ວັນທີ 24 ກໍລະກົດ 2020 ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ພ້ອມຄະນະໄດ້ລົງຊຸກຍູ້ວຽກງານຂະບວນການຊາວໝຸ່ມຢູ່ເມືອງໄຊທານີ ນະຄອນຫຼວງວຽງຈັນ (ນວ) ເພື່ອສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ VII ຄະນະບໍລິຫານງານຊາວໝຸ່ມ ນວ ທີ່ຈະຈັດຂຶ້ນໃນມໍ່ໆນີ້ ແລະ ວັນສຳຄັນຕ່າງໆຂອງຊາດ ຂອງພັກ ມີທ່ານ ອາດສະພັງທອງ ສີພັນດອນ ຮອງເຈົ້າຄອງ ນວ ທ່ານ ຄຳປະດິດ ເຂັມມານິດ ເຈົ້າເມືອງໄຊທານີ ທ່ານ ນາງ ສຸມາລີ ທຳມະວົງ ເລຂາຄະນະບໍລິຫານງານຊາວໝຸ່ມ ນວ ທ່ານເລຂາຄະນະບໍລິຫານງານຊາວໝຸ່ມເມືອງໄຊທານີ ແລະ ພະແນກການອ້ອມຂ້າງ ນວ ເຂົ້າຮ່ວມ.
ການລົງຊຸກຍູ້ວຽກງານຄັ້ງນີ້ ໄດ້ພົບປະໂອ້ລົມກັບອຳນາດການປົກຄອງເມືອງໄຊທານີ ຮັບຟັງລາຍງານສະພາບລວມຈຸດພິເສດ ແລະ ທ່າແຮງບົ່ມຊ້ອນຂອງເມືອງ ຈາກນັ້ນ ໄດ້ສືບຕໍ່ລົງເຮັດວຽກຢູ່ບ້ານໂນນແຕ້ ຖືກຕ້ອນຮັບໂດຍອຳນາດການປົກຄອງ ປະຊາຊົນ ແລະ ສະມາຊິກຊາວໜຸ່ມບ້ານໂນນແຕ້ ໃນນັ້ນໄດ້ຮັບຟັງລາຍງານສະພາບລວມຂອງບ້ານ ແລະ ການເຄື່ອນໄຫວວຽກງານຊາວໝຸ່ມຈາກນາຍບ້ານວ່າ: ບ້ານໂນນແຕ້ ມີ 257 ຄອບຄົວ 275 ຫຼັງຄາເຮືອນ ມີປະຊາກອນທັງໝົດ 1.379 ຄົນ ຍິງ 662 ຄົນ ມີຊາວໜຸ່ມ-ໄວໜຸ່ມ 155 ຄົນ ຍິງ 52 ຄົນ ໃນນັ້ນເປັນສະມາຊິກຊາວໝຸ່ມປະຊາຊົນປະຕິວັດລາວ 19 ຄົນ ອາຊີບຫຼັກຂອງປະຊາຊົນແມ່ນປູກຝັງ-ລ້ຽງສັດ ຊາວນາ ຊາວສວນ ແລະ ກຳມະກອນ ກວມ 80% ມີເນື້ອທີ່ທັງໝົດ 265,5 ເຮັກຕາ ມີເນື້ອທີ່ນາປີ 71,3 ເຮັກຕາ ເນື້ອທີ່ປູກພືດຜັກຕ່າງໆ 21 ເຮັກຕາ ມີກຸ່ມປູກຜັກອິນຊີ 1 ກຸ່ມ 52 ຄອບຄົວ ມີເນື້ອທີ່ 13 ເຮັກຕາ ສະເລ່ຍຜົນຜະລິດ 268 ໂຕນຕໍ່ປີ ມີຄອບຄົວປູກຜັກສະອາດ 53 ຄອບຄົວ ເນື້ອທີ່ 9 ເຮັກຕາ ສະເລ່ຍຜົນຜະລິດ 420 ໂຕນຕໍ່ປີ.
ຈາກນັ້ນ ທ່ານເລຂາຄະນະບໍລິຫານງານສູນກາງຊາວໜຸ່ມ ປປລ ໄດ້ໂອ້ລົມ ພ້ອມຮັບຮັບຟັງ ແລະ ແລກປ່ຽນຄຳຄິດຄຳເຫັນນຳປະຊົນຊົນບ້ານດັ່ງກ່າວ ແລະ ມອບເງິນຈຳນວນໜຶ່ງເພື່ອຊຸກຍູ້ຂະບວນການຊາວໜຸ່ມເມືອງໄຊທານີ ແລະ ຊາວໜຸ່ມບ້ານໂນນແຕ້ ຈາກນັ້ນໄດ້ລົງໄປເບິ່ງຕົວຈິງ ຄອບຄົວການປູກຜັກປອດສານພິດ ບ້ານໂນນແຕ້ ແລະ ໄດ້ຮ່ວມກິດຈະກຳແຂ່ງຂັນກີລາບານເຕະ ແລະ ກີລາດຶງເຊືອກ ເພື່ອສ້າງຄວາມສາມັກຄີຮັກແພງກັບຊາວໝຸ່ມບ້ານໂນນແຕ້.