ພິທີເປີດໂຕສະໂມສອນເອັດທີທີ ເອັຟຊີ ຈັດຂຶ້ນວັນທີ 25 ກໍລະກົດ 2020 ຢູ່ເດີ່ນກີລາເຕະບານຫຍ້າທຽມຊ້າງ 3 ບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ ມີທ່ານ ວິສອນ ພັນທະວົງ ປະທານສະໂມສອນເອັດທີທີ ເອັຟຊີ ທ່ານ ສົມປອງ ທອງມະນີ ຮອງປະທານສະໂມສອນ ທ່ານ ເວີນສະຫວັນ ສີວິໄຊ ຫົວໜ້າຄູເຝິກສະໂມສອນດັ່ງກ່າວ ພ້ອມດ້ວຍບັນດາຜູ້ຕາງໜ້າໃຫ້ການສະໜັບສະໜູນ ຄະນະຄູເຝິກນັກກີລາເຂົ້າຮ່ວມ.
ໂອກາດນີ້ ທ່ານ ວິສອນ ພັນທະວົງ ໄດ້ສະແດງຄວາມຂອບໃຈເປັນຢ່າງສູງມາຍັງຄູເຝິກ ແລະ ນັກກີລາທີ່ຕັດສິນໃຈປະກອບສ່ວນເຫື່ອແຮງທຸ້ມເທເພື່ອສະໂມສອນ ເອັດທີທີ ເອັຟຊີ ຕະຫຼອດໄລຍະທີ່ຜ່ານມາ ເຖິງວ່າທີມພວກເຮົາຈະບໍ່ມີງົບປະມານ ເພື່ອຕອບສະໜອງເປັນຄ່າແຮງງານລາຍເດືອນກໍຕາມ ແຕ່ກໍເຊື່ອໝັ້ນວ່າທຸກຄົນຈະສືບຕໍ່ສ້າງຄວາມຫວັງທີ່ສະໂມສອນຕັ້ງເປົ້າໝາຍໄວ້ຕິດ 1 ໃນ 4 ເພື່ອສ້າງໂອກາດໃຫ້ທີມຂອງພວກເຮົາ ສາມາດເລື່ອນຊັ້ນຂຶ້ນໄປຫຼິ້ນໃນລີກສູງສຸດຂອງປະເທດ ໃຫ້ປາກົດຜົນເປັນຈິງ.
ການແຂ່ງຂັນລາຍການຄອມມານໂດລາວລີກ 2 ໄດ້ເປີດການແຂ່ງຂັນວັນທີ 25 ກໍລະກົດ 2020 ປະກອບມີ 14 ສະໂມສອນເຂົ້າຮ່ວມແຂ່ງຂັນແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດ ຄັດເອົາທີ 1 ແລະ ທີ 2 ຜ່ານເຂົ້າຮອບ 4 ທີມສຸດທ້າຍ ຫຼັງຈາກນັ້ນ ມາຂວາຍກັນເພື່ອປະກົບຄູ່ແຂ່ງຂັນໃນລະບົບໄປ-ກັບ ເພື່ອຫາຄູ່ຊີງຊະນະເລີດ ສຳລັບກຸ່ມ A ປະກອບມີ ວຽງຈັນຢູໄນເຕັດ ເຄພີເອັສ ເອັຟຊີ ກອງທັບ ເອັຟຊີ ກາຣູດາ 369 ເອັຟຊີ ເຮັດບີທີ 941 ເອັຟຊີ ແຄນລາວ ຢູໄນເຕັດ ແລະ ນະຄອນຫຼວງ ເອັຟຊີ ສ່ວນກຸ່ມ B ເມືອງຫາດ ຢູໄນເຕັດ ວິທະຍາໄລ ລາວ-ທ໋ອບ ເອັຟຊີ ວິທະຍາໄລ ເຄວສ ຢູໄນເຕັດ ບີແກນ ຢູໄນເຕັດ ເອັດທີທີ ເອັຟຊີ ທຣີນີຕີ ເອັຟຊີ ແລະ ເອັດຊີອີ ຢູໄນເຕັດ.