ການແຂ່ງຂັນບານເຕະ ເປບຊີລາວລີກ 1 ລະດູການ 2020 ລະຫວ່າງລາວໂຕໂຢຕ້າເອັຟຊີ ພົບກັບທີມນ້ອງໃໝ່ວຽງຈັນເອັຟທີ ຈັດຂຶ້ນວັນທີ 28 ກໍລະກົດ 2020 ຢູ່ສະໜາມກີລາບານເຕະແຫ່ງຊາດ (ຫຼັກ 16) ນະຄອນຫຼວງວຽງຈັນ ມີກອງເຊຍຊາວລາວ ກໍຄື ຊາວນະຄອນຫຼວງວຽງຈັນຂອງທັງສອງສະໂມສອນເຂົ້າຮ່ວມຊົມ ແລະ ເຊຍຢ່າງເປັນຂະບວນຟົດຟື້ນ.
ເກມນີ້ເປັນນັດສຳຄັນຂອງທັງສອງທີມ ໂດຍສະເພາະ ລາວໂຕໂຢຕ້າໃນນາມເຈົ້າບ້ານ ກໍຍັງຂາດກອງໜ້າ ກາຊູໂອະ ໂຮມມະ ນັກເຕະຕົວເກັ່ງຊາວຍີ່ປຸ່ນທີ່ກຳລັງກັກຕົວ 14 ວັນ ຄາດວ່າອີກບໍ່ດົນ ກໍຈະສາມາດກັບຄືນມາຊ່ວຍທີມໄລ່ລ່າຕາໜ່າງ ແນວໃດກໍດີ ພາຍໃຕ້ການຄຸມທີມຂອງທ່ານ ເກດສະດາ ທອງເຄນ ຜູ້ຊ່ວຍຄູເຝິກທີ່ລົງຄຸມທີມຂ້າງສະໜາມແທນທ່ານ ຈຸນ ຟູກູດະ ຫົວໜ້າຄູເຝິກ ຫຼັງຖືກຫ້າມລົງຄຸມທີມຂ້າງສະໜາມ ຈາກກໍລະນີປ່ຽນຕົວນັກກີລາເກີນໂຄຕ້າ ນັດທີ່ເອົາຊະນະຊ້າງນ້ອຍ ເອັຟຊີ ຫວຸດຫວິດ 2-1 ປະຕູ ໂດຍທ່ານ ເກດສະດາ ທອງເຄນ ໄດ້ສົ່ງນັກເຕະກຳລັງສຳຄັນລົງສະໜາມຊ່ວຍທີມ ນຳທີມໂດຍ ພິທັກ ກອງມາທິລາດ ສ່ວນວຽງຈັນເອັຟທີ ນຳໂດຍທ່ານ ສັນຕິພາບ ໂພຄະສົມບູນ ຫົວໜ້າຄູເຝິກ ນັດນີ້ວາງແຜນການຫຼິ້ນຢ່າງຮັດກຸມ ເນັ້ນເກມຮັບອາໄສໂຕ້ກັບເປັນຕົ້ນຕໍ ວາງຫົວໜ້າທີມ ໄວທະຍາ ສີສົງຄາມ ຢືນໜ້າເປົ້າຄົນດຽວ.
ຜ່ານການແຂ່ງຂັນຜົນປາກົດວ່າ ແຊັມເກົ່າລາວໂຕໂຢຕ້າ ສາມາດເອົາຊະນະ ວຽງຈັນເອັຟທີໄປໄດ້ 3-0 ຈາກ ເລຊີໂອ ໃນນາທີ 36 ບຳບ້າ ນາທີ 58 ແລະ ພິທັກ ກອງມາທິລາດນາທີ 85 ສົ່ງຜົນໃຫ້ລາວໂຕໂຢຕ້າເກັບເພີ່ມເປັນ 10 ຄະແນນ ຈາກ 4 ນັດ ຊະນະ 3 ນັດ ແລະ ສະເໝີ 1 ນັດ ຮັກສາຕຳແໜ່ງທີມນຳຂອງຕາຕະລາງໄວ້ໄດ້ຢ່າງໜຽວແໜ້ນຕໍ່ໄປ ສ່ວນວຽງຈັນເອັຟທີລົງສະໜາມນັດນີ້ ເປັນນັດທີ 3 ຈາກຜົນ 3 ນັດ ສະເໝີ 1 ນັດ ແລະ ເສຍ 2 ນັດ ມີ 1 ຄະແນນ ຫຼົ່ນລົງໄປຢູ່ທ້າຍຕາຕະລາງ.