ເພື່ອສ້າງຄວາມເຂັ້ມແຂງແກ່ພະນັກງານຄູເຝິກຂັ້ນແຂວງ ບັນດາກົມ ໃນຂະແໜງການທ່ອງທ່ຽວດ້ານທັກສະການນຳສະເໜີ ໃຫ້ສາມາດເປັນຄູເຝິກທີ່ມີຄວາມຊຳນານງານ ໃຫ້ກັບບັນດາຂະແໜງທ່ອງທ່ຽວພາຍໃນເມືອງ ວັນທີ 29 ກໍລະກົດ 2020 ທີ່ສະຖາບັນວິທະຍາສາດ-ສັງຄົມແຫ່ງຊາດ ສະຖາບັນສື່ມວນຊົນ ວັດທະນະທຳ ແລະ ທ່ອງທ່ຽວ ຈັດພິທີເປີດຊຸດເຝິກອົບຮົມຄູເຝິກໃນຂະແໜງການທ່ອງທ່ຽວຂຶ້ນ ໂດຍມີທ່ານ ວິໄລທອງ ສີຊານົນ ຫົວໜ້າສະຖາບັນສື່ມວນຊົນ ວັດທະນະທຳ ແລະ ທ່ອງທ່ຽວ ຕາງໜ້າໂຄງການທັກສະດ້ານການທ່ອງທ່ຽວ ໂຄງການລາວ 029 ພ້ອມດ້ວຍຜູ້ອຳນວຍການສູນແທັກໂດ ຂະແໜງການກ່ຽວຂ້ອງ ແລະ ສຳມະນາກອນເຂົ້າຮ່ວມ.
ໂດຍປະຕິບັດຕາມວິໄສທັດປີ 2030 ແລະ ແຜນພັດທະນາຖະແຫຼງຂ່າວວັດທະນະທຳ ແລະ ທ່ອງທ່ຽວ (ຖວທ) ຍຸດທະສາດສ້າງຄວາມເຂັ້ມແຂງໃຫ້ແກ່ບຸກຄະລາກອນໃນຂະແໜງການທ່ອງທ່ຽວ ເຊິ່ງໄດ້ກຳນົດເອົາການສ້າງ ແລະ ຍົກລະດັບໃນຂະແໜງທ່ອງທ່ຽວເປັນບູລິມະສິດອັນສຳຄັນ ໄລຍະຜ່ານມາ ສະຖາບັນໄດ້ສ້າງຫຼັກສູດເຝິກອົບຮົມໄລຍະສັ້ນ ຄູ່ມື ຕຳລາການຮຽນ-ການສອນ ສ້າງຄູເຝິກ ຈັດຕັ້ງການເຝິກອົບຮົມໄລຍະສັ້ນດ້ວຍຫຼາຍຮູບແບບ ທັງແບບເຄື່ອນທີ່ ແລະ ແບບເຝິກປະຈຳ ເຊິ່ງໄດ້ປະກອບສ່ວນອັນສຳຄັນເຂົ້າໃນການພັດທະນາບຸກຄະລາກອນໃນຂົງເຂດ ຖວທ.
ສຳລັບຜູ້ເຂົ້າຮ່ວມຄັ້ງນີ້ ແມ່ນພະນັກງານຂະແໜງທ່ອງທ່ຽວ 16 ແຂວງ ແລະ ນະຄອນຫຼວງວຽງຈັນ ບັນດາກົມອ້ອມຂ້າງ ເຊິ່ງໄດ້ຮຽນຮູ້ບົດບາດ ແລະ ຄວາມສຳຄັນຂອງຄູເຝິກ ການກະກຽມການນຳສະເໜີ ວິທີກຳນົດຈຸດປະສົງຂອງການນຳສະເໜີ ການທຳຄວາມຮູ້ຈັກກ່ຽວຜູ້ເຂົ້າຮ່ວມ ການກຳນົດໂຄງສ້າງຂອງບົດສະເໜີ ການກຳນົດເວລາການນຳສະເໜີ ພາບລວມຂອງການສື່ສານ ການຄວບຄຸມຄວາມຕື່ນເຕັ້ນ ຄວາມສຳຄັນຂອງສຽງ ແລະ ການຄວບຄຸມສຽງ ແລະ ການນຳສະເໜີ ຊຸດເຝິກອົບຮົມຄັ້ງນີ້ ໄດ້ຮັບການສະໜັບສະໜູນຈາກໂຄງການທັກສະດ້ານການທ່ອງທ່ຽວໂຄງການລາວ 029.