Tadashi Yanai ຜູ້ບໍລິຫານລະດັບສູງ Uniqlo ໃຫ້ສຳພາດບອກວ່າ ກຳລັງຜະລິດຜ້າອັດປາກ ພ້ອມວາງຂາຍໄລຍະພັກຮ້ອນ ຫຼື ພາຍໃນເດືອນສິງຫານີ້ (ຍາມຮ້ອນຂອງຍີ່ປຸ່ນຄືໄລຍະເດືອນມິຖຸນາ ເຖິງເດືອນສິງຫາ) ໂດຍພ້ອມຈຳໜ່າຍທຸກຊ່ອງທາງທັງໜ້າຮ້ານ ແລະ ອີຄອມເມິຊ.
ສິ່ງທີ່ໜ້າສົນໃຈຄື ຜ້າອັດປາກຂອງ Uniqlo ຈະໃຊ້ວັດຖຸດິບ ແລະ ເຕັກໂນໂລຊີຕົວດຽວກັນກັບທີ່ໃຊ້ຜະລິດເຄື່ອງນຸ່ງພາຍໃຕ້ຍີ່ຫໍ້ “AIRism” ຊຶ່ງມີຄຸນສົມບັດທີ່ເປັນເອກະລັກ ໂດຍເມື່ອສວມໃສ່ແລ້ວຈະຮູ້ສຶກເຢັນ ລວມເຖິງລະບາຍອາກາດໄດ້ດີ ແຫ້ງໄວ ແລະ ແນ່ນອນວ່າຊັກລ້າງເພື່ອໃຊ້ຊ້ຳໄດ້.
ໃນໄລຍະເດືອນທີ່ຜ່ານມາ ຫຼາຍຍີ່ຫໍ້ຄ້າຍ່ອຍທົ່ວໂລກ ມຸ່ງໝັ້ນໃນການເຮັດຜ້າອັດປາກທັງແຈກລ້າໆ ແລະ ຈຳໜ່າຍ ແຕ່ Uniqlo ເປັນໜຶ່ງໃນບໍລິສັດໃຫຍ່ ທີ່ບໍ່ໄດ້ອອກມາດຳເນີນ ການເລື່ອງນີ້ແຕ່ຢ່າງໃດ (ຍີ່ຫໍ້ຢ່າງ Sharp ທຸ່ມຜະລິດຜ້າອັດປາກຢ່າງເຕັມທີ່ ແຕ່ກໍບໍ່ພຽງພໍຕໍ່ຄວາມຕ້ອງການແຖມຍັງຂາດແຄນ ວັດຖຸດິບຊັ້ນສູງໃນການຜະລິດອີກດ້ວຍ).
ກ່ອນໜ້ານີ້ເມື່ອເດືອນເມສາ ຜູ້ບໍລິຫານລະດັບສູງຂອງ Uniqlo ເຄີຍໃຫ້ສຳພາດໄວ້ວ່າ ທາງບໍລິສັດບໍ່ມີຈຸດປະສົງອັນໃດທີ່ຈະຜະລິດຜ້າອັດປາກ ເພາະທຸລະກິດຫຼັກຂອງເຮົາຄືການຜະລິດເຄື່ອງນຸ່ງຫົ່ມຈຳໜ່າຍ ດັ່ງນັ້ນ ການຜະລິດຜ້າອັດປາກຂອງ Uniqlo ໃນຄັ້ງນີ້ ຈຶ່ງມາຈາກຄວາມຕ້ອງການຂອງຕະຫຼາດ ແລະ ຜູ້ບໍລິໂພກທີ່ຮຽກຮ້ອງເຂົ້າມາຈຳນວນຫຼາຍ.
ຢ່າງໃດກໍຕາມ ຜູ້ບໍລິຫານສັນຍາໄວ້ວ່າ ທາງ Uniqlo ມີແຜນຈະບໍລິຈາກຜ້າອັດປາກ ຈຳນວນ 5 ລ້ານອັນ ແລະ ລວມເຖິງຊຸດສຳລັບບຸຄະລາກອນທາງການແພດ ເພື່ອໃຊ້ໃນການປະຕິບັດງານດ້ວຍ.