ທ່ານ ເສນສັນ ໄຊສະນັ່ນ ອະດີດຜູ້ຮັກສາປະຕູຟຸດຊໍທີມຊາດລາວ ປັດຈຸບັນ ເປັນເລຂາທິການສະຫະພັນບານເຕະຟຸດຊໍນະຄອນຫຼວງວຽງຈັນ ໃຫ້ສຳພາດວ່າ: ສຳລັບແຮງບັນດານໃຈໃນການຜັນຕົນເອງ ມາເຮັດທຸລະກິດກ່ຽວກັບອຸປະກອນກີລາ ກໍເກີດມາຈາກຄວາມມັກຮັກ ແລະ ຫຼົງໄຫຼໃນຫຼິ້ນກີລາເຕະບານມາຕັ້ງແຕ່ນ້ອຍຈົນໃຫຍ່ ເພື່ອຈະຢາກຖ່າຍທອດໃຫ້ນັກກີລາຮຸ່ນນ້ອງ ໄດ້ໃຊ້ຖົງມືຄຸນນະພາບທີ່ເປັນຜະລິດຕະພັນຂອງຄົນລາວຢ່າງແທ້ຈິງ ຄຸນນະພາບສູງ ໂດຍສະເພາະ ຖົງມື X Brand sports ຮຸ່ນ ALPHA ເປັນຮຸ່ນທຳອິດຕັ້ງຊື່ມາຈາກພາສາຂອງການບິນທີ່ຕົນເອງມັກເຊັ່ນດຽວກັນ ເພາະເປັນຖົງມືຮຸ່ນທຳອິດ ເຊິ່ງໝາຍເຖິງຄັ້ງທີ 1 ແລະ 1 ໝາຍເຖິງ A ສ່ວນ A ຫຍໍ້ມາຈາກ ALPHA ກ່ຽວກັບການອອກແບບລວດລາຍຂອງຖົງມືນັ້ນ ຕົນຕັ້ງໃຈເນັ້ນໄປທາງກີລາທີ່ທັນສະໄໝ ແລະ ມີຄຸນນະພາບຢ່າງຊັດເຈນ
ປັດຈຸບັນ ອຸປະກອນຖົງມືມີສີດຳເຫຼືອງ ສື່ເຖິງຕອນຕາເວັນຂຶ້ນ ແລະ ສີດຳແດງຄົມເຂັ້ມ ສື່ເຖິງຕອນຕາເວັນຕົກດິນ ເຊິ່ງເປັນຖົງມືນ້ອງໃໝ່ສຳລັບວົງການບານເຕະລາວ ແລະ ພວກເຮົາໄດ້ໃຫ້ການສະໜັບສະໜູນ 3 ທີມມາແລ້ວ ປະກອບມີ: ວຽງຈັນເອັຟທີ ແລະ ວຽງຈັນເອັຟຊີ 2 ທີມ ໃນລາວລີກ 1 ສ່ວນອີກ 1 ສະໂມສອນແມ່ນເມືອງຫາດ ຢູໄນເຕັດ ທີມໃນລາວລີກ 2 ແນວໃດກໍດີ ພວກເຮົາຍັງວາງແຜນຈະສະໜັບສະໜູນອີກຫຼາຍທີມຕໍ່ໄປ ແລະ ແຜນໃນອະນາຄົດຈະພະຍາຍາມອອກແບບເສື້ອຜ້າ ຖົງຕີນ ເກີບ ແລະ ອື່ນໆ ເພື່ອປະກອບສ່ວນສົ່ງເສີມວົງການບານເຕະລາວ ໃຫ້ມີທ່າກ້າວທີ່ພົ້ນເດັ່ນ ແລະ ເຕີບໃຫຍ່ຂະຫຍາຍຕົວຂຶ້ນເລື້ອຍໆ.
ສຳລັບ ເສກສັນ ໄຊສະນັ່ນ ປັດຈຸບັນອາຍຸ 25 ປີ ເກີດທີ່ເມືອງຫົງສາ ແຂວງໄຊຍະບູລີ ເລີ່ມມີຊື່ສຽງຈາກການເປັນຜູ້ຮັກສາປະຕູຟຸດຊໍທີມຊາດລາວ ແລະ ເຄີຍເຝົ້າເສົາພາທີມແຂວງວຽງຈັນ ຄວ້າຫຼຽນຄຳກີລາຟຸດຊໍ ໃນອຸດົມໄຊເກມປີ 2014 ປັດຈຸບັນ ຍັງຖືກແຕ່ງຕັ້ງເປັນເລຂາທິການສະຫະພັນຟຸດຊໍນະຄອນຫຼວງວຽງຈັນ ນອກນັ້ນຍັງມີຜົນງານໃນວົງການບັນເທີງເປັນຕົ້ນ ການຖ່າຍແບບ ເດີນແບບ ແລະ ສະແດງຮູບເງົາ ໄດ້ຮັບລາງວັນຂວັນໃຈຊ່າງພາບ Lao Supermodel 2015 ແລະ ຕິດ Top 5 Wow 30 ໜຸ່ມຮ້ອນແຮງຂອງລາວ ອີກດ້ວຍ.