ໃນບົດປະຈຳວັນນີ້ ຜູ້ຂຽນໄດ້ສັງລວມເອົາບົດຮຽນການນຳໃຊ້ກັນຊາ ຢ່າງຖືກຕ້ອງຕາມກົດໝາຍມາເລົ່າສູ່ຟັງ ຢູ່ປະເທດລາວພວກເຮົາ ກັນຊາ ຈັດເປັນປະເພດຢາເສບຕິດໃຫ້ໂທດ ທີ່ຕ້ອງຫ້າມຕາມກົດໝາຍ ແຕ່ພ້ອມດຽວກັນນັ້ນ ທາງການກໍໄດ້ມີທິດທາງສຶກສາຄົ້ນຄວ້າ ການນຳໃຊ້ກັນຊາທີ່ຖືກກົດໝາຍໃນທາງການແພດ.
ທີ່ອົດສະຕຣາລີ: ໃນວັນທີ 25 ກັນຍາ 2019 ລັດຖະສະພາອົດສະຕຣາລີ ໄດ້ລົງມະຕິຮັບຮອງເອົາກົດໝາຍທີ່ອະນຸຍາດໃຫ້ປະຊາຊົນທີ່ມີອາຍຸ ແຕ່ 18 ປີຂຶ້ນໄປ ສາມາດຄອບຄອງກັນຊາແຫ້ງ ເພື່ອສຳລັບໃຊ້ສ່ວນຕົວໄດ້ບໍ່ເກີນ 50 ກຣາມ/ຄົນ ຫຼື ສາມາດປູກຕົ້ນກັນຊາເອົາເອງໄດ້ບໍ່ເກີນ ຄົນລະ 2 ຕົ້ນ ແລະ ສູງສຸດບໍ່ເກີນ 4 ຕົ້ນຕໍ່ໜຶ່ງຄົວເຮືອນ ກົດໝາຍສະບັບນີ້ມີຜົນບັງຄັບໃຊ້ແຕ່ວັນທີ 1 ມັງກອນ ປີ 2020 ເປັນຕົ້ນມາ ພາຍຫຼັງກົດໝາຍສະບັບນີ້ອອກມາ ນະຄອນຫຼວງແຄນເບີຣາ (ລັດແຄນເບີຣາ) ກໍໄດ້ອອກກົດໝາຍຮັບຮອງການນຳໃຊ້ ແລະ ປູກກັນຊາໃນປະລິມານໜ້ອຍຢ່າງຖືກຕ້ອງຕາມກົດໝາຍ ເພື່ອເປົ້າໝາຍບໍລິໂພກ ຂ່າວບອກວ່າ ກົດໝາຍຢາເສບຕິດຂອງອົດສະຕຣາລີ ຍັງກຳນົດໃຫ້ກັນຊາເປັນຢາເສບຕິດທີ່ຕ້ອງຫ້າມຄືເກົ່າ ຟັງເບິ່ງແລ້ວຄືສີຂັດໆກັນລະຫວ່າງການຫ້າມກັບການໃຫ້.
ທີ່ລຸກຊຳບວກ: ໃນກາງເດືອນສິງຫາ 2019 ທາງການປະເທດລຸກຊຳບວກ ໄດ້ເປີດເຜີຍໃຫ້ຮູ້ເຖິງແຜນຜ່ອນຜັນກົດໝາຍວ່າດ້ວຍຢາເສບຕິດ ທີ່ໄດ້ນຳໃຊ້ມາແລ້ວເຖິງ 50 ປີ ໂດຍຈະອະນຸຍາດໃຫ້ປະຊາຊົນທີ່ມີອາຍຸແຕ່ 18 ປີຂຶ້ນໄປ ສາມາດຊື້ກັນຊາມາເສບ ເພື່ອຄວາມຜ່ອນຄາຍ ພາຍຫຼັງກົດໝາຍໄດ້ຖືກຮັບຮອງ (ໃນທ້າຍປີ 2019) ແຕ່ກໍມີການກຳນົດຫ້າມປູກກັນຊາເອົາເອງຢູ່ເຮືອນ ຫຼື ທີ່ພັກຂອງຕົນ ສ່ວນນັກທ່ອງທ່ຽວຕ່າງປະເທດນັ້ນ ຫ້າມຊື້-ຂາຍ ຫຼື ນຳໃຊ້ກັນຊາໃນປະເທດລຸກຊຳບວກຢ່າງເດັດຂາດ ໄວໜຸ່ມລຸກຊຳບວກທີ່ມີອາຍຸລະຫວ່າງ 12-17 ປີ ຖ້າພົບເຫັນວ່າມີກັນຊາປະມານ 5 ກຣາມ ໄວ້ໃນຄອບຄອງ ຈະບໍ່ຖືກດຳເນີນຄະດີທາງອາຍາ ແຕ່ຖ້າກາຍຈຳນວນດັ່ງກ່າວ ກໍຈະຖືກດຳເນີນຄະດີຢ່າງໜັກໜ່ວງ.
ທີ່ສະຫະລັດອາເມຣິກາ: ຂ່າວຕ່າງປະເທດໃນກາງເດືອນກໍລະກົດ 2019 ໃຫ້ຮູ້ວ່າ ຢູ່ສະຫະລັດອາເມຣິກາ ນັ້ນ ມີ 33 ລັດແລ້ວ ທີ່ອະນຸຍາດໃຫ້ໃຊ້ກັນຊາໄດ້ຢ່າງຖືກຕ້ອງຕາມກົດໝາຍ ໃນທາງການແພດເທົ່ານັ້ນ ແລະ ມີພຽງ 10 ລັດທີ່ອະນຸຍາດໃຫ້ນຳໃຊ້ກັນຊາ ເພື່ອຄວາມຜ່ອນຄາຍ ກົດໝາຍກ່ຽວກັບກັນຊາຂອງທຸກໆລັດ ກຳນົດຫ້າມບຸກຄົນອາຍຸຕ່ຳກວ່າ 18 ປີເສບກັນຊາ ຂ່າວໃຫ້ຮູ້ຕື່ມວ່າ ໃນບັນດາລັດທີ່ອະນຸຍາດໃຫ້ເສບກັນຊາໄດ້ນັ້ນ ຈຳນວນຊາວໜຸ່ມທີ່ເສບກັນຊາໄດ້ຫຼຸດລົງເກືອບ 10% ນີ້ຄືຜົນສຳຫຼວດຂອງມະຫາວິທະຍາໄລ ລັດມອນຕານາ.
ທີ່ນິວຊີແລນ: ຂ່າວນີ້ອ່າວເກົ່າ ອອກມາໃນທ້າຍປີ 2017 ຊຶ່ງບອກວ່າ ໃນຕອນນັ້ນ ພັກຂຽວ ຊຶ່ງເປັນພັກຂອງນາຍົກນິວຊີແລນຄົນປັດຈຸບັນ ໄດ້ມີເປົ້າໝາຍການລົງປະຊາມະຕິກ່ຽວກັບການໃຊ້ກັນຊາ ເພື່ອຄວາມຜ່ອນຄາຍ ກ່ອນໜ້ານັ້ນ ພັກຂຽວກໍເຄີຍພະຍາຍາມປ່ຽນແປງກົດໝາຍ ເພື່ອເຮັດໃຫ້ການຄອບຄອງ ແລະ ນຳໃຊ້ກັນຊາຖືກຕ້ອງຕາມກົດໝາຍ ໃນຕອນນັ້ນ ທາງການນິວຊີແລນ ວາງເປົ້າໝາຍຜ່ານກົດໝາຍເລື່ອງກັນຊາໃຫ້ສຳເລັດພາຍໃນປີ 2020 ນີ້ເອງ ກົດໝາຍຈະເນັ້ນການນຳໃຊ້ກັນຊາຂອງສ່ວນບຸກຄົນ ລວມທັງການຄອບຄອງ ແລະ ການປູກ ກົດໝາຍຈະກຳນົດອາຍຸຂອງບຸກຄົນ ທີ່ຈະສາມາດນຳໃຊ້ກັນຊາອື່ນໆໃຫ້ລະອຽດຕື່ມ.