ເນື່ອງໃນໂອກາດວັນສ້າງຕັ້ງສື່ມວນຊົນລາວ ແລະ ການພິມຈຳໜ່າຍ ຄົບຮອບ 70 ປີ (13/8/19550-13/8/2020) ເຊິ່ງເປັນວັນໜຶ່ງທີ່ມີຄວາມໝາຍຄວາມສຳຄັນ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວນະຄອນຫຼວງວຽງຈັນ (ຖວທ ນວ) ໄດ້ໃຫ້ທັດສະນະວ່າ: ຍ້ອນໄດ້ຮັບຄວາມເອົາໃຈໃສ່ ແລະ ການຊີ້ນຳ-ນຳພາຂອງຄະນະພັກ ອົງການປົກຄອງ ນວ ແລະ ການນຳກະຊວງ ຖວທ ຈຶ່ງເຮັດໃຫ້ວຽກງານຖະແຫຼງຂ່າວ ສື່ມວນຊົນຢູ່ ນວ ມີການເຕີບໃຫຍ່ຂະຫຍາຍຕົວ ໂດຍລວມແລ້ວ ວຽກງານສື່ມາຮອດປັດຈຸບັນ ມີຄວາມຕັ້ງໜ້າຫຼາຍດ້ານ ມີສະຖານີວິທະຍຸ 2 ຄື້ນຄື: ຄື້ນ 98 ແລະ ຄື້ນ 105,5 ແລະ ໂທລະພາບ ນວ ຊ່ອງ 9 (vt 9) ທີ່ໄດ້ເປີດທ້າຍປີ 2019 ພິເສດ ຍັງມີໜັງສືພິມວຽງຈັນໃໝ່ (ລາຍວັນ) ທີ່ເປັນກະບອກສຽງຂອງ ນວ ສື່ດັ່ງກ່າວເປັນທີ່ຍອມຮັບ ແລະ ນິຍົມຂອງຜູ້ບໍລິໂພກ ບໍ່ວ່າຈະເປັນພະນັກງານ ທະຫານ ຕຳຫຼວດ ນັກທຸລະກິດ ຊາວຄ້າຂາຍ ຕະຫຼອດຮອດປະຊາຊົນບັນດາເຜົ່າ ໂດຍສະເພາະຊາວ ນວ ນອກຈາກຈະມີໜັງພຶມ ວິທະຍຸ ແລະ ໂທລະພາບແລ້ວ ຍັງມີໂຮງພິມ ນວ ທີ່ຮັບໃຊ້ພິມຈຳໜ່າຍສື່ ແລະ ວຽກງານຕ່າງໆຂອງພັກ-ລັດ ຂອງສັງຄົມ ເຊິ່ງບັນດາສື່ຕ່າງໆທີ່ເປັນກະບອກສຽງຂອງ ນວ ໄດ້ຜະລິດລາຍການຂ່າວອອກຮັບໃຊ້ສັງຄົມເປັນຈຳນວນຫຼວງຫຼາຍໃນແຕ່ລະວັນ ທີມງານນັກຂ່າວໄດ້ມີຄວາມຕັ້ງໜ້າ ແລະ ເອົາໃຈໃສ່ຕິດຕາມ ເຄື່ອນໄຫວເກັບກຳຂ່າວການເຄື່ອນໄຫວຂອງການນຳສູນກາງ ການນຳ ນວ ເຫດການຕ່າງໆເກີດຂຶ້ນຢູ່ປະເທດ ແລະ ອື່ນໆ ໄດ້ເອົາໃຈໃສ່ຈົດຈໍ່ນຳມາອອກຂ່າວເພື່ອໃຫ້ຜູ້ຊົມ ຜູ້ຟັງ ແລະ ຜູ້ອ່ານຢູ່ທາງບ້ານໄດ້ຕິດຕາມຮັບຊາບ ພິເສດ ໄລຍະເກີດພະຍາດໂຄວິດ-19 ສື່ ໄດ້ເປັນໝາກຫົວໃຈຫຼັກອັນໜຶ່ງ ເຄື່ອນໄຫວຢ່າງຕັ້ງໜ້າ ຫຼາຍເຂດວຽກງານໄດ້ພັກ ແຕ່ນັກຂ່າວບໍ່ໄດ້ພັກ ຖັດຈາກແພດໝໍກໍແມ່ນນັກຂ່າວທີ່ໄດ້ຕິດຕາມການເຄື່ອນໄຫວຂອງແພດໝໍ ແລະ ໜ່ວຍງານຕ່າງໆທີ່ໄດ້ລົງຊຸກຍູ້ຕິດຕາມ ເຮັດໜ້າທີ່ໂຄສະນາໃຫ້ປະຊາຊົນ ກໍຄືສັງຄົມໄດ້ປ້ອງກັນພະຍາດທີ່ແພດໝໍໄດ້ກຳນົດອອກມາ ສື່ກໍໄດ້ເປັນສື່ກາງທີ່ປະກາດອອກທາງວິທະຍຸ ໂທລະພາບ ໜັງສືພິມ ແລະ ໂທລະໂຄ່ງ ເພື່ອໃຫ້ປະຊາຊົນໄດ້ເຂົ້າໃຈມາດຕະການປ້ອງກັນພະຍາດ ແລະ ຕິດຕາມເອົາຂ່າວຂອງຄົນເຈັບຍ້ອນພະຍາດໂຄວິດ ແລະ ລົງຕິດຕາມເກັບກຳຂ່າວແຮງງານທີ່ມີຄວາມສ່ຽງທີ່ເດີນທາງກັບມາແຕ່ຕ່າງປະເທດ ດັ່ງນັ້ນ ຈຶ່ງເວົ້າໄດ້ວ່າສື່ມີບົດບາດສຳຄັນສົມຄວນ ແລະ ໄດ້ຮັບຄວາມນິຍົມຊົມຊອບຂອງຜູ້ຊົມ ຜູ້ອ່ານ ຜູ້ຟັງຫຼາຍສົມຄວນ ໃນຜ່ານມາກໍຄືໃນປັດຈຸບັນ.
ຄຽງຄູ່ກັບຜົນງານດັ່ງກ່າວ ສື່ພວກເຮົາກໍໄດ້ພົບກັບສິ່ງທ້າທາຍຫຼາຍສົມຄວນ ແນ່ນອນທີ່ປາສະຈາກບໍ່ໄດ້ ເປັນຕົ້ນການຫັນປ່ຽນພຶດຕິກຳຂອງຜູ້ຊົມໃຊ້ຂ່າວ ຜູ້ບໍລິໂພກຂ່າວ ປັດຈຸບັນ ໂລກມີຄວາມທັນສະໄໝ ຍຸກດີຈີຕອນເຂົ້າມາສູ່ສັງຄົມຫຼາຍ ສັງຄົມສ່ວນຫຼາຍບໍ່ມີເວລາທີ່ມານັ່ງອ່ານໜັງສືພິມ ແລະ ນັ່ງເບິ່ງໂທລະພາບ ຫຼາຍຄົນໄດ້ຫັນໄປສູ່ລະບົບທັນສະໄໝ ນຳໃຊ້ອິນເຕີເນັດ ການຟັງເພງ ແລະ ການຕິດຕາມຂ່າວຕ່າງໆຜ່ານທາງມືຖືທີ່ສະດວກສະບາຍ ດັ່ງນັ້ນ ສື່ຕ້ອງໄດ້ຫັນມາເປັນລະບົບອອນລາຍເກືອບໝົດແລ້ວ ຖ້າບໍ່ເຮັດ ຈະບໍ່ມີຜູ້ມາບໍລິໂພກຂ່າວ ທີ່ເປັນສິ່ງທ້າທາຍອັນໜຶ່ງທີ່ສື່ຕ້ອງໄດ້ປັບຕົນເອງ ແລະ ການປັບກໍແມ່ນວັດຖຸອຸປະກອນຕ້ອງໄດ້ຫັນ ປັດຈຸບັນເຄື່ອງມືອຸປະກອນເຕັກນິກຍັງບໍ່ທັນສະໄໝເທົ່າທີ່ຄວນ ຍັງເປັນລະບົບເກົ່າທີ່ຈະເຊື່ອມຕໍ່ໃສ່ລະບົບໃໝ່ຍັງຍາກຢູ່ ນີ້ກໍເປັນຂໍ້ຈຳກັດອັນໜຶ່ງ ບັນຫາເຕັກນິກວິຊາການຍັງມີຈຳກັດ ສື່ບາງຄົນກໍໄດ້ຊອກຮູ້ຮ່ຳຮຽນດ້ວຍທຶນຂອງການຈັດຕັ້ງ ແລະ ທຶນຕົນເອງມາພັດທະນາວຽກງານຕົນເອງ ແຕ່ຖ້າຈະທຽບໃສ່ຕ່າງປະເທດ ກໍຍັງມີຈຳກັດເຊັ່ນດຽວກັນ ງົບປະມານລັດທີ່ຈະເອົາມາສະໜອງໃຫ້ໃນການປັບປຸງວຽກງານສື່ຍັງມີຈຳກັດ ການສ້າງບຸກຄະລາກອນຜ່ານມາ ມີບຸກຄະລາກອນທີ່ເກັ່ງ ແລະ ມີຜົນງານດີເດັ່ນ ຜົນງານການຂຽນຂ່າວ ການປະກາດຂ່າວ ເປັນໂຄຄົກ ວິທະຍາກອນ ນັກຂຽນ ເມື່ອຮອດອາຍຸກະສຽນເຂົ້າບຳນານກໍຮັບບຳນານໄປ ແຕ່ພະນັກງານຜູ້ຈະມາສືບທອດໜຸ່ມນ້ອຍນັ້ນພັດຍັງມີຈຳກັດ ນອກຈາກພອນສະຫວັນແລ້ວ ກໍຍັງມີໂກຕາລັດຖະກອນຍັງມີອັນຫຍຸ້ງຍາກສົມຄວນ ເຮັດໃຫ້ຂາດຊ່ວງການສ້າງພະນັກງານສືບທອດປ່ຽນແທນ 3 ຮຸ່ນ ແຕ່ເຖິງຢ່າງໃດກໍຕາມ ຕ້ອງໄດ້ຄົ້ນຄວ້າປັບປຸງການພັດທະນາວາງແຜນສື່ໄດ້ອີງໃສ່ຍຸດທະສາດຮອດປີ 2025 ທີ່ກະຊວງ ຖວທ ໄດ້ກຳນົດອອກນັ້ນ ຕໍ່ກັບວຽກງານຖະແຫຼງຂ່າວ ຢູ່ໃນ 58 ແຜນງານ 230 ໂຄງການ ໜຶ່ງໃນນັ້ນ ຕ້ອງໄດ້ຫັນເຂົ້າສູ່ການປັບປຸງແບບແຜນການເຄື່ອນໄຫວເຮັດວຽກຂອງວຽກງານສື່ ຕ້ອງໄດ້ຮ່ວມມືກັບພາກທຸລະກິດເຂົ້າມາມີສ່ວນຮ່ວມໃນການພັດທະນາ ເພື່ອເປີດກວ້າງວຽກງານສື່ໃຫ້ມີຄວາມເຕີບໃຫຍ່ ເຂັ້ມແຂງທາງດ້ານທຶນຮອນ ເຕັກນິກວິຊາການ ສາມາດຖອດຖອນບົດຮຽນຈາກຕ່າງປະເທດໄດ້.
ທ້າຍນີ້ ໂອກາດວັນສຳຄັນດັ່ງກ່າວ ຂ້າພະເຈົ້າໃນນາມຕາງໜ້າຄະນະພັກ ຄະນະພະແນກ ຖວທ ນວ ຂໍອວຍໄຊໃຫ້ພອນມາຍັງບັນດາການນຳຜູ້ທີ່ຊີ້ນຳສື່ ແລະ ຜູ້ເຮັດວຽກງານສື່ ຕະຫຼອດເຖິງນັກຂ່າວ ຈົ່ງມີແຕ່ຄວາມສຸກມີຄວາມສຳເລັດໃນໜ້າທີ່ວຽກງານທຸກປະການ.