ການແຂ່ງຂັນນັດອຸ່ນເຄື່ອງຄັ້ງນີ້ ຈັດຂຶ້ນວັນທີ 29 ກໍລະກົດ 2020 ຢູ່ສະຫນາມກີລາແຫ່ງຊາດ (ຫຼັກ 16) ສະໜາມນອກ ເພື່ອກຽມຄວາມພ້ອມໃຫ້ແກ່ທັງສອງທີມດັ່ງກ່າວ ເຂົ້າຮ່ວມແຂ່ງຂັນ ຄອມມານໂດລາວລີກ 2 ແລະ ບານເຕະຊາຍຮຸ່ນອາຍຸບໍ່ເກີນ 19 ປີ ຊີງແຊັມອາຊີ 2020 ທີ່ປະເທດອູສະເບັກກິດສະຖານ ໃນນັດນີ້ ທ່ານ ຊູນດຣາມ ມູທຣີ ຫົວໜ້າຄູເຝິກ ຢູ-19 ລາວ ຊາວສິງກະໂປ ໄດ້ສົ່ງຜູ້ຫຼິ້ນຕົວຫຼັກລົງສະໜາມຫຼາຍຄົນ ຍົກເວັ້ນ 1 ຕຳແໜ່ງປີກຊ້າຍ ສົ່ງ ສິນນະກອນ ກູມະນີຄຳ ນັກເຕະມາຈາກແຂວງຫຼວງພະບາງ ລົງສະຫນາມເປັນຕົວຈິງ.
ຜ່ານການແຂ່ງຂັນຜົນປາກົດວ່າ: ຢູ-19 ລາວ ສາມາດຮັກສາຟອມເກັ່ງໄລ່ເອົາຊະນະ ເຄວສ ຢູໄນເຕັດ 2-0 ໂດຍໄດ້ປະຕູໄຊຈາກ ທ້າວ ກ້ວຍເຈັງ ໜູພັກດີ ແລະ ທ້າວ ອາຄົມ ທໍລະນີນ ແນວໃດກໍຕາມ ກ່ອນເກມດັ່ງກ່າວ ຢູ-19 ລາວ ໄດ້ລົງສະໜາມອຸ່ນເຄື່ອງໄລ່ເອົາຊະນະເມືອງຫາດຢູໄນເຕັດ 3-2 ປະຕູ ແລະ ນັດຕໍ່ໄປ ຍັງຈະມີການລົງສະໜາມອຸ່ນເຄື່ອງທຸກວັນພຸດກັບບັນດາສະໂມສອນ ໃນລາຍການ ຄອມມານໂດລາວລີກ 2 ອີກ 2 ນັດ ແລະ ເປບຊີ ລາວລີກ 1 ຈຳນວນໜຶ່ງ ເພື່ອເປັນການທົດສອບສະມັດຖະພາບຂອງນັກກີລາ ກ່ອນເຂົ້າຮ່ວມຊີງແຊັມອາຊີ 2020 ທີ່ປະເທດອູສະເບັກກິດສະຖານ.
ສຳລັບທັບນັກເຕະທີມຊາດລາວຮຸ່ນອາຍຸບໍ່ເກີນ 19 ປີ ໄດ້ເລີ່ມເຝິກຊ້ອມນັບແຕ່ຕົ້ນເດືອນມິຖຸນາເປັນຕົ້ນມາ ແລະ ຕົ້ນເດືອນກໍລະກົດ ມີນັກກີລາຕ່າງແຂວງທີ່ມາຈາກຫຼາຍແຂວງທີ່ຖືກຄັດເລືອກ ເຊັ່ນ: ແຂວງຈຳປາສັກ ອັດຕະປື ເຊກອງ ສະຫວັນນະເຂດ ບໍລິຄຳໄຊ ວຽງຈັນ ຫຼວງພະບາງ ແລະ ແຂວງບໍ່ແກ້ວ ໄດ້ມາເຂົ້າສູນເກັບຕົວເຝິກຊ້ອມຢູ່ທີ່ສູນເຝິກສະໜາມກີລາແຫ່ງຊາດ (ຫຼັກ 16) ປັດຈຸບັນ ມີນັກກີລາທັງໝົດ 45 ຄົນ ໂດຍທາງດ້ານຄູເຝິກຈະໄດ້ຕັດຕົວນັກກີລາອອກເປັນແຕ່ໄລຍະ ເພື່ອເລືອກເອົາແຕ່ລະຕຳແໜ່ງທີ່ດີທີ່ສຸດ 23 ຄົນ ເພື່ອເຂົ້າຮ່ວມລາຍການນີ້ຈັດຂຶ້ນວັນທີ 14-31 ຕຸລາ 2020.
ລາຍການນີ້ມີທັງໝົດ 16 ທີມເຂົ້າຮ່ວມ ແບ່ງອອກເປັນ 4 ກຸ່ມຄື: ກຸ່ມ A ມີ ອູສະເບັກກິດສະຖານ ເຈົ້າພາບ ອິນໂດເນເຊຍ ກຳປູເຈຍ ແລະ ອີຣານ ກຸ່ມ B ມີ ສ ເກົາຫຼີ ຍີ່ປຸ່ນ ອີຣັກ ແລະ ບາເຣນ ກຸ່ມ C ມີ ຊາອຸດິ ອາຣັບເບຍ ອົດສະຕຣາລີ ຫວຽດນາມ ແລະ ລາວ ກຸ່ມ D ມີ ກາຕາ ທາຈິກິດສະຖານ ມາເລເຊຍ ແລະ ເຢເມນ ຢ່າງໃດກໍຕາມທີມທີ່ໄດ້ອັນດັບ 1-4 ແມ່ນຈະໄດ້ສິດເຂົ້າຮ່ວມການແຂ່ງຂັນບານເຕະຊາຍ ຮຸ່ນອາຍຸບໍ່ເກີນ 20 ປີ ຊີງແຊັມໂລກ 2021 ຫຼື “FIFA U-20 World Cup Indonesia 2021” ທີ່ປະເທດອິນໂດເນເຊຍເປັນເຈົ້າພາບປີ 2021.