ເດັກນ້ອຍທຸກຄົນຄວນໄດ້ຮັບໂອກາດເລີ່ມຕົ້ນຊີວິດຢ່າງດີທີ່ສຸດ. ແຕ່ໃນປັດຈຸບັນ ຍັງມີເດັກນ້ອຍຫຼາຍລ້ານຄົນທົ່ວໂລກທີ່ຍັງບໍ່ສາ ມາດເຂົ້າເຖິງ “ການເລີ່ມຕົ້ນທີ່ດີ” ນັ້ນໄດ້.
ໃນໄລຍະວັນທີ 1-7 ສິງຫາ ຂອງທຸກປີ ປະເທດຕ່າງໆທົ່ວໂລກຮ່ວມກັນຈັດກິດຈະກໍາ ສັບປະດາສົ່ງເສີມການລ້ຽງລູກດ້ວຍນົມແມ່ໂລກ (World Breastfeeding Week) ເພື່ອຢ້ຳເຕືອນວ່າ ການໃຫ້ນົມແມ່ເປັນໜຶ່ງໃນມາດຕະການດ້ານສາທາລະນະສຸກທີ່ມີປະສິດທິຜົນສູງ ຄຸ້ມຄ່າ ແລະ ຍືນຍົງທີ່ສຸດ ສໍາລັບການລົງທຶນໃນສຸຂະພາບຂອງມະນຸດ.
ປີ 2026 ໄດ້ນໍາສະເໜີຄໍາຂວັນ “Breastfeeding for a Sustainable Start in Life: Strengthen What Works” ຫຼື “ການໃຫ້ນົມແມ່ເພື່ອຈຸດເລີ່ມຕົ້ນຊີວິດທີ່ຍືນຍົງ: ເສີມສ້າງສິ່ງທີ່ໄດ້ຜົນ” ເຊິ່ງສະທ້ອນໃຫ້ເຫັນວ່າ ໂລກໄດ້ມີຫຼັກຖານທາງວິຊາການຢ່າງພຽງພໍວ່າ ມາດຕະການໃດທີ່ສາມາດຊ່ວຍໃຫ້ແມ່ປະສົບຜົນສໍາເລັດໃນການໃຫ້ນົມລູກ. ສິ່ງສໍາຄັນໃນປັດຈຸບັນ ຄື ການຂະຫຍາຍມາດຕະການເຫຼົ່ານັ້ນໃຫ້ເຂົ້າເຖິງທຸກຄອບຄົວ.
ນົມແມ່: ຫຼາຍກວ່າອາຫານມື້ທໍາອິດ ນົມແມ່ບໍ່ແມ່ນພຽງແຕ່ອາຫານສໍາລັບເດັກເກີດໃໝ່ ແຕ່ເປັນຮາກຖານຂອງການມີສຸຂະ ພາບທີ່ດີຕະຫຼອດຊີວິດ.
ອົງການອະນາໄມໂລກ (WHO) ແນະນໍາໃຫ້ເດັກນ້ອຍໄດ້ຮັບ ນົມແມ່ຢ່າງດຽວ (Exclusive Breast feeding) ໃນໄລຍະ 6 ເດືອນທໍາອິດຂອງຊີວິດ ເນື່ອງຈາກນົມແມ່ມີສານອາຫານຄົບຖ້ວນ ມີພູມຄຸ້ມກັນຕາມທໍາມະຊາດ ຊ່ວຍປ້ອງກັນພະຍາດຕິດເຊື້ອ ເສີມສ້າງການພັດທະນາຂອງສະໝອງ ແລະ ຫຼຸດຄວາມສ່ຽງຂອງພະຍາດຕ່າງໆໃນໄວເດັກ.
ສໍາລັບແມ່ ການໃຫ້ນົມລູກຍັງຊ່ວຍຫຼຸດຄວາມສ່ຽງຂອງມະເຮັງເຕົ້ານົມ ແລະ ມະເຮັງຮວຍໄຂ່ ພ້ອມທັງຊ່ວຍໃຫ້ຮ່າງກາຍຟື້ນຕົວຫຼັງການຄອດໄດ້ໄວຂຶ້ນ.
ຜົນປະໂຫຍດທີ່ຂະຫຍາຍໄປໄກກວ່າສຸຂະພາບ ການໃຫ້ນົມແມ່ບໍ່ພຽງແຕ່ສ້າງຜົນດີຕໍ່ສຸຂະພາບ ແຕ່ຍັງສົ່ງຜົນດີຕໍ່ເສດຖະກິດ ສັງຄົມ ແລະ ສິ່ງແວດລ້ອມ.
ການໃຊ້ນົມແມ່ຊ່ວຍຫຼຸດຄ່າໃຊ້ຈ່າຍດ້ານການຮັກສາພະຍາດ ຫຼຸດພາລະດ້ານການເງິນຂອງຄອບຄົວ ຫຼຸດການໃຊ້ບັນຈຸພັນ ແລະ ຂີ້ເຫຍື້ອຈາກນົມຜົງ ພ້ອມທັງຊ່ວຍຫຼຸດການປ່ອຍທາດອາຍເຮືອນແກ້ວ ທັງເປັນການສະໜັບສະໜູນການພັດທະນາທີ່ຍືນຍົງ.
ສິ່ງທີ່ໄດ້ຜົນ ຄວນໄດ້ຮັບການຂະຫຍາຍ ຫຼັກຖານທາງວິຊາການຢືນຢັນວ່າ ແມ່ຈະສາມາດໃຫ້ນົມລູກໄດ້ສໍາເລັດຫຼາຍຂຶ້ນ ຫາກໄດ້ຮັບການສະໜັບສະໜູນດັ່ງນີ້:
- ການໃຫ້ຄໍາປຶກສາດ້ານການໃຫ້ນົມແມ່ຈາກບຸກຄະລາກອນສາທາລະນະສຸກທີ່ຜ່ານການຝຶກອົບຮົມ.
- ການດູແລແມ່ ແລະ ເດັກຕາມມາດຕະຖານ “ໂຮງໝໍສາຍສໍາພັນແມ່-ລູກ (Baby-Friendly Hospital Initiative)”.
- ນະໂຍບາຍລາພັກເກີດລູກທີ່ມີຄ່າຈ້າງ ແລະ ສະຖານທີ່ເຮັດວຽກທີ່ເອື້ອອໍານວຍຕໍ່ການໃຫ້ນົມແມ່.
- ການປົກປ້ອງຈາກການຕະຫຼາດທີ່ບໍ່ເໝາະສົມຂອງຜະລິດຕະພັນທົດແທນນົມແມ່.
- ຊຸມຊົນ ແລະ ຄອບຄົວທີ່ສະໜັບສະໜູນແມ່ຫຼັງເກີດລູກ.
“ສາຍໃຍແຫ່ງການສະໜັບສະໜູນ” ສໍາລັບແມ່ທຸກຄົນ
WHO ໄດ້ເນັ້ນຢ້ຳແນວຄິດ “Warm Chain of Support” ຫຼື “ສາຍໃຍແຫ່ງການສະໜັບສະໜູນ” ທີ່ເຊື່ອມໂຍງທຸກພາກສ່ວນເຂົ້າຮ່ວມດູແລແມ່ ນັບແຕ່ໄລຍະຖືພາ ການເກີດ ຈົນຮອດການລ້ຽງດູເດັກນ້ອຍ.
ສາຍໃຍນີ້ປະກອບມີ ບຸກຄະລາກອນສາທາລະນະສຸກ, ຜູ້ເປັນຜົວ, ພໍ່ແມ່, ນາຍຈ້າງ, ອົງກອນ, ຊຸມຊົນ, ຜູ້ກໍານົດນະໂຍບາຍ ແລະ ສັງຄົມໂດຍລວມ. ເມື່ອທຸກຄົນຮ່ວມກັນສະໜັບສະໜູນ ແມ່ ກໍຈະສາມາດໃຫ້ນົມລູກໄດ້ຢ່າງມີປະສິດທິຜົນ.
ການສະໜັບສະໜູນການໃຫ້ນົມແມ່ ແມ່ນຄວາມຮັບຜິດຊອບຂອງທຸກຄົນ ການໃຫ້ນົມແມ່ອາດເປັນການຕັດສິນໃຈຂອງແມ່ ແຕ່ຄວາມສໍາເລັດຂອງການໃຫ້ນົມແມ່ ແມ່ນຂຶ້ນກັບການສະໜັບສະໜູນຈາກທຸກພາກສ່ວນ.
ລັດຖະບານສາມາດພັດທະນານະໂຍບາຍຄຸ້ມຄອງແມ່ຫຼັງເກີດລູກ. ລະບົບສາທາລະນະສຸກສາມາດຍົກລະດັບການໃຫ້ຄໍາປຶກສາ. ນາຍຈ້າງສາມາດສ້າງສະຖານທີ່ເຮັດວຽກທີ່ເປັນມິດຕໍ່ການໃຫ້ນົມແມ່. ຊຸມຊົນ ແລະ ຄອບຄົວສາມາດມອບກໍາລັງໃຈ ແລະ ການຊ່ວຍເຫຼືອໃນເວລາສໍາຄັນ.
ການລົງທຶນທີ່ຄຸ້ມຄ່າທີ່ສຸດເພື່ອອະນາຄົດ ໃນໂອກາດ ອາທິດສົ່ງເສີມການລ້ຽງລູກດ້ວຍນົມແມ່ໂລກ 2026 ຂໍ້ຄວາມສໍາຄັນທີ່ WHO ຢາກສື່ຄື: ການສະໜັບສະໜູນການໃຫ້ນົມແມ່ ບໍ່ແມ່ນພຽງແຕ່ຊ່ວຍແມ່ ແຕ່ເປັນການລົງທຶນໃນການຢູ່ລອດຂອງເດັກນ້ອຍ ສຸຂະພາບຂອງຄອບຄົວ ຄວາມເຂັ້ມແຂງຂອງຊຸມຊົນ ແລະ ການພັດທະນາທີ່ຍືນຍົງຂອງສັງຄົມ.
ຫຼັກຖານທາງວິທະຍາສາດມີຢູ່ແລ້ວ. ວິທີແກ້ໄຂກໍມີຢູ່ແລ້ວ. ສິ່ງທີ່ໂລກຕ້ອງການໃນຕອນນີ້ ຄື ການລົງມືເສີມສ້າງສິ່ງທີ່ໄດ້ຜົນ ເພື່ອໃຫ້ເດັກນ້ອຍທຸກຄົນໄດ້ຮັບຈຸດເລີ່ມຕົ້ນຊີວິດທີ່ດີທີ່ສຸດ.