ອາສາສະໝັກ ຄືຄວາມຕັ້ງໃຈ ພໍໃຈ ໃນການທີ່ຈະເຮັດເພື່ອຜົນປະໂຫຍດຂອງສັງຄົມ ໂດຍບໍ່ຮຽກຄ່າຕອບແທນ ເປັນການເສຍສະຫຼະອັນສູງສົ່ງໃນການປະຕິບັດໜ້າທີ່ ທີ່ຕົນເອງຮັບຜິດຊອບ ແລະ ໄດ້ຮັບ ການມອບໝາຍ ປະຕິບັດຕາມພາລະບົດ ບາດ ສິດ ໜ້າທີ່ ຂອງວຽກງານໃດໜຶ່ງ ເຊັ່ນດຽວກັບການເປັນອາສາສະໝັກຂອງອົງການກາແດງລາວ ເຊິ່ງການເປັນອາສາສະໝັກຂອງອົງການກາແດງລາວ ກໍມີຫຼາຍພາກສ່ວນໃນຫຼາຍວຽກງານທີ່ແຕກຕ່າງກັນ ແຕ່ສ່ວນໃຫຍ່ອາສາສະໝັກກາແດງ ຈະແມ່ນນັກຮຽນ-ນັກສຶກສາທີ່ສະແຫວງ ຫາປະສົບປະການ ມີຄວາມມຸ່ງໝັ້ນ ຕັ້ງໃຈ ໃນການປະກອບສ່ວນຊ່ວຍເຫຼືອສັງຄົມ ດ້ວຍຄວາມຈິງໃຈ ແລະ ບໍລິສຸດ ໃຈ ໂດຍບໍ່ຮຽກຄ່າຕອບແທນໃດໆ.
ຫຼ້າສຸດກໍມີຫຼາຍພາກສ່ວນສະໝັກໃຈ ເຂົ້າເປັນອາສະໝັກອົງການກາແດງລາວ ໜຶ່ງໃນຈຳນວນດັ່ງກ່າວ ສ່ວນຫຼາຍກໍແມ່ນກຸ່ມຂອງນັກຮຽນ ເຊິ່ງກ່ອນຈະຮັບເຂົ້າເປັນອາສາສະໝັກກາແດງລາວນັ້ນ ນອກຈາກມີຄວາມມຸ່ງໝັ້ນຕັ້ງໃຈແລ້ວ ສິ່ງສຳຄັນກໍ ຕ້ອງຜ່ານຂັ້ນຕອນໃນການຄັດເລືອກ ແລະ ໄດ້ຜ່ານການເຝິກອົບຮົມ ສຶກສາຮຽນຮູ້ກ່ຽວກັບຄວາມຮູ້ພື້ນຖານໃນແຕ່ລະວຽກ ງານຂອງຄວາມຮັບຜິດຊອບຂອງຕົນ ແລະ ເພື່ອສືບຕໍ່ຈັດຕັ້ງປະຕິບັດການເຝິກອົບຮົມໃຫ້ຄວາມຮູ້ແກ່ອາສາສະໝັກກາແດງລາວ ລະຫວ່າງກາງເດືອນກໍລະກົດ 2020 ອົງການກາແດງລາວ ໄດ້ຈັດເຝິກອົບຮົມໃຫ້ພະນັກງານຄູ-ອາຈານ ແລະ ນັກຮຽນທີ່ສະໝັກໃຈເຂົ້າເປັນອາສາສະໝັກອົງການກາແດງ ທີ່ແຂວງຊຽງຂວາງ ເຊິ່ງປະກອບມີ ເມືອງແປກ ແລະ ເມືອງຄຳ ແຂວງຊຽງຂວາງ ໂດຍມີທ່ານ ສີມີໄຊ ພິມມະຈັກ ຫົວໜ້າອົງການກາແດງແຂວງຊຽງຂວາງທ່ານ ຄອນສະຫວັນ ຈັນທະຄາມ ຫົວໜ້າຫ້ອງການ ອົງການກາແດງລາວ ມີບັນດາທ່ານທີ່ມາຈາກພະແນກການອ້ອມຂ້າງແຂວງ ພະນັກງານຄູ-ອາຈານ ແລະ ນັກ ຮຽນ ລວມທັງອາສາສະໝັກທີ່ມາຈາກບ້ານຕ່າງໆ ພາຍໃນ 2 ເມືອງ ລວມທັງໝົດ 82 ຄົນ ຍິງ 26 ຄົນ ທີ່ເຂົ້າຮ່ວມການເຝິກອົບຮົມໃນຄັ້ງນີ້.
ທ່ານ ຄອນສະຫວັນ ຈັນທະຄາມ ກ່າວວ່າ: ການເປັນອາສະໝັກນັ້ນທຸກຄົນສາ ມາດເປັນໄດ້ ພຽງແຕ່ມີຄວາມມຸ່ງໝັ້ນ ຕັ້ງໃຈ ແລະ ບໍລິສຸດໃຈ ມີສຸຂະພາບດີທາງ ດ້ານຮ່າງກາຍ ແລະ ຈິດໃຈ ພ້ອມທັງໄດ້ຮັບການເຝິກອົບຮົມຢ່າງຖືກຕ້ອງຈາກຄະ ນະຮັບຜິດຊອບຂອງອົງການກາແດງລາວ ທັງນີ້ ກໍເພື່ອໃຫ້ເຂົາເຈົ້າຮູ້ພາລະບົດບາດ ສິດ-ໜ້າທີ່ຂອງກາແດງ ໃຫ້ຮູ້ຫຼັກການປະ ຖົມພະຍາບານເບື້ອງຕົ້ນ ຮູ້ບັນຫາກ່ຽວກັບ ການຮັບມືກັບໄພພິບັດ ການຊ່ວຍເຫຼືອປະ ຊາຊົນ ລວມເຖິງຮູ້ບັນດາຫຼັກການຕ່າງໆ ທີ່ກ່ຽວຂ້ອງກັບອົງການກາແດງລາວ ພ້ອມກັບການມີແນວຄິດເອື້ອເຟື້ອເພື່ອແຜ່ ແລະ ເປັນເຈົ້າການໃນການເຮັດໜ້າທີ່ ເປັນອາສາສະໝັກ ເພາະການເປັນອາສາສະໝັກບໍ່ມີຄ່າຕອບແທນທາງດ້ານວັນຖຸສິ່ງຂອງແຕ່ຢ່າງໃດ ເປັນການເສຍສະຫຼະຕໍ່ສ່ວນລວມ ເຮັດເພື່ອປະຊາຊົນເທົ່ານັ້ນ.
ການເຝິກອົບຮົມເປັນອາສາສະໝັກກາ ແດງ ນອກຈາກຈະຮຽນຮູ້ທາງດ້ານທິດ ສະດີແລ້ວ ຕ້ອງໄດ້ຮຽນຮູ້ຈາກປະສົບການຕົວຈິງຈາກສະຖານະການສ້າງຂຶ້ນທີ່ໃກ້ຄຽງທີ່ສຸດກັບເຫດການຈິງ ເມື່ອເວລາພົບກັບສະພາບການຕົວຈິງ ຈະຮູ້ວິທີປະຕິບັດຢ່າງຖືກຕ້ອງ ເຊິ່ງພາຍຫຼັງຈາກການເຝິກ ອົບຮົມສຳເລັດ ອາສາສະໝັກທຸກຄົນຈະໄດ້ຮັບໃບຢັ້ງຢືນໃນການເຂົ້າຮ່ວມເຝິກອົບ ຮົມ ພ້ອມກັບການຮັບເຂົ້າເຄື່ອນໄຫວເປັນອາສາສະໝັກອົງການກາແດງ ກຽມພ້ອມຮັບໃຊ້ຊາດ ແລະ ຮັບໃຊ້ປະຊາຊົນຕາມໜ້າທີ່ພາລະບົດບາດຂອງອົງການກາແດງ.
ນຳສະເໜີໂດຍ: ແວ່ນຂາວ