ສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ I ນະຄອນຫຼວງວຽງຈັນ (ນວ) ນຳໂດຍທ່ານນາງ ພອນເພັດ ບຸບຜາ ຮອງປະທານກຳມາທິການວັດທະນະທຳ-ສັງຄົມສະພາແຫ່ງຊາດ ສະມາຊິກສະພາແຫ່ງຊາດ (ສສຊ) ຊຸດທີ VIII ປະຈຳເຂດເລືອກຕັ້ງທີ I ນວ ທ່ານ ບົວເກດ ພົມມະຈັນ ຮອງຫົວໜ້າພະແນກຍຸຕິທຳ ນວ ສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ I ນວ ທັງເປັນສະມາຊິກສະພາປະຊາຊົນ (ສສ ນວ) ທ່ານ ອຸດອນ ໄຊມົນຕີ ຮອງປະທານສະພາປະຊາຊົນ ນວ ຊຸດທີ I ປະຈຳເມືອງສີສັດຕະນາກ ແລະ ທ່ານນາງ ຄຳແຫວນ ສິງບັນດິດ ຮອງຄະນະກຳມາທິການວັດທະນະທຳ-ສັງຄົມ ແລະ ບັນດາເຜົ່າ ສສ ນວປະຈຳເຂດເລືອກຕັ້ງສີສັດຕະນາກ ລົງພົບປະພະນັກງານຫຼັກແຫຼ່ງເມືອງສີສັດຕະນາກ ຢູ່ຫ້ອງການປົກຄອງເມືອງວັນທີ 24 ກຸມພາ 2020 ມີທ່ານ ບຸນເມກ ວິໄລແສງ ຮອງເຈົ້າເມືອງສີສັດຕະນາກ ພ້ອມດ້ວຍຄະນະໃຫ້ການຕ້ອນຮັບ.
ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນວ ຊຸດທີ I ພ້ອມທັງຮັບຟັງຄຳຄິດເຫັນ ຄຳສະເໜີຂອງພະນັກງານກ່ຽວກັບບັນຫາຂັດຂ້ອງໝອງໃຈຕ່າງໆ ເພື່ອສະເໜີຕໍ່ອຳນາດການປົກຄອງ ແລະ ພາກສ່ວນກ່ຽວຂ້ອງ ເຊິ່ງພາຍຫຼັງໄດ້ຮັບຟັງລາຍງານສະພາບໂດຍລວມຈາກທ່ານຮອງເຈົ້າເມືອງ ສສຊ ແລະ ສສ ນວ ໄດ້ຜັດປ່ຽນກັນນຳສະເໜີຜົນສຳເລັດຂອງກອງປະຊຸມພ້ອມເປີດໂອກາດໃຫ້ບັນດາຜູ້ເຂົ້າຮ່ວມໄດ້ຍົກບັນຫາຄາໃຈຂໍ້ສະເໜີຕ່າງໆຂຶ້ນມາ ເຊິ່ງຜ່ານການລົງພົບປະຊາຊົນພາຍໃນເມືອງຂອງ ສສຊ ແລະ ສສ ນວ ແຕ່ວັນທີ 18-24 ກຸມພາ 2020 ຈຳນວນ 6 ຈຸດ ຄື: ກຸ່ມເພຍວັດ ທາດຂາວ ສວນມອນ ວັດນາກ ທ່າພະລານໄຊ ແລະ ກຸ່ມພັນໝັ້ນ ລວມມີ 28 ບັນຫາທີ່ປະຊາຊົນ ອຳນາດການປົກຄອງໄດ້ນຳສະເໜີ ເຊິ່ງແຕ່ລະບັນຫາກໍນອນໃນບັນຫາທີ່ຕິດພັນກັບເສດຖະກິດ-ສັງຄົມ ເປັນຕົ້ນ ການພັດທະ ນາຊີວິດການເປັນຢູ່ ບັນຫາພື້ນຖານໂຄງລ່າງ ແລະ ປາກົດການຫຍໍ້ທໍ້ໃນສັງຄົມຈຳນວນໜຶ່ງ.
ການລົງພົບປະຄັ້ງນີ້ ສສຊ ແລະ ສສ ນວ ໄດ້ນຳເອົາຂໍ້ຂ້ອງໃຈ ແລະ ບັນຫາທີ່ສັງລວມໄດ້ໃນການລົງພົບປະທີ່ອຳນາດການປົກຄອງ ແລະ ປະຊາຊົນໄດ້ນຳສະເໜີ ເພື່ອນຳມາປຶກສາຫາລືກັບພະນັກງານຫຼັກແຫຼ່ງຫ້ອງການທີ່ກ່ຽວຂ້ອງ ເພື່ອຄົ້ນຄວ້າປຶກສາຫາລືເພື່ອນຳສູ່ການແກ້ໄຂບັນຫາດັ່ງກ່າວ ໃຫ້ເຫັນໄດ້ບັນຫາທາງອອກທີ່ເໝາະສົມ ເພື່ອພ້ອມກັນຊອກຫາວິທີທາງໃນການແກ້ໄຂໃຫ້ຖືກຕ້ອງສອດຄ່ອງ ວ່ອງໄວ ຮັກສາໄດ້ສິດຜົນປະໂຫຍກອັນຊອບທຳຂອງປະຊາຊົນ.