ບໍລິສັດ ໂຕໂຢຕາ ລາວ ຈຳກັດ ນໍາສະເໜີລົດກະບະອະເນກປະສົງ Hilux REVO ຮຸ່ນໃໝ່ ພ້ອມຄຳນິຍາມ “ປຸກພະລັງໃນຕົວທ່ານ ສູ່ເປົ້າໝາຍທີ່ເໜືອກວ່າ” ເຊິ່ງເປັນການນໍາສະເໜີລົດຮູບແບບໃໝ່ຜ່ານສື່ອອນລາຍ ຂຶ້ນວັນທີ 31 ກໍລະກົດຜ່ານມາ ຢູ່ຫ້ອງຂາຍ ໂຕໂຢຕາ ສາຂາທົ່ງຂັນຄຳ ນະຄອນຫຼວງວຽງຈັນ.
ທ່ານ ມາຊາອາກິ ຄາວາບາຕະ ຜູ້ອຳນວຍການບໍລິສັດ ໂຕໂຢຕາ ລາວ ຈຳກັດ ກ່າວວ່າ: ຂໍສະແດງຄວາມຊົມເຊີຍຕໍ່ທຸກໆພາກສ່ວນທີ່ກ່ຽວຂ້ອງ ໂດຍສະເພາະລັດຖະບານລາວ ທີ່ມີການນຳພາຢ່າງເດັດດ່ຽວ ພະນັກງານແພດທີ່ເຮັດວຽກປິ່ນປົວ ບັນດາສື່ມວນຊົນສຳລັບການເຜີຍແຜ່ຂໍ້ມູນທີ່ເປັນປະໂຫຍດ-ຖືກຕ້ອງ ແລະ ຄົນລາວທຸກຄົນທີ່ຮ່ວມກັນປະກອບສ່ວນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໄດ້ຢ່າງວ່ອງໄວ ແລະ ມີປະສິດທິຜົນ ປັດຈຸບັນພວກເຮົາຈຳເປັນຕ້ອງໄດ້ລະມັດລະວັງ ເພື່ອຫຼີກລ່ຽງບໍ່ໃຫ້ມີການແຜ່ລະບາດເກີດຂຶ້ນໃໝ່ ບໍລິສັດໂຕໂຢຕາລາວ ຈຶ່ງຕັດສິນໃຈຈັດງານນໍາສະເໜີລົດໂຕໂຢຕ້າ Hilux REVO ຮຸ່ນໃໝ່ຜ່ານສື່ອອນລາຍ ເພື່ອປະຕິບັດຕາມມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ຫຼີກລ່ຽງການຊຸມນຸມ ແລະ ຫຼຸດຜ່ອນຄວາມສ່ຽງລົງໃຫ້ຫຼາຍທີ່ສຸດ.
Hilux REVO ແມ່ນລົດກະບະອະເນກປະສົງ ທີ່ຄອງອັນດັບ 1 ຂອງຕະຫຼາດໃນ ສປປ ລາວ ເປັນເວລາຫຼາຍປີ ແລະ Hilux REVO ຮຸ່ນໃໝ່ນີ້ ແມ່ນມາພ້ອມກັບເຕັກໂນໂລຊີຂອງໂຕໂຢຕາທີ່ເປັນນະວັດຕະກຳໃໝ່ ຮູບຊົງພາຍນອກສະດຸດຕາ ແລະ ການອອກແບບພາຍໃນທີ່ທັນສະໄໝ ແລະ ໂອ່ໂຖງ ທີ່ພ້ອມຈະຕອບສະໜອງຄວາມຕ້ອງການ ແລະ ອຳນວຍຄວາມສະດວກໃຫ້ຊີວິດຂອງຜູ້ຂັບຂີ່ ເຊິ່ງໄດ້ພັດທະນາ 4 ຫົວຂໍ້ສຳຄັນ ໂດຍສະເພາະດ້ານການອອກແບບໃໝ່ໃຫ້ທັນສະໄໝຫຼາຍຂຶ້ນ ດ້ານສະມັດຖະນະການຂັບຂີ່ ດ້ານຄວາມສະດວກສະບາຍ ແລະ ດ້ານຄວາມປອດໄພ ເຊິ່ງຜູ້ທີ່ສົນໃຈສາມາດເຂົ້າເບິ່ງລົດຕົວຈິງ ແລະ ສອບຖາມລາຍລະອຽດຕ່າງໆໄດ້ທີ່ຫ້ອງຂາຍໂຕໂຢຕາທຸກສາຂາທົ່ວປະເທດ.
# ຂ່າວ & ພາບ: ສະບາໄພ