ເພື່ອແນໃສ່ເຮັດໃຫ້ການສົ່ງເສີມພາກທຸລະກິດ ໂດຍສະເພາະ ການຂະຫຍາຍຕະຫຼາດໂດຍຜ່ານການຮ່ວມມືລະຫວ່າງນັກທຸລະກິດລາວ ແລະ ຍີ່ປຸ່ນ ໃຫ້ກວ້າງຂວາງ ເພື່ອເປີດໂອກາດໃຫ້ຫົວໜ່ວຍທຸລະກິດທີ່ເຂົ້າຮ່ວມຄັດເລືອກໄດ້ຮຽນຮູ້ ແລະ ປັບປຸງຜະລິດຕະພັນຂອງຕົນເພື່ອຈຳໜ່າຍສົ່ງອອກໄປປະເທດຍີ່ປຸ່ນໃຫ້ຫຼາຍຂຶ້ນ ເພື່ອປະກອບສ່ວນເຂົ້າໃນການຮ່ວມມື ກໍຄື ພັດທະນາເສດຖະກິດ-ສັງຄົມລະຫວ່າງສອງປະເທດໃຫ້ເຕີບໃຫຍ່ເຂັ້ມແຂງ.
ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ໂດຍໄດ້ຮັບການສະໜັບສະໜູນຈາກອົງການ JICA ປະຈຳລາວ ໄດ້ຈັດງານຄັດເລືອກຜະລິດຕະພັນຫັດຖະກຳລາວ ຂຶ້ນວັນທີ 26 ກຸມພາ 2020 ທີ່ສະຖາບັນດັ່ງກ່າວ ໂດຍເປັນປະທານຂອງທ່ານ ບຸນລ້ວນ ດ້ວງເງິນ ຜູ້ອຳນວຍການສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ມີທ່ານ ສົມສີ ຍໍພັນໄຊ ອະທິການບໍດີມະຫາວິທະຍາໄລແຫ່ງຊາດ ທ່ານ Yoshiharu YONEYAMA ຫົວໜ້າອົງການ JICA ປະຈຳລາວ ພ້ອມດ້ວຍຊ່ຽວຊານບໍລິສັດ Felissemo ປະເທດຍີ່ປຸ່ນ ແລະ ພາກສ່ວນກ່ຽວຂ້ອງເຂົ້າຮ່ວມ.
ການຄັດເລືອກຄັ້ງນີ້ ໄດ້ເຊີນຜູ້ຊ່ຽວຊານຈາກບໍລິສັດ Felissimo ເຊິ່ງເປັນບໍລິສັດນຳໜ້າ ດ້ານການນຳເຂົ້າຂອງປະເທດຍີ່ປຸ່ນ ມາເປັນຄະນະກຳມະການໃຫ້ຄະແນນ ເພື່ອຄັດເລືອກເອົາບັນດາຜະລິດຕະພັນ ທີ່ສາມາດພັດທະນາຕໍ່ໃຫ້ໄດ້ມາດຕະຖານສົ່ງອອກໄປຍີ່ປຸ່ນ ຕາມຕະຫຼາດຕ້ອງການ ມີທັງໝົດ 48 ຜະລິດຕະພັນ ແລະ 10 ແນວຄວາມຄິດອອກແບບເຂົ້າຮ່ວມ ໃນນັ້ນ ຜ່ານການຄັດເລືອກສາມາດເລືອກໄດ້ 10 ຜະລິດຕະພັນ ແລະ 3 ແນວຄວາມຄິດອອກແບບທີ່ສາມາດນຳໄປພັດທະນາ ແລະ ປັບປຸງໃຫ້ດີຂຶ້ນ ເພື່ອສົ່ງອອກເປັນຜະລິດຕະພັນຫັດຖະກຳ.
ນອກນີ້ ໃນງານຍັງໄດ້ຮັບຊົມການນຳສະເໜີແນວຄວາມຄິດ ແລະ ຜະລິດຕະພັນຫັດຖະກຳຂອງນັກສຶກສາ ແລະ ຜູ້ປະກອບການທີ່ນຳໃຊ້ວັດຖຸດິບ ແລະ ອຸປະກອນຂອງລາວເຮົາ ເພື່ອຜະລິດເປັນເຄື່ອງຫັດຖະກຳທີ່ຈະສົ່ງໄປປະເທດຍີ່ປຸ່ນ ຕື່ມອີກ.