ການແຂ່ງຂັນກີລາບານເຕະຊີງຂັນທ່ານເຈົ້າແຂວງຫຼວງນ້ຳທາ ປະຈຳປີ 2020 ນັດຊີງຊະນະເລີດ ຈັດຂຶ້ນວັນທີ 28 ກໍລະກົດ 2020 ຢູ່ສະໜາມກີລາບານເຕະແຂວງຫຼວງນ້ຳທາ ມີທ່ານ ອ່ອນຈັນ ຄຳພາວົງ ຫົວໜ້າພະແນກການເງິນແຂວງຫຼວງນ້ຳທາ ທ່ານ ທອງແດງ ສິດທິຊົນ ປະທານສະຫະພັນບານເຕະແຂວງຫຼວງນ້ຳທາ ພ້ອມດ້ວຍບັນດາຫົວໜ້າ ຮອງຫົວໜ້າພະແນກ ຫ້ອງການ ຂະແໜງການ ຜູ້ໃຫ້ການສະໜັບສະໜູນ ພະນັກງານ ທະຫານ-ຕຳຫຼວດ ຄູ-ອາຈານ ແລະ ນັກຮຽນ ອ້ອມຂ້າງແຂວງ ຕະຫຼອດຮອດປະຊາຊົນແຂວງຫຼວງນ້ຳທາເຂົ້າຮ່ວມຊົມ.
ທ່ານ ທອງແດງ ສິດທິຊົນ ໃຫ້ຮູ້ວ່າ: ການແຂ່ງຂັນຈັດຂຶ້ນວັນທີ 22 ມິຖຸນາ ຫາວັນທີ 28 ກໍລະກົດ 2020 ເພື່ອສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ Vlll ອົງຄະນະພັກແຂວງຫຼວງນ້ຳທາ ພ້ອມທັງເປັນການສົ່ງເສີມນັກກີລາຂອງແຂວງໄດ້ມີການເຄື່ອນໄຫວສາມາດພັດທະນາຕົນເອງກ້າວສູ່ລະດັບແຂວງ ແລະ ລະດັບຊາດໃນອະນາຄົດ ໃນການຈັດການແຂ່ງຂັນສາມາດຕີລາຄາໄດ້ສູງມີຜົນສຳເລັດຢ່າງຮອບດ້ານ ໂດຍສະເພາະ ມີການແຂ່ງຂັນທຸກຄັ້ງ ບັນດາພະນັກງານ ທະຫານ-ຕຳຫຼວດ ຄູອາຈານ ແລະ ນັກຮຽນອ້ອມຂ້າງແຂວງ ຕະຫຼອດຮອດປະຊາຊົນຊາວແຂວງລັ່ງໄຫຼເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ ແລະ ເປັນຂະບວນການຢ່າງຟົດຟື້ນ.
ລາຍການແຂ່ງຂັນມີ 2 ປະເພດ ຄື: ທີມຍິງ ມີ 8 ພາກສ່ວນ ແບ່ງອອກເປັນ 2 ກຸ່ມ ແລະ ທີມຊາຍມີ 22 ພາກສ່ວນ ແບ່ງອອກເປັນ 8 ກຸ່ມ ທັງ 2 ຮຸ່ນນີ້ ແຕ່ລະກຸ່ມແຂ່ງຂັນພົບກັນໝົດຄັດເອົາທີມທີ່ມີຄະແນນດີ ອັນດັບທີ 1 ແລະ ທີ 2 ຜ່ານເຂົ້າໄປຫຼິ້ນໃນຮອບຕໍ່ໄປ ສຳລັບຜົນການແຂ່ງຂັນຄູ່ຊີງຊະນະເລີດທີມຊາຍປາກົດວ່າ: ສະໂມສອນວິສີສົມບັດ ຍັງເປັນທີມເດັ່ນຂອງແຂວງ ຫຼັງຈາກເອົາຊະນະສະໂມສອນບານກອງບັນຊາການປ້ອງກັນຄວາມສະຫງົບ (ປກສ) ແຂວງ ໄປໄດ້ 2-0 ປະຕູ ຄວ້າແຊັມການແຂ່ງຂັນກີລາບານເຕະທົ່ວແຂວງ ຊີງຂັນທ່ານເຈົ້າແຂວງຫຼວງນ້ຳທາ ປະຈຳປີ 2020 ໄປຄອງສະໄໝທີ 2 ຕິດຕໍ່ກັນ ສ່ວນ ປກສ ແຂວງໄດ້ພຽງອັນດັບທີ 2 ທີ 3 ພະແນກໂຍທາທິການ ແລະ ຂົນສົ່ງແຂວງ ແລະ ທີ 4 ບ້ານຫຼວງຢູໄນເຕັດ ສ່ວນປະເພດທີມຍິງ ທີ 1 ພະແນກໄປສະນີ ໂທລະຄົມມະນາຄົມ ແລະ ການສື່ສານແຂວງ ທີ 2 ໂຮງຮຽນ ມສ ເທດສະບານ ທີ 3 ນັກທຸລະກິດຍິງ ແລະ ທີ 4 ໂຮງຮຽນວິຊາຊີບແບບປະສົມ.