ວັນທີ 31 ກໍລະກົດ 2020 ຢູ່ກະຊວງແຜນການ ແລະ ການລົງທຶນ ໄດ້ມີພິທີມອບ-ຮັບໜ້າທີ່ຫົວໜ້າສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ລະຫວ່າງທ່ານ ສະໄໝຈັນ ບຸບຜາ ຫົວໜ້າສູນສະຖິຕິແຫ່ງຊາດ (ຜູ້ເກົ່າ) ໄປຮັບໜ້າທີ່ໃໝ່ຢູ່ສະພາທິດສະດີສູນກາງພັກ ແລະ ທ່ານນາງ ພອນສະຫຼີ ສຸກສະຫວັດ ຮອງຫົວໜ້າສູນສະຖິຕິແຫ່ງຊາດ ມາຮັບໜ້າທີ່ເປັນຫົວໜ້າຫົວໜ້າສູນສະຖິຕິແຫ່ງຊາດ (ຜູ້ໃໝ່) ໂດຍເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ມີຮອງລັດຖະມົນຕີ ຫົວໜ້າກົມ ຫ້ອງການ ແລະ ພະນັກງານຫຼັກແຫຼ່ງອ້ອມຂ້າງກະຊວງເຂົ້າຮ່ວມ.
ການມອບ-ຮັບໜ້າທີ່ໃໝ່ຄັ້ງນີ້ ໂດຍອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານຂອງພັກ-ລັດ ໃນແຕ່ລະໄລຍະ ດ້ວຍຄວາມຕ້ອງການຂອງພະນັກງານນຳພາຄຸ້ມຄອງ ຢູ່ໃນບາງຂົງເຂດ ແລະ ທັງເປັນການປັບປຸງລະບົບການຈັດຕັ້ງ ເພື່ອສຶບຕໍ່ຊີ້ນຳ-ນຳພາວຽກງານຂອງສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ໃຫ້ມີຄວາມເຂັ້ມແຂງ ສາມາດຈັດຕັ້ງຜັນຂະຫຍາຍແນວທາງນະໂຍບາຍຂອງພັກ-ລັດ ຍຸດທະສາດໄລຍະກາງ ແລະ ໄລຍະຍາວ ໃຫ້ໄດ້ຮັບຜົນສຳເລັດຕາມຄາດໝາຍສູ້ຊົນທີ່ກຳນົດໄວ້.