ເພື່ອເສີມຂະຫຍາຍໝາກຜົນທີ່ຍາດມາໄດ້ໃນຊຸມປີຜ່ານມາ ແກ້ໄຂຈຸດອ່ອນ ຂໍ້ຄົງຄ້າງ ຮັບມືກັບການທ້າທາຍທົດສອບໃໝ່ ເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ 5-6 ຂອງພັກ ມະຕິກອງປະຊຸມໃຫຍ່ ຄັ້ງທີ 6-7 ຂອງອົງຄະນະພັກນະຄອນຫຼວງວຽງຈັນ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8-9 ໃຫ້ປາກົດເປັນຈິງ ຄະນະພັກຮາກຖານພະແນກສຶກສາທິການ ແລະ ກີລາ ນະຄອນຫຼວງວຽງຈັນ ຈຶ່ງໄດ້ກຳນົດທິດທາງ ຄາດໝາຍ ແລະ ໜ້າທີ່ ຈຸດສຸມໃນສຸມປີຕໍ່ໜ້າ ເພື່ອເປັນທິດທາງໃນການຈັດຕັ້ງປະຕິບັດໃຫ້ໄດ້ຮັບໝາກຜົນ.
ສຳລັບທິດທາງພັດທະນາການສຶກສາ ບົນພື້ນຖານຜັນຂະຫຍາຍວິໄສທັດ ຍຸດທະສາດ ແລະ ຄາດໝາຍໃນການພັດທະນານະຄອນຫຼວງວຽງຈັນໃນໄລຍະໃໝ່ ເຊິ່ງພົນລະເມືອງຂອງນະຄອນຫຼວງວຽງຈັນທຸກຄົນ ໄດ້ເຂົ້າເຖິງການສຶກສາຢ່າງເທົ່າທຽມກັນ ພ້ອມກັນນັ້ນ ໃຫ້ການສຶກສາມີຄຸນນະພາບໃກ້ຄຽງກັບບັນດາປະຊາກອນຂອງປະເທດອາຊຽນ ແລະ ສາກົນ ເພື່ອໃຫ້ເຂົາເຈົ້າໄດ້ພັດທະນາຕົນເອງ ກາຍເປັນພົນລະເມືອງດີຂອງຊາດ ມີຄຸນສົມບັດ ລະບຽບວິໃນ ມີສຸຂະພາບດີ ເປັນຄົນເກ່ງ ມີຄຸນນະພາບ ມີຄວາມເປັນອາຊີບໃນການພັດທະນາຕົນເອງ ແລະ ປະເທດຊາດ ຫຼຸດຜ່ອນຄວາມແຕກໂຕນລະຫວ່າງຕົວເມືອງ ແລະ ຊານເມືອງ.
ພັດທະນາຊັບພະຍາກອນມະນຸດໃຫ້ໄປຕາມ 3 ທັດສະນະ ແລະ 5 ຫຼັກມູນຂອງການສຶກສາ ພ້ອມທັງຮັບປະກັນໃຫ້ມີທັດສະນະ ແລະ ຄວາມຮູ້ ຄວາມສາມາດ ນຳໃຊ້ວິທະຍາສາດ ເຕັກໂນໂລຊີ ຂໍ້ມູນຂ່າວສານ ແລະ ພາສາສາກົນຢ່າງເປັນຮູບປະທຳ ພັດທະນາການສຶກສາ ແລະ ກີລາ ໃຫ້ກາຍເປັນວຽກງານໃຈກາງຂອງການພັດທະນາຊັບພະຍາກອນມະນຸດ ໃຫ້ຂະຫຍາຍຕົວຮອບດ້ານ ມີຄຸນນະພາບດີ ແລະ ໂອກາດຮຽນຮູ້ຕະຫຼອດຊີວິດ ເພື່ອພັດທະນາເສດຖະກິດ-ສັງຄົມໃຫ້ຍືນຍົງ.
ສຳລັບຄາດໝາຍໃນການພັດທະນາການສຶກສາແຕ່ນີ້ຮອດປີ 2025 ແມ່ນໄດ້ສຸມໃສ່ການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃນແຕ່ລະປີໃຫ້ໄດ້ 85% ຂອງຈຳນວນໜ່ວຍພັກ ສືບຕໍ່ຈັດຕັ້ງແຜນຍຸດທະສາດການສຶກສາແຫ່ງຊາດ ເອົາໃຈໃສ່ພັດທະນາຄູໃຫ້ມີຄວາມເຂັ້ມແຂງຮອບດ້ານ ຊຸກຍູ້ສົ່ງເສີມໃຫ້ເປັນຄູປະສົບການໃຫ້ໄດ້ 10 ຄົນ ຄູຊຳນານງານ 4 ຄົນ ແລະ ຄູຊ່ຽວຊານບໍ່ໃຫ້ຫຼຸດ 1 ຄົນ ສ້າງກຸ່ມໂຮງຮຽນມັດທະຍົມໃຫ້ສຳເລັດ 100% ພ້ອມຈັດສັນຄູບູລິມະສິດອາສາໃຫ້ໄປຕາມນິຕິກຳຂອງກະຊວງສຶກສາທິການ ແລະ ກີລາ ພົນລະເມືອງລາວເກນອາຍຸຮຽນທຸກຄົນ ໃຫ້ມີລະດັບການສຶກສາຈົບຊັ້ນມັດທະຍົມປາຍ ມີລະດັບພາສາສາກົນຢ່າງໜ້ອຍ 1 ພາສາ ອັດຕາການເຂົ້າຮຽນຂອງເດັກ 5 ປີ ໃຫ້ໄດ້ 98% ສູງກວ່າ 5 ປີ ໃຫ້ໄດ້ 92% ໃນ 8 ເມືອງ ອັດຕາເຂົ້າຮຽນສຸດທິຊັ້ນປະຖົມໃຫ້ໄດ້ 100% ອັດຕາປະລະການຮຽນຂອງນັກຮຽນຂັ້ນ ປ1 ໃຫ້ຫຼຸດລົງ 2,5% ຄ້າງຫ້ອງຫຼຸດລົງ 3% ອັດຕາປະລະຊັ້ນປະຖົມໃນລະດັບ 1% ອັດຕາຄ້າງຫ້ອງ 1,5% ລອດເຫຼືອ ປ5 ໃຫ້ໄດ້ 94,5% ອັດຕາເຂົ້າຮຽນໃຫ້ໄດ້ 100% ອັດຕາເຂົ້າຮຽນຊັ້ນມັດທະຍົມຕົ້ນ 99% ອັດຕາເຂົ້າຮຽນລວມໃໝ່ຊັ້ນ ມ4 ຂອງນັກຮຽນຍິງສູງກວ່າ 92% ໃຫ້ໄດ້ 9 ເມືອງ ອັດຕາປະລະໃຫ້ຕ່ຳກວ່າ 2% ອັດຕາເຂົ້າຮຽນຊັ້ນ ມປາຍ ໃຫ້ໄດ້ 86,5% ອັດຕາປະລະໃຫ້ຕ່ຳກວ່າ 3,5% ພົນລະເມືອງລາວ ໃນເກນອາຍຸເຂົ້າຮຽນຈົບຊັ້ນມັດທະຍົມປາຍ ໄດ້ຮຽນພາສາສາກົນ ນັບແຕ່ ປ3 ຂຶ້ນໄປ ແລະ 60% ຂອງນັກຮຽນມັດທະຍົມ ໄດ້ຮຽນຄອມພີວເຕີ ສ່ວນລົບລ້າງຄວາມບໍ່ຮູ້ໜັງສື ອາຍຸ 15-40 ປີ ໃຫ້ສູງກວ່າ 2.000 ຄົນ ບຳລຸງຍົກລະດັບມັດທະຍົມຕົ້ນ ໃນເກນອາຍຸ 15-35 ປີ ຜູ້ປະລະການຮຽນ ແລະ ຍົກຍ້າຍເຂົ້າມາໃໝ່ໃຫ້ໄດ້ 3.000 ຄົນ ມັດທະຍົມປາຍ ໃຫ້ໄດ້ 2.000 ຄົນ ແລະ ປະຊາກອນໃນນະຄອນຫຼວງ ຫັນມາຫຼີ້ນກີລາ ແລະ ອອກກຳລັງກາຍໃຫ້ໄດ້ 40% ຂອງຈຳນວນພົນລະເມືອງ ສູ້ຊົນຮັກສາມູນເຊື້ອເຈົ້າຫຼຽນຄຳ ໃນການແຂ່ງຂັນກີລາແຫ່ງຊາດ ແລະ ກີລານັກຮຽນທົ່ວປະເທດ.
ນຳສະເໜີໂດຍ: ແວ່ນຂາວ