ທ່ານ ແພງທອງ ບານຈັນທະວົງ ຮອງຫົວໜ້າສູນເລືອດແຫ່ງຊາດ ອົງການກາແດງລາວ ໃຫ້ແຈ້ງໃຫ້ຊາບເມື່ອບໍ່ດົນມານີ້ ວ່າ: ເພື່ອສ້າງຂະບວນການຄຳນັບຮັບຕ້ອນວັນສຳຄັນຕ່າງໆຂອງພັກ ຂອງຊາດ ວັນທີ 27-31 ກໍ ລະກົດ 2020 ສູນເລືອດແຫ່ງຊາດ ອົງການກາແດງລາວ ໄດ້ສົມທົບກັບຫຼາຍສ່ວນຈັດກິດຈະກຳຮັບບໍລິຈາກ ເລືອດເພື່ອຊ່ວຍເຫຼຶອສັງຄົມ ອອກເຄື່ອນໄຫວຮັບບໍລິຈາກເລືອດຮ່ວມກັບການຈັດຕັ້ງຕ່າງໆ
ໂດຍມີຜູ້ເຂົ້າຮ່ວມ 895 ຄົນ ແລະ ບໍລິຈາກເລືອດໄດ້ 494 ຄົນ ໃນນີ້ ມີຄະນະວິທະຍາສາດສັງຄົມ ວິທະຍາສາດ ສິ່ງແວດລ້ອມ ຄະນະກະເສດສາດ ມະຫາວິທະຍາໄລແຫ່ງຊາດ ກອງ ຈ 661 ກອງ ຈ 45 ກອງ ງ 987 587 579 38 35 23 18 14 ກອງ ຄ 51 ແລະ ກອງ ຄ 21 ພະນັກງານເພດໝໍໂຮງໝໍ 103 ໂຮງຮຽນຊົນລະປະທານຊັ້ນສູງ ທ່າງ່ອນ ບໍລິສັດເມໂດລິ ບໍລິສັດຢາມາກິ ບໍລິສັດເວັນເຈີ ແລະ ວິທະຍາໄລລາວທ໋ອບ.
ໂອກາດນີ້ ຄະນະບໍລິຫານສູນເລືອດແຫ່ງຊາດ ກໍໄດ້ສະແດງຄວາມຂອບໃຈມາຍັງການຈັດຕັ້ງທຸກພາກສ່ວນທີ່ປະກອບສ່ວນບໍລິຈາກເລືອດເພື່ອຊ່ວຍຊີວິດເພື່ອນມະນຸດດ້ວຍກັນ ແລະ ຫວັງວ່າຈະໄດ້ຮັບການປະກອບສ່ວນຕື່ມອີກໃນຕໍ່ໜ້າ.
# ຂ່າວ & ພາບ: ບຸນມີ