ຢາກໃຫ້ຮ່າງກາຍແຂງແຮງ ຕ້ອງເຄື່ອນໄຫວຮ່າງກາຍເລື້ອຍໆ ພຶດຕິກຳການນັ່ງເປັນເວລາດົນນານ ການເຮັດກິດຈະກຳຊ້ຳໆ ບໍ່ຄ່ອຍໄດ້ເຄື່ອນໄຫວຮ່າງກາຍ ສ່ຽງການເປັນກ້າມຊີ້ນອັກເສບ ທັງການນັ່ງເຮັດວຽກ ນັ່ງຢູ່ໜ້າຄອມພິວເຕີ ນັ່ງຫຼິ້ນສະມາດໂຟນ ຈຶ່ງເຮັດໃຫ້ຄົນເຮັດວຽກຫ້ອງການສ່ວນໃຫຍ່ ມັກມີອາການປວດເມື່ອຍກ້າມຊີ້ນຄໍ ແລະ ບ່າໄຫຼ່.
ການເປັນກ້າມຊີ້ນອັກເສບ ເກີດຈາກການທີ່ກ້າມຊີ້ນເຮັດວຽກໜັກເກີນໄປ ເຊັ່ນ ອອກແຮງຫຼາຍກວ່າປົກກະຕິ ຫຼື ຢືດຫຼາຍກວ່າປົກກະຕິ ມີການຕຶງຄ້າງຢູ່ໃນທ່າໃດທ່າໜຶ່ງດົນໆ ຫຼື ຊ້ຳໆ ຢູ່ໃນທ່າທາງທີ່ບໍ່ຖືກຕ້ອງຕໍ່ເນື່ອງ ຫຼື ຊ້ຳໆ ກໍ່ໃຫ້ກ້າມຊີ້ນຕຶງ ບໍ່ມີການໄຫຼວຽນຂອງເລືອດ ຈຶ່ງເກີດການອັກເສບຂຶ້ນມາ ຊຶ່ງພຶດຕິກຳທີ່ສ່ຽງກ້າມຊີ້ນອັກເສບ ຄື ພຶດຕິກຳຕ່າງໆໃນການໃຊ້ຊີວິດ.
– ທັ້ງການນັ່ງທີ່ບໍ່ຖືກຕ້ອງ ແລະ ຕໍ່ເນື່ອງດົນໆ ເຊັ່ນ ນັ່ງໄຂວ່ຫ້າງ ຫຼັງຂົດ ກົ້ມຄໍ ເຮັດໃຫ້ກ້າມຊີ້ນບ່າ ຄໍ ເກີດການອັກເສບ.
– ການນອນທີ່ຢູ່ໃນທ່າທີ່ບໍ່ຖືກຕ້ອງ ເຊັ່ນ ນອນແຄງທັບຫົວໄຫຼ່ຂ້າງໃດຂ້າງໜຶ່ງ ຊຶ່ງຈະເຮັດໃຫ້ຂໍ້ໄຫຼ່ຖືກກົດທັບ ອາດເກີດການອັກເສບຂອງເສັ້ນເອັນຮອບໆຫົວບ່າໄຫຼ່ໄດ້.
– ການຢືນ ຫຼື ຍ່າງຫຼາຍເກີນໄປ ອາດເຮັດໃຫ້ກ້າມຊີ້ນສົ້ນນ່ອງ ເຂົ່າ ຫຼື ຫຼັງອັກເສບຈາກການທີ່ໃຊ້ງານໜັກໝົດມື້ໄດ້.
– ການຫຼິ້ນກີລາທີ່ຕ້ອງກະແທກ ຫຼື ຫຼິ້ນໜັກເກີນ ກຳລັງກໍ່ໃຫ້ເກີດການອັກເສບໄດ້.
ການປິ່ນປົວເບື້ອງຕົ້ນ
ເມື່ອເລີ່ມມີອາການຄື ເມື່ອເລີ່ມປວດ ມີລັກສະນະບວມໆ ແຂງໆ ຈັບເບິ່ງອາດຈະຮູ້ສຶກຮ້ອນໆຮຸ່ມໆ ຫຼື ຖ້າສັງເກດບໍລິເວນທີ່ເປັນອາດເຫັນບວມໆ ແດງ ຫາກເປັນລັກສະນະນີ້ ຄວນໃຊ້ແຜ່ນເຢັນປະຄົບກ່ອນ ພັກໃຫ້ຜ່ອນຄາຍ ພັກການໃຊ້ວຽກໜັກ ປ່ຽນອະຣິຍາບົດເລື້ອຍໆ ຈົນຮູ້ສຶກວ່າເບົາສະບາຍຂຶ້ນ ແລ້ວຄ່ອຍກັບໄປໃຊ້ວຽກໄດ້ເໝືອນເດີມ ຫາກບໍ່ປິ່ນປົວ ຫຼື ດູແລຢ່າງຖືກຕ້ອງໃນຕອນທຳອິດທີ່ເປັນ ອາດເຮັດໃຫ້ອາການອັກເສບນັ້ນເກີດການອັກເສບຊຳເຮື້ອ ແລະ ກາຍເປັນພັງຜືດ ມີຜົນກະທົບຕໍ່ໂຄງສ້າງອື່ນໆໃນຮ່າງກາຍ ເຊັ່ນ ເມື່ອຕຶງຫຼາຍ ແລະ ບໍ່ໄດ້ຜ່ອນຄາຍການຕຶງນັ້ນອາດເຮັດໃຫ້ໄປດຶງໃຫ້ໂຄງສ້າງກະດູກຜິດຮູບ ອາດເຮັດໃຫ້ກະດູກສັນຫຼັງຄົດ ຫຼັງກົ່ງ ຫຼື ໄຫຼ່ຕິດໄດ້.
ທັ້ງນີ້ ຖ້າຕ້ອງນັ່ງເຮັດວຽກດົນໆ ຄວນມີການຢືດຢຽດກ້າມຊີ້ນດ້ວຍຕົວເອງທຸກໆ 1 ຊົ່ວໂມງ ຄື ໃຊ້ມືປະສານກັນຢຽດໄປທາງດ້ານໜ້າ ຢຽດແຂນໃຫ້ຕຶງ ແລ້ວຍົກຂຶ້ນເໜືອຫົວ ຈົນແຂນຕຶງ ລຳຕົວຕຶງ ຢືດຕົວເອງໃຫ້ຢຽດຂຶ້ນດ້ານເທິງ ແລ້ວຄ່ອຍແຍກມືອອກຈາກກັນ ປ່ອຍແຂນທັງສອງຂ້າງດັນໄປດ້ານຫຼັງ ແລະ ຄ່ອຍໆເຄື່ອນໄຫວລົງຊ້າໆຈົນສຸດ ເຮັດຈັກ 2-3 ຄັ້ງຕໍ່ຊົ່ວໂມງ.
ອີກວິທີ ຄື ພະຍາຍາມປ່ຽນອະຣິຍາບົດເລື້ອຍໆ ຕອນລຸກປ່ຽນທ່າທາງ ກໍຄວນມີການບິດລຳຕົວ ອ້ຽວລຳຕົວຊ້າໆ ເພື່ອໃຫ້ກ້າມຊີ້ນໄດ້ຜ່ອນຄາຍແດ່ທີ່ສຳຄັນທີ່ສຸດ ຄືພະຍາຍາມນັ່ງຫຼັງຊື່ ເພື່ອເອນຫົວບ່າໄຫຼ່ໄປດ້ານຫຼັງໄວ້ເລັກໜ້ອຍຕະຫຼອດເວລາ ບໍ່ນັ່ງກົ້ມຄໍ ຫຼື ໄຫຼ່ຂົດມາດ້ານໜ້າຫຼາຍເກີນໄປ ເລື່ອນຕົວເຂົ້າໃກ້ຈໍຄອມພິວເຕີ ຫຼື ຄີບອດ ເພື່ອໃຫ້ຫຼັງຊື່ ຈັດອຸປະກອນຕ່າງໆໃຫ້ຢູ່ໃນລະດັບທີ່ເໝາະສົມ ບໍ່ສູງ ຫຼື ຕ່ຳ ຫຼື ຕ້ອງອ້ຽວຕົວ ເພື່ອຫຼຸດຄວາມສ່ຽງໃນການເປັນກ້າມຊີ້ນອັກເສບໄດ້…
ວ. ດາລາວົງ – ນຳສະເໜີ