ວັນທີ 29 ກໍລະກົດ 2020 ທີ່ພາກວິຊາສັງຄົມສົງເຄາະ ແລະ ການພັດທະນາ ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ (ຄສຄ ມຊ) ໄດ້ມີພິທີມອບເຄື່ອງຊ່ວຍເຫຼືອບັນເທົາທຸກໃຫ້ປະຊາຊົນຄອບຄົວທຸກຍາກຂອງເມືອງໝື່ນ ແຂວງວຽງຈັນ ພາຍໃຕ້ຫົວຂໍ້ ໜຶ່ງນ້ຳໃຈ ຫຼາຍຮ້ອຍຍິ້ມ ໜຶ່ງການໃຫ້ ຫຼາຍກວ່າຄວາມສຸກ ກ່າວມອບໂດຍທ່ານ ສີສະຫວາດ ໂສມມະລັດ ວ່າການຫົວໜ້າພາກວິຊາສັງຄົມສົງເຄາະ ແລະ ການພັດທະນາ ແລະ ກ່າວຮັບໂດຍທ່ານ ພອນເທີດ ສຸວັດດີ ຮອງເລຂາພັກເມືອງໝື່ນ ມີຮອງຫົວ ໜ້າຫ້ອງວ່າການປົກຄອງເມືອງ ພະນັກງານ ຄູ-ອາຈານ ແລະ ນັກສຶກສາເຂົ້າຮ່ວມ.
ການຊ່ວຍເຫຼືອດັ່ງກ່າວ ແມ່ນກິດຈະກຳໜຶ່ງທີ່ນອນຢູ່ໃນການເຝິກປະຕິບັດຕົວຈິງ ຂອງວິຊາລະດົມທຶນເພື່ອຊ່ວຍເຫຼືອສັງຄົມຂອງນັກສຶກສາປີ 4 ໃນສາຂາສັງຄົມສົງເຄາະ ແລະ ການພັດທະນາ ເຊິ່ງມີຄວາມສຳຄັນຕໍ່ການເຝິກໃຫ້ນັກສຶກສາທຸກຄົນໃນສາຂາດັ່ງກ່າວໄດ້ນຳມາຊ່ວຍເຫຼືອເຊິ່ງກັນ ແລະກັນ ໃນເວລາພົບຄວາມຫຍຸ້ງຍາກ ແລະ ຂັດສົນ ຫຼື ໄດ້ຮັບຜົນກະທົບຈາກໄພພິບັດຕ່າງໆ ສ້າງໃຫ້ນັກສຶກສາຮູ້ຊອກຫາແຫຼ່ງທຶນ ລະດົມທຶນ ເພື່ອຊ່ວຍເຫຼືອປະຊາຊົນທີ່ມີຄວາມທຸກຍາກຂາດເຂີນ ເຊິ່ງປີນີ້ ນັກສຶກສາພາກວິຊາສັງຄົມສົງເຄາະ ແລະ ການພັດທະນາໄດ້ນຳເອົາເຄື່ອງຊ່ວຍເຫຼືອ ທີ່ໄດ້ຈາກການລະດົມທຶນຫຼາຍພາກສ່ວນເຊັ່ນ: ການເປີດບູດຮັບບໍລິຈາກຂອງນັກສຶກສາ ຂາຍເຄື່ອງເພື່ອລະດົມທຶນ ໄດ້ຮັບການຊ່ວຍເຫຼືອຈາກກະຊວງສາທາລະນະສຸກ ປະຊາຊົນ ແລະ ຄູ-ອາຈານ ຜູ້ທີ່ມີຈິດໃຈເອື້ອເຟື້ອເຜື່ອແຜ່ໃນການຊ່ວຍເຫຼືອສັງຄົມ ເຄື່ອງທີ່ນຳມາມອບໃຫ້ປະຊາຊົນຄັ້ງນີ້ ມີເຄື່ອງນຸ່ງຫົ່ມ 75 ແກັດ 9 ກະເປົາ ແລະ ເຄື່ອງກີລາ 12 ຊຸດ ລວມມູນຄ່າທັງໝົດ 24.756.000 ກີບ.
ໂອກາດນີ້ ທ່ານ ພອນເທີດ ສຸວັດດີ ໄດ້ກ່າວສະແດງຂອບໃຈຄະນະນຳ ຄູ-ອາຈານ ແລະ ນັກສຶກສາທີ່ໄດ້ຈັດກິດຈະກຳທີ່ມີຄວາມໝາຍຄວາມສຳຄັນ ໃນການເພີ່ມພູນຄູນສຸກ ແລະ ບັນເທົາທຸກໃຫ້ປະຊາຊົນເມືອງໝື່ນ ພ້ອມທັງໄດ້ກ່າວຍ້ອງຍໍຊົມເຊີຍຕໍ່ນັກສຶກສາທີ່ເສຍສະຫຼະທັງສະຕິປັນຍາ ແລະ ເຫື່ອແຮງຂອງຕົນ ໃນການລະດົມທຶນຮອນເພື່ອປະກອບສ່ວນເຂົ້າໃນພັດທະນາ ແລະ ບັນເທົາທຸກໃຫ້ຊິວິດການເປັນຢູ່ຂອງຊາວເມືອງໝື່ນດີຂຶ້ນ ພ້ອມສັນຍາວ່າຈະນຳເຄື່ອງຊ່ວຍເຫຼືອດັ່ງກ່າວ ໄປແຈກຢາຍໃຫ້ປະຊາຊົນຜູ້ມີຄວາມຈຳເປັນ ແລະ ຂາດເຂີນໃຫ້ທົ່ວເຖິງ.