ນັກວິໄຈຈາກຝຣັ່ງ ໂກລົມບີ ແລະ ສະຫະລັດອາເມຣິກາ ໄດ້ພັດທະນາເສັ້ນໄຍທີ່ເຮັດຈາກເຊລຜິວໜັງຂອງມະນຸດຂຶ້ນ ຊຶ່ງເສັ້ນໄຍດັ່ງກ່າວ ອາດຈະຖືກນຳມາຖັກໃຫ້ມີລັກສະນະຄ້າຍຄືກັບເຄື່ອງຖັກຊີວະພາບ ຊຶ່ງຈະນຳໄປໃຊ້ໃນວົງການແພດໃນຮູບຮ່າງຂອງໄໝ ເພື່ອຫຍິບບາດແຜໄດ້.
ໂດຍຂໍ້ດີ ຫຼືປະໂຫຍດຂອງເສັ້ນໄຍທຳມະຊາດ ທີ່ເຮັດຈາກເຊລຜິວໜັງມະນຸດທີ່ວ່ານີ້ ກໍຄືເມື່ອແພດນຳໄປໃຊ້ຫຍິບບາດແຜແລ້ວ ໄໝດັ່ງກ່າວຈະສາມາດລະລາຍຕົວ ແລະ ປະສົມປະສານເຂົ້າເປັນເນື້ອດຽວກັນກັບອະໄວຍະວະຂອງມະນຸດໄດ້ ບໍ່ວ່າອະໄວວະນັ້ນຈະຢູ່ດ້ານນອກຮ່າງກາຍ ຫຼືເປັນອະໄວຍະວະທີ່ຢູ່ພາຍໃນກໍຕາມ.
ເລື່ອງນີ້ນັບວ່າເປັນຂ່າວດີ ເພາະເທົ່າທີ່ຜ່ານມານັ້ນ ການໃຊ້ໄໝສັງເຄາະເພື່ອຫຍິບບາດແຜ ອາດຈະຖືກຕໍ່ຕ້ານ ຫຼືປະຕິເສດໂດຍລະບົບພູມຄຸ້ມກັນຂອງຮ່າງກາຍ ໃນຖານະທີ່ເປັນສິ່ງແປກປອມ.
ຈາກຄຸນລັກສະນະສຳຄັນ ທີ່ບໍ່ເຮັດໃຫ້ເກີດປະຕິກິລິຍາຕໍ່ຕ້ານຈາກລະບົບພູມຄຸ້ມກັນ ໃນຮ່າງກາຍມະນຸດນີ້ ແພດກໍຫວັງວ່າໄໝຫຍິບບາດແຜທີ່ສ້າງຂຶ້ນ ຈາກເຊລຜິວໜັງມະນຸດ ຈະເປັນປະໂຫຍດຢ່າງສູງ ທັງໃນແງ່ຂອງການປົວບາດແຜເທິງຜິວໜັງ ແລະ ການສ້ອມແຊມອະໄວຍະວະສຳຄັນຕ່າງໆທີ່ຢູ່ພາຍໃນ.
ເພາະແພດສາມາດໃຊ້ໄໝຊີວະພາບນີ້ ຖັກແສ່ວໃຫ້ເປັນຮູບຕ່າງໆຕາມທີ່ຕ້ອງການໄດ້ ເຊັ່ນ ເປັນຖົງ ເປັນທໍ່ ຫຼືວ່າເປັນວາວເພື່ອໃຫ້ເໝາະສົມກັບລັກສະນະບັນຫາ ແລະ ການເຮັດວຽກຂອງອະໄວຍະວະຊຶ່ງຕ້ອງການສ້ອມແຊມ.
ການພັດທະນາເສັ້ນໄຍຈາກເຊລຜິວໜັງມະນຸດ ທີ່ສາມາດນຳມາຖັກແສ່ວໃຫ້ເປັນໄໝຫຍິບບາດແຜແບບຊີວະພາບນີ້ ນັບໄດ້ວ່າເປັນຄວາມກ້າວໜ້າຫຼ້າສຸດ ສຳລັບວົງການສັນຍະກຳ ເພາະເມື່ອປີທີ່ຜ່ານມາ ນັກວິທະຍາສາດສາມາດພັດທະນາ “ກາວຊີວະພາບ” ຊະນິດໜຶ່ງໄດ້ສຳເລັດ.
ໂດຍກາວຊີວະພາບນີ້ ຈະເຮັດວຽກໃນຮ່າງກາຍຫຼັງຈາກໄດ້ຮັບການກະຕຸ້ນດ້ວຍແສງ ເພື່ອໃຫ້ເລີ່ມຂະບວນການປິ່ນປົວບາດແຜຕ່າງໆ ບໍ່ວ່າຈະເປັນບາດແຜເກົ່າ ຫຼືບາດແຜໃໝ່ກໍຕາມ.