ເພື່ອສືບຕໍ່ແກ້ໄຂສະພາບການສັນຈອນໃນນະຄອນຫຼວງວຽງຈັນ ພະແນກຕຳຫຼວດຈະລາຈອນ ປກສ ນະຄອນຫຼວງວຽງຈັນ ຈຶ່ງໄດ້ວາງແຜນແກ້ໄຂບັນຫາດັ່ງກ່າວໃນ 6 ເດືອນທ້າຍປີ 2020 ສຸມໃສ່ແກ້ໄຂການສັນຈອນແອອັດ ໄປຄຽງຄູ່ກັບແກ້ໄຂບັນຫາອຸບັດເຫດ.
ພັທ ເພັງສະຫວັນ ທຳມາບູນ ຫົວໜ້າພະແນກຕຳຫຼວດຈະລາຈອນ ປກສ ນວ ກ່າວວ່າ: ເພື່ອຮັບມືກັບສະພາບດັ່ງກ່າວນີ້ ພະແນກຕຳຫຼວດຈະລາຈອນນະຄອນຫຼວງວຽງຈັນ ຈະຍົກສູງລະດັບໃຫ້ມີປະສິດທິພາບຂຶ້ນກວ່າເກົ່າ ເພື່ອແກ້ໄຂສະພາບຈະລາຈອນແອອັດ ແລະ ອຸບັດເຫດ ທັງນີ້ກໍເພື່ອເຮັດໃຫ້ໃນຊົ່ວໂມງເຂົ້າການເລີກການມີຄວາມຄ່ອງຕົວດີ ແລະ ອຸບັດເຫດຫຼຸດລົງ ຄຽງຄູ່ກັບການຈັດລະບຽບຕາມສາຍທາງ 21 ເສັ້ນທົ່ວນະຄອນຫຼວງວຽງຈັນ.
ສຳລັບການແກ້ໄຂຈະລາຈອນແອອັດ ແມ່ນສືບຕໍ່ໂຄສະນາປູກຈິດສຳນຶກໃຫ້ແກ່ຜູ້ໃຊ້ລົດ-ໃຊ້ຖະໜົນ ຮັບຮູ້ເຂົ້າໃຈກົດລະບຽບຈະລາຈອນກົດໝາຍຂົນສົ່ງທາງບົກ ຜ່ານໂທລະພາບ ໜັງສືພິມ ວິທະຍຸ ແລະ ຜົນເສຍຫາຍຈາກການເກີດອຸບັດເຫດ ປະສານສົມທົບແຕ່ລະພາກສ່ວນໃນການຂັບຂີ່ປອດໄພ ຈັດສັນຄວາມບໍ່ເປັນລະບຽບຮຽບຮ້ອຍຕາມສາຍທາງຫຼັກເຂດຊຸມຊົນ ແກ້ໄຂລົດຈອດຊະຊາຍແຄມທາງ ຂາຍເຄື່ອງໃສ່ທາງຍ່າງ ແລະ ຄວບຄຸມຄວາມໄວ ຮັບປະກັນໃຫ້ການເປີດທາງ ປ້ອງກັນແຂກທັງພາຍໃນ ແລະ ຕ່າງປະເທດໃຫ້ມີຄວາມສະຫງົບປອດໄພ ພ້ອມທັງຕິດຕາມການຈະລາຈອນຂອບເຂດຄວາມຮັບຜິດຊອບຂອງຕົນ ຈັດລະບຽບຖະໜົນລ້ານຊ້າງ ປ້ອມຊົ່ວຄາວໃຫ້ໄດ້ 16 ຊົ່ວໂມງ ປ້ອມຖາວອນໃຫ້ໄດ້ 24 ຊົ່ວໂມງ ເພື່ອແກ້ໄຂຈະລາຈອນແອອັດໃນໂມງໄປການ-ເລີກການ ບໍ່ໃຫ້ມີລົດຕິດອັງອໍຕາມສາຍທາງຕ່າງໆ ຄຽງຄູ່ກັບການເຮັດໜ້າທີ່ຕິດຕາມສະພາບການຕ່າງໆ ຮັບແຈ້ງສະພາບແກ້ໄຂການເກີດອຸບັດເຫດເພື່ອບໍ່ໃຫ້ລົດຕິດ.
ຕໍ່ກັບວຽກງານແກ້ໄຂບັນຫາອຸບັດເຫດ ແມ່ນເຮັດໜ້າທີ່ປະຈຳການຄອຍເຫດ ກວດກາທາດເຫຼົ້າ ບັນທຸກເກີນ ລົງສະຖານທີ່ເກີດເຫດໃຫ້ທັນສະພາບການທີ່ເກີດຂຶ້ນ ຊີ້ນຳພະນັກງານນັກຮົບມີຄວາມບໍລິສຸດຊື່ສັດ ໃນການດຳເນີນຄະດີອຸບັດເຫດໃຫ້ຮັບປະກັນໄດ້ດ້ານການເມືອງ ດ້ານກົດໝາຍ ແລະ ດ້ານວິຊາສະເພາະ ພ້ອມທັງສືບຕໍ່ປະສານສົມທົບກັບພາກສ່ວນກ່ຽວຂ້ອງ ເປັນຕົ້ນກົມຕຳຫຼວດຈະລາຈອນ ໄອຍະການປະຊາຊົນນະຄອນຫຼວງ ແລະ ບັນດາຈະລາຈອນເມືອງເພື່ອຄວາມເອກະພາບໃນການດຳເນີດຄະດີ ພ້ອມທັງເປັນເຈົ້າການໃນການພົວພັນກັບກອງຄຸ້ມຄອງພາຫະນະ ໃນການຄຸ້ມຄອງພາຫະນະເພີ່ມ ຫຼື ຫຼຸດ ນອກຈາກນີ້ ທັງຈະໄດ້ສຸມໃສ່ໃນການຄຸ້ມຄອງສູນເຕັກນິກໃຫ້ຮັບປະກັນ ໃນການກວດກາເຕັກນິກຂອງພາຫະນະ ວາງລາຄາ ຮັບແຈ້ງເສຍຫາຍ ແລະ ດຳເນີນຄະດີ ສືບຕໍ່ສ້າງຖານຂໍ້ມູນພາຫະນະ ຖານຂໍ້ມູນຜູ້ລະເມີດກົດຈະລາຈອນ ແລະ ຖານຂໍ້ມູນອຸບັດເຫດ ເພື່ອໃຊ້ວິຊາສະເພາະ ແລະ ສຶກສາອົບຮົມນັກຂັບຂີ່.