ຈາກອາຍຸຄວາມໃນການທວງ ຫຼື ການຮ້ອງຟ້ອງ ຊຶ່ງກົດໝາຍໄດ້ກຳນົດໃຫ້ຜູ້ເສຍ ຫຼື ຜົນປະໂຫຍດສາມາດນຳໃຊ້ໄດ້ ເພື່ອທວງເອົາ ຫຼື ຮ້ອງຟ້ອງເອົາຕາມໄລຍະເວລາທີ່ກົດໝາຍອະນຸຍາດໃຫ້ ແຕ່ອາຍຸໃນພາກປະຕິບັດຕົວຈິງນັ້ນ ອາຍຸຄວາມຈະເລີ່ມນັບເອົາແຕ່ເວລາໃດ ມື້ໃດ ເດືອນໃດ ແລະ ປີໃດ ເພື່ອບໍ່ໃຫ້ສິດດັ່ງກ່າວສິ້ນສຸດ ໂດຍບໍ່ໄດ້ຮັບຜົນປະໂຫຍດຈາກມັນ ສະນັ້ນ ໃນບົດນີ້ ຜູ້ຂຽນຈະນຳເອົາການນັບອາຍຸຄວາມໃນການທວງເອົາ ຫຼື ຮ້ອງຟ້ອງເອົາມາສະເໜີເພີ່ມເຕີມ ເພື່ອໃຫ້ທຸກທ່ານຮູ້ທີ່ຈະນັບວັນເວລາ ເດືອນ ແລະ ປີ ທີ່ຕົນສາມາດຈະທວງເອົາ ຫຼື ຮ້ອງຟ້ອງເອົາຊັບ ເອົາໜີ້ສິນ ເອົາຄ່າເສຍຫາຍຈາກບຸກຄົນອື່ນ.
ການນັບອາຍຸຄວາມໃນການຮ້ອງຟ້ອງ ໃຫ້ເລີ່ມນັບແຕ່ມື້ທີ່ມີສິດທວງເປັນຕົ້ນໄປ ເຊັ່ນ ວັນຖັດໄປຂອງກຳນົດເວລາໃນສັນຍາໄດ້ສິ້ນສຸດ ຫຼື ເຫດການໃດໜຶ່ງເກີດຂຶ້ນ ເປັນຕົ້ນໄປ ນັບແຕ່ວັນທີທີ່ມີການຄອບຄອງ ຫຼື ຄວາມເສຍຫາຍໄດ້ເກີດຂຶ້ນເປັນຕົ້ນໄປ.
ການນັບອາຍຸຄວາມ ແມ່ນນັບດ້ວຍວັນ ເດືອນ ຫຼື ປີຂອງເຫດການໃດໜຶ່ງ ການເຂົ້າຄອບຄອງ ນຳໃຊ້ ແລະ ຕາມສັນຍາ ເພື່ອຄິດໄລ່ອາຍຸຄວາມຕາມທີ່ໄດ້ກຳນົດໄວ້ໃນກົດໝາຍ.
ເວລາເລີ່ມນັບອາຍຸຄວາມ ຕ້ອງເລີ່ມແຕ່ວັນທີເຫດການໃດໜຶ່ງເກີດຂຶ້ນ ວັນເຂົ້າຄອບຄອງ ຫຼື ນຳໃຊ້ ຫຼື ວັນຖັດໄປຂອງການສິ້ນສຸດສັນຍາ.
ຕົວຢ່າງ: ທ້າວ ຍ ໄດ້ຂັບລົດຍາມມືນເມົາ ໄປຕຳເອົາເຮືອນຂອງທ້າວ ອ ຢູ່ແຄມທາງ ໃນວັນທີ 1 ມັງກອນ 2003 ແລະ ໄດ້ຕົກລົງກັນໃຫ້ ອ ສ້ອມແປງເຮືອນເອງກ່ອນ ໝົດເທົ່າໃດ ທ້າວ ຍ ຈະແທນໃຫ້ ສະນັ້ນ ອາຍຸຄວາມໃນການຮ້ອງຟ້ອງແມ່ນເລີ່ມນັບແຕ່ວັນເກີດເຫດເປັນຕົ້ນໄປ.
ເວລາສິ້ນສຸດອາຍຸຄວາມ ແມ່ນວັນ ເດືອນ ປີ ທີ່ຄົບກຳນົດອາຍຸຄວາມຕາມທີ່ໄດ້ກຳນົດໄວ້ໃນກົດໝາຍຂອງເຫດການທີ່ເກີດຂຶ້ນ ວັນເຂົ້າຄອບຄອງ ນຳໃຊ້ ແລະ ຕາມສັນຍາ.
ຕົວຢ່າງ: ນາງ ປາ ໄດ້ຊື້ຄວາຍຈາກທ້າວ ແມວ ໃນມູນຄ່າ 5.000.000 ກີບ ຊຶ່ງນາງ ປາ ໄດ້ຈ່າຍຄ່າຄວາຍ ຈຳນວນ 3.000.000 ກີບ ຍັງຄ້າງ 2.000.000 ກີບ ແລະ ໄດ້ເຮັດສັນຍານຳກັນວ່າ ວັນທີ 30 ກັນຍາ 2013 ຈະມາຈ່າຍໃຫ້ຄົບ ເມື່ອຮອດກຳນົດເວລາທີ່ໄດ້ຕົກລົງກັນ ນາງ ປາ ບໍ່ໄດ້ນຳເງິນມາຊຳລະໃຫ້ທ້າວ ແມວ ສະນັ້ນ ການຄິດໄລ່ອາຍຸຄວາມໃນການຮ້ອງຟ້ອງ ແມ່ນໃຫ້ເລີ່ມຄິດໄລ່ແຕ່ວັນທີ 1 ຕຸລາ 2013 ເປັນຕົ້ນໄປ ຈົນຮອດວັນທີ 1 ຕຸລາ 2016.
ອາຍຸຄວາມໃນການຮ້ອງຟ້ອງ ໃນກໍລະນີອາຍຸຄວາມຖືກໂຈະນັ້ນ ໃຫ້ເລີ່ມນັບແຕ່ມື້ທີ່ເຫດການນັ້ນໄດ້ສິ້ນສຸດ ໃນກໍລະນີເຫດການສຸດວິໄສ ຫຼື ເຫດບັງເອີນ ແລະ ຈະຖືກຢຸດ ສະຫງັກ ເມື່ອມີການທວງ ຫຼື ຮ້ອງຟ້ອງຂອງເຈົ້າກຳມະສິດ.
ໂດຍ: ໄມ້ງັດ