ນະຄອນປາກເຊ ໄດ້ຮັບເອົາວິທີການໃນການຄຸ້ມຄອງ ແລະ ບຳບັດນ້ຳເປື້ອນ ແລະ ກຳນົດເອົາ 4 ຂົງເຂດໃນການຈັດຕັ້ງປະຕິບັດໂຄງການທົດລອງການຄຸ້ມຄອງ ແລະ ບຳບັດນ້ຳເປື້ອນແບບບໍ່ລວມສູນ (DEWATS) ພາຍໃຕ້ໂຄງການປັບປຸງສິ່ງແວດລ້ອມໃນຕົວເມືອງໃນຂອງອົງການ KOICA-GGGI ຜ່ານທຶນຊ່ວຍເຫຼືອຈາກອົງການ KOICA ອົງການ GGGI ກຳລັງຈັດຕັ້ງປະຕິບັດໂຄງການປັບປຸງສິ່ງແວດລ້ອມໃນຕົວເມືອງໃນ ສປປ ລາວ.
ໂຄງການນີ້ແມ່ນມີເປົ້າໝາຍໃນການພັດທະນາ ຂະແໜງການສຸຂາພິບານພາຍໃນປະເທດ ແລະ ສະໜັບສະໜູນລັດຖະບານ ສປປ ລາວ ໃນການປັບປຸງລະບົບການຄຸ້ມຄອງບໍລິການສຸຂາພິບານ ແລະ ນ້ຳເປື້ອນໃນຫຼາຍຕົວເມືອງໃນ ສປປ ລາວ.
ໃນຕົ້ນເດືອນກໍລະກົດ 2020 ຜ່ານມາ ກົມນ້ຳປະປາ ກະຊວງໂຍທາທິການ ແລະ ຂົນສົ່ງ ສົມທົບກັບພະແນກໂຍທາທິການ ແລະ ຂົນສົ່ງ ແຂວງຈຳປາສັກ ແລະ ນະຄອນປາກເຊ ອົງການ KOICA ແລະ ສະຖາບັນເຕີບໂຕສີຂຽວສາກົນ (Global Green Growth Institute – GGGI) ໄດ້ຈັດກອງປະຊຸມຄັ້ງປະຖົມມະລຶກ ຂອງຄະນະຊີ້ນຳໂຄງການຂັ້ນແຂວງ (PPSC) ແລະ ຄົ້ນຄວ້າປຶກສາຫາລືກ່ຽວກັບການຈັດຕັ້ງປະຕິບັດໂຄງການທົດລອງການຄຸ້ມຄອງ ແລະ ບຳບັດນ້ຳເປື້ອນແບບບໍ່ລວມສູນ (DEWATS) ຢູ່ນະຄອນປາກເຊ ແຂວງຈຳປາສັກ ໃນກອງປະຊຸມໄດ້ຮັບເອົາວິທີການດັ່ງກ່າວໃນການຄຸ້ມຄອງ ແລະ ບຳບັດນ້ຳເປື້ອນໃນນະຄອນປາກເຊ ແລະ ກຳນົດເອົາ 4 ແຫ່ງເພື່ອພັດທະນາລະບົບການຄຸ້ມຄອງ ແລະ ບຳບັດນ້ຳເປື້ອນແບບບໍ່ລວມສູນ (DEWATS).
ໂຄງການດັ່ງກ່າວ ຈະສ້າງລະບົບການຄຸ້ມຄອງ ແລະ ບຳບັດນ້ຳເປື້ອນແບບບໍ່ລວມສູນໃນ 4 ແຫ່ງ ເຊິ່ງໂຄງການນີ້ ຈະເກີດຜົນປະໂຫຍດໃຫ້ແກ່ປະຊາຊົນຈຳນວນ ປະມານ 9.500 ຄົນ ຜ່ານການເຂົ້າເຖິງລະບົບທໍ່ນ້ຳເສຍ ນອກຈາກນີ້ ໂຄງການຍັງມີເປົ້າໝາຍໃນການສ້າງສະໜາມບຳບັດນ້ຳເປື້ອນຈາກຂຸມອາຈົມ ເພື່ອຮອງຮັບນະຄອນປາກເຊ ຈະເຮັດໃຫ້ນະຄອນປາກເຊເປັນຕົວເມືອງທຳອິດໃນ ສປປ ລາວ ທີ່ຈັດຕັ້ງປະຕິບັດລະບົບການຄຸ້ມຄອງ ແລະ ບຳບັດນ້ຳເປື້ອນແບບບໍ່ລວມສູນ (DEWATS) ໃນລະດັບໃຫຍ່ ແລະ ມີຍຸດທະສາດດ້ານສຸຂະອານະໄມໃນລະດັບຕົວເມືອງທີ່ຄົບຖ້ວນ ທີ່ຈະເຮັດໃຫ້ນະຄອນປາກເຊ ເປັນນະຄອນທີ່ມີສຸຂະອະນະໄມສະອາດ ແລະ ເປັນມິດຕໍ່ສິ່ງແວດລ້ອມ.