ສະມາຄົມກູ້ໄພນະຄອນຫຼວງວຽງຈັນ (1624) ຮ່ວມກັບໂຮງແຮມ ລາວເທວ ວຽງຈັນ ບໍລິສັດ ກ້າວໜ້າ ອິນເຕີເທນເມັນ ຈຳກັດ ແລະ ຮ້ານເສື້ອຄຳເພົ້າສັ່ງໄດ້ ໄດ້ເປີດຕົວໂຄງການ ຮ່ວມປັນຮັກ Better together ຂຶ້ນ ເພື່ອສົມທົບທຶນຊ່ວຍເຫຼືອເດັກນ້ອຍທີ່ຢູ່ເຂດຫ່າງໄກ ທີ່ບ້ານຫ້ວຍຕັ້ງນາຍ ເມືອງກາສີ ແຂວງວຽງຈັນ ໃຫ້ໄດ້ມີສະຖານທີ່ໃນການສຶກສາຮ່ຳຮຽນ ເພື່ອໃຫ້ເດັກນ້ອຍໄດ້ຮັບການສຶກສາທີ່ດີໃນອະນາຄົດ.
ພິທີຖະແຫຼງຂ່າວດັ່ງກ່າວ ຈັດຂຶ້ນໃນວັນທີ 29 ກໍລະກົດ 2020 ທີ່ໂຮງແຮມ ລາວເທວ ວຽງຈັນ ນະຄອນຫຼວງວຽງຈັນ ໂດຍການເປັນປະທານຂອງທ່ານນາງ ວົງຈັນ ບົວແພງ ປະທານໂຄງການຮ່ວມປັນຮັກ Better together ແລະ ທ່ານ ນາງ ພອນວິໄລ ແສນປະເສີດ ທີ່ປຶກສາກິດຕິມະສັກ ບໍລິສັດກ້າວໜ້າອິນເຕີເທນເມັນ ຈຳກັດ ມີທ່ານ ສາລີ ນັນທະວົງ ຫົວໜ້າຂະແໜງວັດທະນະທຳ ພະແນກຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ແລະ ຜູ້ຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ວົງຈັນ ບົວແພງ ກ່າວວ່າ: ຈຸດລິເລີ່ມຂອງໂຄງການຮ່ວມປັນຮັກ Better together ໄດ້ເກີດຂຶ້ນຍ້ອນການຕົກລົງເຫັນດີ ແລະ ຮ່ວມມືກັນຈາກຫຼາຍພາກສ່ວນ ເພື່ອຊອກຫາວິທີຊ່ວຍເຫຼືອໃຫ້ນັກຮຽນໄດ້ມີໂອກາດຮຽນຢ່າງຕໍ່ເນື່ອງ ໂດຍສະເພາະນ້ອງໆຢູ່ເຂດຫ່າງໄກສອກຫຼີກ ເຊິ່ງຮູບແບບການລະດົມທຶນ ແມ່ນເປັນການຈັດງານແຟຊັນໂຊ ຫຼື fashion Show ໂດຍຈະມີບັນດານັກອອກແບບ ແລະ ເຈົ້າຂອງຍີ່ຫໍ້ເຄື່ອງປະດັບຊັ້ນແນວໜ້າເຂົ້າຮ່ວມໂຄງການຫຼາຍກວ່າ 20 ຍີ່ຫໍ້.
ທ່ານນາງ ພອນວິໄລ ແສນປະເສີດ ກ່າວວ່າ: ໂຄງການດັ່ງກ່າວນີ້ ຖືເປັນໂຄງການທີ່ດີ ເພາະວ່າ ເມື່ອໄດ້ເຫັນສະພາບໂຮງຮຽນແລ້ວ ໂດຍສະເພາະໃນຍາມຝົນ ນ້ອງໆບໍ່ມີບ່ອນລີ້ຝົນ ເຊິ່ງອ້ອມຝາໂດຍໄມ້ເຮ້ຍ ຈຶ່ງໄດ້ຮ່ວມມືກັນກັບຫຼາຍພາກສ່ວນ ເພື່ອສ້າງໂຮງຮຽນ ເຮັດໂຕະ ຕັ່ງ ຫຼາຍໆຢ່າງ ເຮັດໃຫ້ໂຮງຮຽນຫຼັງນີ້ໃຫ້ເກີດຂຶ້ນ ເພື່ອໃຫ້ນ້ອງໆໄດ້ມີບ່ອນສຶກສາຮ່ຳຮຽນຖາວອນ.
ສຳລັບງານຮ່ວມປັນຮັກ Better together fashion Show Charity ຈະໄດ້ຈັດຂຶ້ນລະຫວ່າງວັນທີ 29-30 ສິງຫາ 2020 ທີ່ໂຮງແຮມ ລາວເທວ ວຽງຈັນ ສຳລັບຜູ້ທີ່ສົນໃຈເຂົ້າຮ່ວມງານ ສາມາດຈັບຈອງຊື້ປີ້ ສຳລັບລູກຄ້າ VIP 5 ແສນກີບ ແລະ ສຳລັບລູກຄ້າທົ່ວໄປ 3 ແສນກີບ ເຊິ່ງທຸກບັດແມ່ນມີຈຳນວນຈຳກັດ ແລະ ເງິນທີ່ໄດ້ຈາກການຈຳໜ່າຍປີ້ ແມ່ນຈະນຳໄປສ້າງໂຮງຮຽນປະສົມສົມບູນບ້ານຫ້ວຍຕັ້ງນາຍ.