ພິທີມອບ-ຮັບຫ້ອງຮຽນໃນອາຄານ PUV ຫ້ອງ 101 ແລະ ຫ້ອງ 201 ພາກວິຊາພາສາຈີນ ຄະນະອັນສອນສາດ ມະຫາວິທະຍາໄລແຫ່ງຊາດ (ມຊ) ຈັດຂຶ້ນວັນທີ 29 ກໍລະກົດ 2020 ທີ່ອາຄານດັ່ງກ່າວ ມີທ່ານ ຮຸ່ງເພັດ ຈັນທະວົງ ຮອງອະທິການບໍດີ ມຊ ທ່ານ ບຸນເລີດ ແສງສຸລິນ ຄະນະບໍດີຄະອັກສອນສາດ ທ່ານ ພູຢາງ ຮອງອຳນວຍການບໍລິສັດກໍ່ສ້າງລົງທຶນ ແລະ ຖືຮຸ້ນແຂວງຢູນນານ ຈຳກັດຜູ້ດຽວ ພ້ອມດ້ວຍຫົວໜ້າ ຮອງຫົວໜ້າພາກວິຊາ ຄູອາຈານ ແລະ ນັກສຶກສາເຂົ້າຮ່ວມ.
ໂຄງການຮ່ວມມືປັບປຸງ ສ້ອມແປງຫ້ອງຮຽນໃນອາຄານ PUV ຫ້ອງ 101 ແລະ ຫ້ອງ 201 ໄດ້ເລີ່ມລົງມືມາແຕ່ຕົ້ນປີ 2019 ໂດຍມີການປະສານງານ ພົວພັນ ແລະ ດຳເນີນໂຄງການຕາມລະບຽບຂອງ ມຊ ເຊິ່ງທັງສອງຝ່າຍໄດ້ສະແດງເຈດຈຳນົງທີ່ຖືກຕ້ອງ ແລະ ໄດ້ຮັບອະນຸມັດຢ່າງເປັນທາງການ ພາຍຫຼັງທີ່ໄດ້ຮັບອະນຸຍາດແລ້ວ ໃນຕົ້ນປີ 2020 ບໍລິສັດກໍ່ສ້າງລົງທຶນ ແລະ ຖືຮຸ້ນແຂວງຢູນນານ ຈຳກັດຜູ້ດຽວ ໄດ້ເຂົ້າມາປັບປຸງ ສ້ອມແປງ ແລະ ສຳເລັດໃນເດືອນມິຖຸນາ ມູນຄ່າ 390 ລ້ານກວ່າກີບ ເຊິ່ງເປັນທຶນສະໜັບໜູນຂອງບໍລິສັດກໍ່ສ້າງລົງທຶນ ແລະ ຖືຮຸ້ນແຂວງຢູນນານ ຈຳກັດຜູ້ດຽວ.
ໂຄງການປັບປຸງສ້ອມແປງຄັ້ງນີ້ ໄດ້ປັບປຸງຫ້ອງຮຽນໃນອາຄານ PUV ຫ້ອງ 101 ມາເປັນຫ້ອງອ່ານ ແລະ ຫ້ອງ 201 ມາເປັນຫ້ອງຟັງສຽງ ປ່ຽນຖ່າຍປະຕູ ປ່ອງຢ້ຽມ ໃສ່ຕາໜ່າງກັນຂະໂມຍ ປູກາໂລພື້ນ ຕິດຕັ້ງລະບົບໄຟຟ້າໃໝ່ ລະບົບຄວາມເຢັນ ທາສີ ປະກອບອຸປະກອນເຄື່ອງໃຊ້ເຊັ່ນ ໂຕະ ຕັ່ງ ລະບົບເຄື່ອງສຽງ ກະດານ ຕູ້ໃສ່ປື້ມ-ເອກະສານຕ່າງໆໃສ່ຫ້ອງຟັງສຽງ ແລະ ຫ້ອງອ່ານ ນອກຈາກນີ້ ບໍລິສັດດັ່ງກ່າວຍັງໄດ້ຕິດຕັ້ງຜ້າກັ້ງໃສ່ຫ້ອງປະຊຸມຂອງຄະນະອັກສອນສາດ 1 ຊຸດ ອີກດ້ວຍ.