ກອງປະຊຸມໃຫຍ່ ຄັ້ງທີ IX ສະມາຄົມຫັດຖະກຳລາວ (ສຫລ) ຈັດຂຶ້ນວັນທີ 29 ກໍລະກົດ 2020 ຢູ່ໂຮງແຮມແລນມາກ ຣີເວີໄຊ ນະຄອນຫຼວງວຽງຈັນ ໂດຍເປັນປະທານຂອງທ່ານ ຫານຊະນະ ສີສານ ປະທານສະມາຄົມຫັດຖະກຳລາວ ມີທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ ທ່ານນາງ ນາລີ ສີສຸລິດ ທີ່ປຶກສາກິຕິມະສັກ ສຫລ ພ້ອມດ້ວຍຜູ້ຕາງໜ້າຈາກສະມາຄົມຕ່າງໆ ຊ່າງຫັດຖະກຳລາວ ແລະ ແຂກຖືກເຊີນເຂົ້າຮ່ວມ.
ທ່ານ ຫານຊະນະ ສີສານ ໄດ້ຜ່ານບົດສະຫຼຸບການເຄື່ອນໄຫວວຽກງານ ສຫລ ປີ 2017-2019 ແລະ ທິດທາງແຜນການຕໍ່ໜ້າ (ສຫລ ເປັນອົງການຈັດຕັ້ງທີ່ບໍ່ຫວັງຜົນກຳໄລ ແລະ ເຄື່ອນໄຫວພາຍໃຕ້ການຊີ້ນຳຂອງສະພາການຄ້າ ແລະ ອຸດສາຫະກຳແຫ່ງຊາດລາວ ສ້າງຕັ້ງຂຶ້ນປີ 1998 ມີພາລະບົບບາດເຕົ້າໂຮມເອົາຊາວຊ່າງຫັດຖະກຳລາວ ເພື່ອພ້ອມກັນອະນຸຮັກ-ຮັກສາພູມປັນຍາທາງດ້ານຫັດຖະກຳ ເຊິ່ງເປັນມໍລະດົກວັດທະນະທຳໃຫ້ຄົງຢູ່ກັບສັງຄົມລາວ ສຫລ ປະກອບດ້ວຍສະມາຊິກທີ່ເປັນຫົວໜ່ວຍທຸລະກິດຫັດຖະກຳ 125 ຫົວໜ່ວຍ ມີສາຂາທີ່ຂຶ້ນກັບຢູ່ບັນດາແຂວງຕ່າງໆເຊັ່ນ: ແຂວງຫົວພັນ ຊຽງຂວາງ ຫຼວງພະບາງ ວຽງຈັນ ສະຫວັນນະເຂດ ແລະ ແຂວງຈຳປາສັກ ຂະແໜງ ຫັດຖະກຳປະກອບມີ 7 ຂະແໜງການເຊັ່ນ: ຂະແໜງຕ່ຳຜ້າພື້ນເມືອງ (ໄໝ ຝ້າຍ) ຂະແໜງຈັກສານໄມ້ປ່ອງ-ຫວາຍ ຂະແໜງປັ້ນດິນເຜົາ ຂະແໜງຕີເງິນ-ວັດຖຸມີຄ່າ ຂະແໜງຜະລິດຕະພັນວັດທະນະທຳປັ້ນຫຼໍ່ໂລຫະ ຄວັດໄມ້ ຂະແໜງວັດຖຸເສດເຫຼືອ (ເຈັ້ຍເສດ ໄມ້ເສດ) ແລະ ຂະແໜງປູກມອນລ້ຽງມ້ອນ ແລະ ປູກພືດໃຫ້ສີທຳມະຊາດ.
ກອງປະຊຸມຄັ້ງປະຖົມມະເລີກຂອງຄະນະບໍລິຫານງານ ສຫລ ຄັ້ງທີ VIII ໄດ້ຕົກລົງເຫັນດີໃຫ້ມີປະທານ ຮອງປະທານ 3 ທ່ານ ຄະນະບໍລິຫານງານ 7 ທ່ານ ແລະ ຄະນະກວດກາ 3 ທ່ານ ນອກນີ້ ຍັງມີຄະນະທີ່ປຶກສາ 12 ທ່ານ ຕະຫຼອດໄລຍະ 3 ປີຜ່ານມາ ສຫລ ໄດ້ສ້າງຜົນງານ ແລະ ໄດ້ຮັບລາງວັນຊະນະເລີດການແຂ່ງຂັນຜ້າໄໝອາຊຽນ (ລາງວັນທີ 1) ຮ້ານສີໄຄຫັດຖະກຳ ແລະ ລາງວັນທີ 3 ບໍລິສັດ ປູກມອນລ້ຽງມ້ອນ ແລະ ສາວໄໝແຂວງຊຽງຂວາງ ນີ້ກໍແມ່ນໜຶ່ງຜົນງານທີ່ສະມາຊິກໄດ້ສ້າງຂຶ້ນ ອັນເປັນໃບໜ້າຂອງປະເທດຊາດດ້ານສີໄມ້ລາຍມືຂອງຊາວຊ່າງຫັດຖະກຳລາວ ພ້ອມນີ້ ສຫລ ຮ່ວມກັບສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ເປັນເຈົ້າພາບຈັດງານມະຫະກຳສີມືຫັດຖະກຳລາວຂຶ້ນທຸກປີ ຢູ່ສູນການຄ້າລາວ-ໄອເຕັກ ພາຍໃນງານຈະມີຫຼາຍກິດຈະກຳເຊັ່ນ: ງານສະແດງ ແລະ ຂາຍສິນຄ້າຫັດຖະກຳ ແຂ່ງຂັນຜະລິດຕະພັນດີເດັ່ນ ສາທິດວິທີການຜະລິດຫັດຖະກຳຂອງບັນດາຊາວຊ່າງຫັດຖະກຳລາວ ການສຳມະນາຫົວຂໍ້ຕ່າງໆ ການເດີນແບບໃນຊຸດອາພອນ ແລະ ເຄື່ອງປະດັບລາວ.
ໂດຍລວມແລ້ວ ສຫລ ໄດ້ມີຜົນງານ ແລະ ຄວາມເສຍສະຫຼະດ້ານເຫື່ອແຮງ ສະຕິປັນຍາ ແລະ ອື່ນໆເຂົ້າໃນວຽກງານການສົ່ງເສີມ ແລະ ພັດທະນາວຽກງານຫັດຖະກຳຂອງຄະນະບໍລິຫານງານໃນໄລຍະຜ່ານມາ ລັດຖະບານລາວຈຶ່ງໄດ້ມີການຍ້ອງຍໍໃຫ້ກົມກອງ ແລະ ບຸກຄົນ ໃນນີ້ ສຫລ ໄດ້ຮັບຫຼຽນໄຊແຮງງານ ຊັ້ນ 1 ຊັ້ນ 2 ແລະ ຊັ້ນ 3 ລວມທັງໝົດ 10 ຫຼຽນ.
ສຳລັບທິດທາງແຜນການປີ 2020-2023 ຈະປັບປຸງກົດລະບຽບພາຍໃນບາງມາດຕາທີ່ເຫັນວ່າບໍ່ສອດຄ່ອງກັບສະພາບຕົວຈິງ ສ້າງຕັ້ງສູນວາງສະແດງ ແລະ ຂາຍສິນຄ້າຫັດຖະກຳລາວໃນຄອນຫຼວງ ເພື່ອເປັນການຊ່ວຍເຫຼືອສະມາຊິກ ກໍຄືຊາວຊ່າງຫັດຖະກຳທີ່ບໍ່ມີຕະຫຼາດຈຳໜ່າຍສິນຄ້າ ແລະ ອີກດ້ານໜຶ່ງ ເພື່ອເປັນບ່ອນໂຄສະນາເຜີຍແຜ່ສີໄມ້ລາຍມືຂອງຊາວຊ່າງຫັດຖະກຳລາວໃຫ້ບັນດາແຂກ ແລະ ນັກທ່ອງທ່ຽວໄດ້ເຂົ້າຢ້ຽມຊົມ ຊອກຫາແຫຼ່ງທຶນເພື່ອສົ່ງເສີມ ແລະ ພັດທະນາຄວາມຮູ້ດ້ານການອອກແບບ ການຕະຫຼາດໃຫ້ສະມາຊິກຊາວຊ່າງຫັດຖະກຳທຸກແຂວງ ຊຸກຍູ້ຜູ້ຜະລິດສິນຄ້າຫັດຖະກຳໃຫ້ມີຄຸນະພາບດີຂຶ້ນໃນແຕ່ລະໄລຍະ ພ້ອມທັງສາມາດຂະຫຍາຍການສົ່ງອອກສິນຄ້າຫັດຖະກຳແບບກວ້າງຂວາງ ແລະ ອື່ນໆ.
ກອງປະຊຸມຄັ້ງນີ້ໄດ້ປ່ອນບັດເລືອກຕັ້ງເອົາຄະນະບໍລິຫານງານຊຸດໃໝ່ 9 ທ່ານ ໂດຍໄດ້ເລືອກເອົາທ່ານ ນາງ ສຸວິຕາ ປະເສີດ ເປັນປະທານສະມາຄົມຫັດຖະກຳລາວຄົນໃໝ່.