຜົນກະທົບຕໍ່ການສັນຈອນໄປມາຂອງຍວດຍານພາຫະນະ ແລະ ໃນເວລາທີ່ຮີບດ່ວນຍິ່ງມີຄວາມສຳຄັນ ເພາະເວລານີ້ການສັນຈອນກໍແອອັດຢູ່ແລ້ວ ຍັງບວກກັບນ້ຳອັ່ງເສັ້ນທາງ ຍິ່ງເຮັດໃຫ້ການສັນຈອນແອອັດຂຶ້ນກວ່າເກົ່າ ຢ່າງໃດກໍຕາມ ເມື່ອສະພາບເກີດຂຶ້ນຄືແນວນັ້ນ ເຮົາກໍຕ້ອງໄດ້ປັບຕົວເຂົ້າກັບສະພາບ ກໍຄື ຂັບຂີ່ຍວດຍານພາຫະນະຢ່າງມີສະຕິ ເພື່ອຫຼີກລ່ຽງຜົນເສຍຫາຍທີ່ຈະເກິດຂຶ້ນ.
ດັ່ງນັ້ນ ໃນຄໍລຳຈະລາຈອນມື້ນີ້ ຈຶ່ງມີເຕັກນິກການຂັບຂີ່ຜ່ານຖະໜົນທີ່ມີນ້ຳຂັງຈາກປະເທດເພື່ອນບ້ານມາແລກປ່ຽນ ເພື່ອສາມາດນຳໄປໃຊ້ໃນຊີວິດຕົວຈິງ ເຊິ່ງເຕັກນິກດັ່ງກ່າວນັ້ນປະກອບມີດັ່ງນີ້:
1. ຫຼີກລ່ຽງການຂັບຂີ່ຜ່ານຖະໜົນທີ່ມີນ້ຳຖ້ວມຂັງສູງກວ່າເຄິ່ງໜຶ່ງຂອງຕີນລົດ ແລະ ຜູ້ຂັບຂີ່ຕ້ອງໄດ້ກວດສອບໃຫ້ຮູ້ຢ່າງຄັກແນ່ວ່າ ລົດຂອງຕົນສາມາດຂັບຜ່ານນ້ຳໃນລະດັບສູງເທົ່າໃດ.
2. ຄວນລະມັດລະວັງເປັນພິເສດກັບກະແສນ້ຳທີ່ໄຫຼແຮງ ເຊັ່ນ: ນ້ຳຖ້ວມກະທັນຫັນ ຫຼື ກະແສນ້ຳທີ່ໄຫຼຢ່າງຕໍ່ເນື່ອງ ທີ່ອາດຈະເຮັດໃຫ້ລົດເກີດຄວາມເສຍຫາຍ.
3. ຄວນຢຸດ ແລະ ສັງເກດລົດຄັນອື່ນສາມາດຂັບຜ່ານໄປໄດ້ຢ່າງປອດໄພ ຫຼື ບໍ່ ກ່ອນທີ່ຈະຂັບລົດເຂົ້າໄປໃນພື້ນທີ່ດັ່ງກ່າວ.
4. ເມື່ອຈຳເປັນຕ້ອງຂັບລົດບົນຖະໜົນທີ່ມີນ້ຳຖ້ວມຂັງຕ້ອງປິດແອ ແລະ ເປີດແວ່ນທຸກຄັ້ງ ເພາະການຂັບຂີ່ຜ່ານຖະໜົນທີ່ມີນ້ຳຖ້ວມ ແລ້ວເປີດແອໄປພ້ອມ ອາດຈະເຮັດໃຫ້ລົດມອດ ເນື່ອງຈາດພັດລົມຈະເຮັດວຽກຕະຫຼອດ ແລະ ຈະເຮັດໃຫ້ນ້ຳເຂົ້າເຄື່ອງຈັກ ຖ້າຈັກບໍ່ມອດ ພັດລົມກໍຈະພັດເອົາສິ່ງເສດເຫຼືອຕ່າງໆທີ່ລອຍມາຕາມໜ້ານ້ຳ ເຊິ່ງຈະເຮັດໃຫ້ພັດລົມເສຍຫາຍ ກ້າວໄປສູ່ການເຮັດໃຫ້ຈັກລົດຮ້ອນ.
5. ຕ້ອງໃຫ້ແນ່ໃຈວ່າຖະໜົນທີ່ນ້ຳຖ້ວມຂັງນັ້ນຍັງມີສະພາບດີ ພ້ອມນັ້ນ ກໍຕ້ອງລະມັດລະວັງເມື່ອຂັບຂີ່ໃນຖະໜົນທີ່ທ່ານບໍ່ຄຸ້ນເຄີຍ ເນື່ອງຈາກອາດຈະມີຂຸມເລິກທີ່ລົດບໍ່ສາມາດຜ່ານໄປໄດ້ ແລະ ຄວນຂັບລົດຢູ່ກາງຖະໜົນ ເຊິ່ງເປັນບໍລິເວນທີ່ມີລະດັບນ້ຳຕ່ຳທີ່ສຸດ.
6. ການຂັບຂີ່ໃນຖະໜົນທີ່ມີນ້ຳຖ້ວມຂັງ ຄວາມໄວຕ້ອງບໍ່ເກີນ 3 ກິໂລແມັດຕໍ່ຊົ່ວໂມງ ແລະ ເພີ່ມຄວາມໄວເປັນ 6 ກິໂລແມັດຕໍ່ຊົ່ວໂມງ ເຊິ່ງຈະຊ່ວຍຫຼຸດຜ່ອນຄວາມສ່ຽງທີ່ນ້ຳຈະໄຫຼເຂົ້າສູ່ໝໍ້ກອງອາກາດ ແລະ ສ້າງຄວາມເສຍຫາຍຕໍ່ລະບົບໄຟຟ້າ-ຊິ້ນສ່ວນຕ່າງໆ ຖ້າຂັບໄວກວ່ານີ້ ຈະເຮັດໃຫ້ນ້ຳໄຫຼເຂົ້າເຖິງຈັກລົດໄດ້.
7. ຄວນຂັບເກຍຕ່ຳ ແລະ ຮອບຈັກສູງ ໃຫ້ໃຊ້ເກຍ 1 ຂຶ້ນຢູ່ກັບປະເພດຂອງເກຍ ຮັກສາຄວາມໄວໃຫ້ຄົງທີ່ ແລະ ບໍ່ຄວນຜ່ອນຄວາມໄວ ເພາະອາດຈະເຮັດນ້ຳໄຫຼເຂົ້າທໍ່ຄວັນ ເຊິ່ງຈະສ້າງຄວາມເສຍຫາຍໃຫ້ກັບເຄື່ອງກອງອາຍເສຍ ນອກນີ້ ທ່ານຄວນຄັບລົດດ້ວຍຄວາມໄວຕ່ຳໆ ເພື່ອບໍ່ໃຫ້ກອງອາກາດທີ່ຢູ່ດ້ານໜ້າດູດນ້ຳເຂົ້າໄປໃນເຄື່ອງຈັກ ຖ້ານ້ຳໄຫຼເຂົ້າທໍ່ຄວັນ ຫຼື ເຄື່ອງຈັກ ຈະສ້າງຜົນເສຍຫາຍໃຫ້ກັບຈັກລົດໄດ້.
8. ການຂັບຂີ່ຜ່ານບໍລິເວນທີ່ມີນ້ຳຖ້ວມ ຄວນຮັກສາໄລຍະຫ່າງລົດຄັນໜ້າ ເພື່ອຫຼີກລ່ຽງການຢຸດລົດກະທັນຫັນ ແລະ ຄວນລະມັດລະວັງວ່າມີລົດຂັບຂີ່ມາແຕ່ເສັ້ນທາງອື່ນ ເນື່ອງຈາກຄື້ນນ້ຳອາດຈະຖ້ວມລົດຂອງທ່ານ ໂດຍສະເພາະ ລົດທີ່ມານັ້ນໃຊ້ຄວາມໄວສູງເກີນໄປ.
9. ເມື່ອຂັບລົດອອກຈາກບໍລິເວນທີ່ບໍ່ມີນ້ຳແລ້ວ ກໍຄ່ອຍໆຢຽບເບກ ເພື່ອໃຫ້ນ້ຳອອກຈາກເບກ ຫາກມີຄວາມຄຸ້ນເຄີຍກັບເຕັກນິກນີ້ ຜູ້ຂັບຂີ່ສາມາດໃຊ້ຕີນຊ້າຍຂອງຕົນເອງຢຽບເບກໄດ້ ແລະ ປ່ອຍເມື່ອຮູ້ສຶກວ່າເບຣກຈັບຕົວແລ້ວ ນອກນີ້ ຜູ້ຂັບຂີ່ຄວນຈອດລົດ ແລະ ກວດສອບໃຫ້ແນ່ໃຈວ່າບໍມີສິ່ງເສດເຫຼືອ ເຊັ່ນ: ຖົງປລັສຕິກ ຫຼື ສິ່ງສົກກະປົກອຶ່ນໆຕິດຢູ່ໜ້າລົດ ຫຼື ໝ້ຳນ້ຳລົດ.
10. ຫຼັງຈາກຂັບຂີ່ລົດຜ່ານ້ຳຖ້ວມແລ້ວ ຄວນທຳຄວາມສະອາດລົດເສຍກ່ອນ ໂດຍສະເພາະຊ່ວງລ່າງ ແລະ ຕີນລົດ ກຳຈັດເສດຫຍ້າໃບໄມ້ ແລະ ສິ່ງສົກກະປົກອອກໃຫ້ໝົດ ເພາະອາດຈະເຮັດໃຫ້ເປັນເຊື້ອໄຟໄດ້ ລວມເຖິງຄວນມີນ້ຳມັນເຄື່ອງ ເນື່ອງຈາກນ້ຳມັນອາດຈະຫົ່ວຊຶມເຂົ້າສູ່ລະບົບເຄື່ອງຈັກ ຄວນທຳຄວາມສະອາດພົມປູພື້ນ ເພື່ອບໍ່ໃຫ້ເກີດເຊື້ອລາ ແລະ ຄວນກວດສອບລູກປືນຕີນລົດ.
ນຳສະເໜີໂດຍ: ເມັດຝົນ