ພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ ແລະ ຮັບຮອງເມືອງໄຊເຊດຖາເປັນເມືອງສະຫະພັນແມ່ຍິງ 3 ດີ ປະຈຳປີ 2015-2020 ຈັດຂຶ້ນວັນທີ 27 ກໍລະກົດ 2020 ທີ່ສຳນັກງານປົກຄອງເມືອງໄຊເຊດຖາ ມີທ່ານ ໂພຄຳ ໄຊຍະສອນ ເຈົ້າເມືອງໄຊເຊດຖາ ທ່ານ ນາງ ບົວລອນ ວົງດາລາແສນ ປະທານສະຫະພັນແມ່ຍິງ ນະຄອນຫຼວງວຽງຈັນ ພ້ອມດ້ວຍຄະນະບໍລິຫານສະຫະພັນແມ່ຍິງເມືອງ ປ້າອາວຸໂສ ແລະ ສະຫະພັນແມ່ຍິງບ້ານເຂົ້າຮ່ວມ.
ທ່ານ ນາງ ມະນີສົດ ຈິດຕະວົງ ປະທານສະຫະພັນແມ່ຍິງເມືອງໄຊເຊດຖາ ໄດ້ລາຍງານການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງເມືອງຕົນ 5 ປີຜ່ານມາ (2015-2020) ວ່າ: ສະຫະພັນແມ່ຍິງເມືອງໄຊເຊດຖາໄດ້ນຳພາສະມາຊິກແມ່ຍິງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງລາວຄື: ພົນລະເມືອງດີ ພັດທະນາດີ ແລະ ສ້າງຄອບຄົວດີ ຕິດພັນກັບການຈັດຕັ້ງປະຕິບັດ 3 ສ້າງ ຂະບວນການຮັກຊາດ ຮັກພັດທະນາ ສ້າງໜ່ວຍພັກປອດໃສເຂັ້ມແຂງ ສ້າງຄອບຄົວ ແລະ ພັດທະນາບ້ານແບບຢ່າງທາງດ້ານສາທາລະນະສຸກ ບ້ານວັດທະນະທຳ ບ້ານປອດຄະດີ ຕ້ານ ແລະ ສະກັດກັ້ນປາກົດການຫຍໍ້ທໍ້ທີ່ເກີດຂຶ້ນໃນສັງຄົມ ປະຕິບັດນະໂຍບາຍ 6 ສ ຂອງນະຄອນຫຼວງວຽງຈັນ ເຊິ່ງສະຫະພັນແມ່ຍິງໄດ້ນຳພາຄະນະສະຫະພັນແມ່ຍິງຢູ່ແຕ່ລະຮາກຖານບ້ານ ໂຮງຮຽນ ຫ້ອງການອ້ອມຂ້າງເມືອງ ເກັບກຳຂໍ້ມູນ ແລະ ວາງແຜນເພື່ອເປີດຂະບວນການແຂ່ງຂັນ 3 ດີ ໃຫ້ບັນດາກຸ່ມເປົ້າໝາຍ ຜ່ານການຈັດຕັ້ງປະຕິບັດໂຄງການ ເຮັດໃຫ້ສະມາຊິກແມ່ຍິງ ແລະ ໜ່ວຍແມ່ຍິງແຕ່ລະຮາກຖານໄດ້ຮັບນາມມະຍົດເປັນແມ່ຍິງ 3 ດີ ທີ່ເປັນພື້ນຖານໃຫ້ແກ່ກ້າວໄປສູ່ເມືອງ 3 ດີ.
ສຳລັບທິດທາງແຜນການຕໍ່ໜ້າ ເພີ່ມທະວີສຶກສາອົບຮົມການເມືອງ ນຳພາແນວຄິດ ໂດຍຖືເອົາການຈັດຕັ້ງເຜີຍແຜ່ເນື້ອໃນຂໍ້ແຂ່ງຂັນ 3 ດີ ຕິດພັນກັບລະບຽບກົດໝາຍ ເອກະສານສຳຄັນຕ່າງໆທີ່ກ່ຽວກັບວຽກງານປິ່ນອ້ອມໃຫ້ຖັນແຖວສະມາຊິກສະຫະພັນແມ່ຍິງ ແມ່ຍິງລາວບັນດາເຜົ່າ ຕະຫຼອດຮອດເພດຊາຍທີ່ມີອາຍຸ 15 ປີຂຶ້ນໄປ ພາຍໃນເມືອງໄຊເຊດຖາໃຫ້ເປັນປົກກະຕິແຕ່ລະໄລຍະ ປັບປຸງການຈັດຕັ້ງສະຫະພັນແມ່ຍິງຂັ້ນຮາກຖານໃຫ້ມີຄວາມໜັກແໜ້ນເຂັ້ມແຂງ ຂະຫຍາຍອົງການຈັດຕັ້ງແມ່ຍິງໄປສູ່ໂຮງຮຽນ ໂຮງຈັກໂຮງງານທີ່ມີເພດຍິງອາຍຸ 15 ປີຂຶ້ນໄປ ໃຫ້ເປັນມະຫາຊົນກ້າວໜ້າໃນຂົງເຂດວຽກງານທັງພາກລັດ ແລະ ເອກະຊົນ ພ້ອມກັນສືບຕໍ່ປຸກລະດົມຄະນະສະຫະພັນແມ່ຍິງແຕ່ລະຂັ້ນ ເອົາໃຈໃສ່ນຳພາຕິດຕາມ ກວດກາ ຕີລາຄາຄັດເລືອກຜົນງານການຈັດຕັ້ງປະຕິບັດວຽກງານແຕ່ລະໄລຍະໃຫ້ເປັນປົກກະຕິ.