ເມືອງໄຊທານີ ນະຄອນຫຼວງວຽງຈັນ ເປັນເມືອງໜຶ່ງທີ່ມີຄວາມອຸດົມສົມບູນໄປດ້ວຍຊັບພະຍາກອນທຳມະຊາດນາໆຊະນິດ ມີສາຍນ້ຳງື່ມໄຫຼຜ່ານ ຍາວ 52,6 ກິໂລແມັດ ເຊິ່ງເປັນແມ່ນ້ຳສາຍຫຼັກທີ່ມີຄວາມສຳຄັນຕໍ່ການດຳລົງຊີວິດ ເປັນແຫຼ່ງທຳມາຫາກິນ ການຄົມມະນາຄົມຂົນສົ່ງໂດຍສານ ການທ່ອງທ່ຽວ ເປັນແຫຼ່ງສະໜອງນ້ຳຕົ້ນຕໍໃຫ້ແກ່ການຜະລິດກະສິກຳ ດັ່ງນັ້ນ ອົງການປົກຄອງເມືອງໄຊທານີ ຈຶ່ງໄດ້ຖືເອົາການພັດທະນາບ້ານ ວັດທະນະທຳຕິດພັນກັບການທ່ອງທ່ຽວ ແລະ ມີແຜນສ້າງເມືອງທ່ອງທ່ຽວກະສິກຳສະອາດ ອຸດສາຫະກຳທັນສະໄໝ ເປັນມິດກັບສິ່ງແວດລ້ອມ ແນໃສ່ສ້າງທ່າແຮງດຶງດູດນັກທ່ອງທ່ຽວເຂົ້າມາທ່ຽວເມືອງໄຊທານີ ນັບມື້ນັບຫຼາຍຂຶ້ນ.
ທ່ານ ຄຳປະດິດ ເຂັມມານິດ ເຈົ້າເມືອງໄຊທານີ ໃຫ້ຮູ້ວ່າ: ໃນໄລຍະ 5 ປີຜ່ານມາ ອົງການປົກຄອງເມືອງໄຊທານີ ກໍຄື ຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງໄຊທານີ ໄດ້ຊຸກຍູ້ສ້າງຄອບຄົວວັດທະນະທຳໄດ້ 104 ບ້ານ ທຽບໃສ່ແຜນການ 5 ປີ ປະຕິບັດໄດ້ 100% ມອບໃບຢັ້ງຢືນຄອບຄົວວັດທະນະທຳ 32.540 ຄອບຄົວ ທຽບໃສ່ປີ 2014 ເພີ່ມຂຶ້ນ 78% ປະກາດເປັນບ້ານວັດທະນະທຳໄດ້ 92 ບ້ານ ທຽບໃສ່ປີ 2014 ເພີ່ມຂຶ້ນ 88% ທຽບໃສ່ແຜນ 5 ປີ ປະຕິບັດໄດ້ 115% ພ້ອມນັ້ນ ໄດ້ພັດທະນາການທ່ອງທ່ຽວຕາມສາຍນ້ຳງື່ມ ໂດຍມີການສຳຫຼວດນັບແຕ່ບ້ານນາກຸງລົງຮອດປ່າສະຫງວນເວີນແທ່ນ 17 ຄັ້ງ ໄດ້ຈັດຂະບວນຄາລະວານທ່ອງທ່ຽວທຳມະຊາດພູເຂົາຄວາຍ ຕາດຊອຍວອຍ 3 ຄັ້ງ ມີຄົນເຂົ້າຮ່ວມ 600 ກວ່າຄົນ ໄດ້ຄຸ້ມຄອງໂຮງແຮມ ເຮືອນພັກ ຣີສອດ ຮ້ານອາຫານ ຮ້ານບັນເທິງ ໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ ແນະນຳໃຫ້ມີການປັບປຸງໃຫ້ເຂົ້າສູ່ມາດຕະຖານ ເນັ້ນຄວາມສະອາດ ປອດໄພຂອງຜູ້ມາໃຊ້ບໍລິການ ສະແດງອອກ 5 ປີຜ່ານມາ ມີນັກທ່ອງທ່ຽວມາທ່ຽວຊົມເມືອງໄຊທານີ 507.500 ຄົນ ພ້ອມນັ້ນ ໄດ້ເຮັດບົດບັນທຶກ ສຶກສາອົບຮົມຫົວໜ່ວຍທຸລະກິດ 295 ສະບັບ ອອກແຈ້ງການປິດຮ້ານກິນດື່ມທີ່ເຄື່ອນໄຫວບໍ່ຖືກຕ້ອງ 55 ຫົວໜ່ວຍ ຮ້ານບໍລິການບັນເທິງກາງແຈ້ງໃກ້ເຂດມະຫາວິທະຍາໄລແຫ່ງຊາດ 16 ຮ້ານ ສັ່ງປິດການບໍລິການບັນເທິງ ພາຍໃນຮ້ານ 11 ຮ້ານ ສັ່ງປິດການດຳເນີນທຸລະກິດຮ້ານອາຫານ ແລະ ຮ້ານກິນດື່ມ 21 ຮ້ານ.
ສຳລັບທິດທາງໃນຕໍ່ໜ້າ ຊຸກຍູ້ ການສ້າງຄອບຄົວ ແລະ ບ້ານວັດທະນະທຳຕິດພັນກັບຂະບວນການທ່ອງທ່ຽວ ຕາມຮີດຄອງປະເພນີອັນດີງາມບັນດາເຜົ່າ ທ່ຽວຊົມທຳມະຊາດ ໄປຄຽງຄູ່ກັບການແກ້ໄຂປາກົດການຫຍໍ້ທໍ້ຕ່າງໆທາງສັງຄົມ ໂດຍຕັ້ງໜ້າ ແກ້ໄຂໃຫ້ຂາດຕົວຮ້ານບໍລິການ ຮ້ານກິນດື່ມທີ່ຢູ່ໃກ້ໂຮງຮຽນ ແລະ ສະຖາບັນການສຶກສາ ພັດທະນາສະຖານທີ່ທ່ອງທ່ຽວທຳມະຊາດຕາມສາຍນ້ຳງື່ມ ທຳມະຊາດພູເຂົາຄວາຍ ແລະ ດອນກຳ ບ້ານເວີນແທ່ນ ຕິດພັນກັບກະສິກຳສະອາດ ສ້າງລະບົບຂໍ້ມູນຂ່າວສານກ່ຽວກັບການທ່ອງທ່ຽວ ໃຫ້ສາມາດເຊື່ອມໂຍງທັງພາຍໃນ ແລະ ຕ່າງປະເທດ.
ຄາດໝາຍຮອດປີ 2025 ສ້າງເມືອງໄຊທານີໃຫ້ເປັນເມືອງທ່ອງທ່ຽວກະສິກຳສະອາດ ອຸດສາຫະກຳທັນສະໄໝ ເປັນມິດກັບສິ່ງແວດລ້ອມ ເປັນໃຈກາງດ້ານການແລກປ່ຽນສິນຄ້າ ຄົມມະນາຄົມ ເພື່ອນຳພາເມືອງໃຫ້ກາຍເປັນເມືອງສະຫງົບ ສະອາດ ສີຂຽວ ສັງຄົມມີຄວາມຍຸຕິທຳ ແລະ ພັດທະນາເມືອງຕາມເຂດ ດັ່ງນີ້: ພັດທະນາເຂດບ້ານສີວິໄລ ດົງໂດກ ບ້ານໄຊ ແລະ ທ່າງ່ອນໃຫ້ເປັນເຂດການສຶກສາ-ພັດທະນາຊັບພະຍາກອນມະນຸດ ການຄ້າ ການບໍລິການ ຕິດພັນກັບກະສິກຳສະອາດ ພັດທະນາເຂດໂຄກສີວິໄລ ແລະ ເຂດຫົວຊຽງ ໃຫ້ເປັນເຂດອຸດສາຫະກຳ ພັດທະນາເຂດເວີນຄຳ ຫາດກ້ຽງ ດົງບັງ ບ້ານຊ້າງ ແລະ ຫ້ວຍຈຽມ ເປັນເຂດກະສິກຳຕິດພັນກັບການບໍລິການທ່ອງທ່ຽວຕາມສາຍນ້ຳງື່ມ ແລະ ທຳມະຊາດພູເຂົາຄວາຍ ພັດທະນາເຂດດົງໝາກຄາຍໃຫ້ເປັນເທສະບານເມືອງ ແລະ ພັດທະນາກຸ່ມບ້ານຊ້າງໃຫ້ກາຍເປັນຕົວເມືອງໃໝ່.