ການປະຕິບັດພັນທະຂອງ ສປປ ລາວ ວ່າດ້ວຍເອກະສານດັດແກ້ກິກາລີໄດ້ຖືກຈັດຕັ້ງປະຕິບັດ ແລະ ເຜີຍແຜ່ເປັນທີ່ກວ້າງຂວາງ ສົມຄູ່ກັບການຍົກລະດັບເຕັກນິກວິຊາການໃຫ້ພາກສ່ວນທີ່ກ່ຽວຂ້ອງ ໃນວຽກງານການຫຼຸດຜ່ອນ ແລະ ນຳໃຊ້ສານເຄມີທີ່ທຳລາຍຊັ້ນໂອໂຊນ ເຊິ່ງພາກລັດປະກອບດ້ວຍເຈົ້າໜ້າທີ່ພາສີປະຈຳດ່ານຕ່າງໆ ສະຖາບັນສຶກສາວິຊາຊີບການຊ່າງໄຟຟ້າ ກົມກອງຮອບຂ້າງກະຊວງພະລັງງານ ແລະ ບໍ່ແຮ່ ກະຊວງອຸດສາຫະກຳ ແລະ ການຄ້າ ກະຊວງປ້ອງກັນຄວາມສະຫງົບ ແລະ ກະຊວງປ້ອງກັນຊາດ ສ່ວນພາກເອກະຊົນປະກອບດ້ວຍສະມາຄົມເຄື່ອງເຢັນ ຜູ້ປະກອບການນາຍຊ່າງເຮັດຄວາມເຢັນ ເຊິ່ງໄລຍະຜ່ານມາມີທັງການຈັດກອງປະຊຸມສຳມະນາໃນຫົວຂໍ້ຕ່າງໆ ແລະ ເຝິກອົບຮົມຕົວຈິງໃນຂອບເຂດທົ່ວປະເທດ ສະເພາະກອງປະຊຸມສຳມະນາສ້າງຄວາມສາມາດ ປະຢັດພະລັງງານ ແລະ ມາດຕະຖານຄວາມປອດໄພພາຍໃຕ້ເອກະສານດັດແກ້ກິກາລີ.
ກົມຄວບຄຸມ ແລະ ຕິດຕາມກວດກາມົນລະພິດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຈັດຂຶ້ນເປັນຄັ້ງທຳອິດ ໂດຍຮ່ວມມືກັບສະຖາບັນສົ່ງເສີມພະລັງງານທົດແທນ ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມສຳມະນາສ້າງຄວາມສາມາດປະຢັດພະລັງງານ ແລະ ມາດຕະຖານຄວາມປອດໄພ ພາຍໃຕ້ເອກະສານດັດແກ້ກິກາລີຕາມຂອບໜ້າວຽກການນຳໃຊ້ພະລັງງານເປັນມິດກັບສິ່ງແວດລ້ອມ ຫຼຸດຜ່ອນສະພາບໂລກຮ້ອນ ຮັບປະກັນປະສິດທິຜົນປົກປ້ອງຊັ້ນໂອໂຊນ ຂຶ້ນໃນວັນທີ 13-14 ກໍລະກົດ 2020 ທີ່ແຂວງວຽງຈັນ.
ທ່ານ ເທວະຣັກ ພອນແກ້ວ ຮອງຫົວໜ້າກົມຄວບຄຸມ ແລະ ຕິດຕາມກວດກາມົນລະພິດ ກ່າວວ່າ: ການຈັດກອງປະຊຸມໃນຄັ້ງນີ້ ເປັນກອງປະຊຸມກ່ຽວກັບການນຳໃຊ້ພະລັງງານທົດແທນ ການນຳໃຊ້ພະລັງງານແບບມີປະສິດທິພາບ ປະສິດທິຜົນ ນຳໃຊ້ມາດຕະການຄວາມປອດໄພ ເຊິ່ງບັນຫານີ້ເປັນບັນຫາທີ່ມີຄວາມສຳຄັນໃນການປະຢັດພະລັງງານ ແລະ ຫຼຸດຜ່ອນພາວະໂລກຮ້ອນ ເຊິ່ງກອງປະຊຸມສຳມະນາຄັ້ງນີ້ ໄດ້ວິທະຍາກອນໄດ້ສຸມໃສ່ເຜີຍແຜ່ໃຫ້ຄວາມຮູ້ກ່ຽວກັບການນຳໃຊ້ພະລັງງານ ການນຳເຂົ້າເຄື່ອງໄຟຟ້າ ໂດຍສະເພາະ ເຄື່ອງຮັບຄວາມເຢັນພາຍໃຕ້ການຄວບຄຸມ ແລະ ຢຸດຕິການນຳໃຊ້ສານເຄມີທີ່ທຳລາຍຊັ້ນໂອໂຊນ ສອດຄ່ອງກັບເອກກະສານສະບັບດັດແກ້ກິກາລີ.
ທ່ານ ເສີມຄຳ ທຸມມະວົງສາ ຮອງຫົວໜ້າສະຖາບັນສົ່ງເສີມພະລັງງານທົດແທນ ໄດ້ກ່າວວ່າ: ນະໂຍບາຍວ່າດ້ວຍການປະຢັດ ແລະ ອະນຸຮັກພະລັງງານນີ້ ໄດ້ເນັ້ນໃສ່ 4 ຂະແໜງການ ຄື: ພາກອຸດສາຫະກຳ ຕຶກອາຄານ ສຳນັກງານ ພາກທີ່ຢູ່ອາໄສ ແລະ ການຄົມມະນາຄົມຂົນສົ່ງ ຈຸດປະສົງຂອງນະໂຍບາຍການອະນຸຮັກ ແລະ ປະຢັດພະລັງງານ ແມ່ນເນັ້ນໃສ່ເພື່ອຫຼຸດຜ່ອນການປະຢັດພະລັງງານໃຫ້ໄດ້ 10% ຮອດປີ 2030 ຕາມຈັງຫວະການຂະຫຍາຍຕົວຂອງເສດຖະກິດ.
ທ່ານ ເຂັມພອນ ຈັນທະວອນ ປະທານສະມາຄົມນາຍຊ່າງເຄື່ອງເຮັດຄວາມເຢັນ ຜູ້ປະກອບການທຸລະກິດເຄື່ອງເຢັນ ໄດ້ກ່າວວ່າ: ປະເທດລາວຂອງພວກເຮົາ ສ່ວນໃຫຍ່ແມ່ນໄດ້ນຳໃຊ້ເຄື່ອງໄຟຟ້າທີ່ກິນໄຟນັ້ນ ກໍຍ້ອນສັງຄົມຍັງບໍ່ທັນຮັບຮູ້ວ່າເຄື່ອງໄຟຟ້າໃນຮູບແບບໃດ ທີ່ສາມາດນຳໃຊ້ແລ້ວປະຢັດພະລັງງານໄຟຟ້າ ຈຶ່ງເຮັດໃຫ້ການນຳໃຊ້ພະລັງງານໄຟຟ້າສູງ ສົ່ງຜົນໃຫ້ຜູ້ຊົມໃຊ້ຕ້ອງໄດ້ຈ່າຍຄ່າໄຟຟ້າແພງ ສະນັ້ນ ຈຶ່ງຂໍແນະນຳໃຊ້ຜູ້ຊົມໃຊ້ທີ່ຕ້ອງການຊື້ແອຕ້ອງຊື້ແອທີ່ມີຄຸນນະພາບປະຢັດພະລັງງານ ເຊິ່ງໃນມໍ່ນີ້ ສປປ ລາວ ກໍຈະມີກາໝາຍເບີ 5 ມາຕິດໃສ່ເຄື່ອງໄຟຟ້າ ເພື່ອຊ່ວຍໃຫ້ຜູ້ຊົມໃຊ້ຮູ້ໄດ້ວ່າເປັນເຄື່ອງໄຟຟ້າທີ່ປະຢັດໄຟ ສຳລັບການເລືອກໃຊ້ບໍລິການນາຍຊ່າງແອ ກໍຕ້ອງເລືອກໃຊ້ບໍລິການນາຍຊ່າງແອທີ່ມີໃບອະນຸຍາດ ເພື່ອຮັບປະກັນມາດຕະຖານໃນການຕິດຕັ້ງ ເພື່ອໃຫ້ສາມາດປະຢັດພະລັງງານ ແລະ ໃນຕໍ່ໜ້ານັ້ນ ນ່າຍຊ່າງແອທຸກຄົນ ຕ້ອງມີໃບຮັບຮອງນາຍຊ່າງ ຈຶ່ງສາມາດມາເປີດໃຫ້ບໍລິການຕິດຕັ້ງແອໄດ້ນັ້ນ ກໍເພື່ອແນໃສ່ຮັບປະກັນໄດ້ດ້ານຄຸນນະພາບໃນການຕິດຕັ້ງຊ່ວຍປະຢັດພະລັງງານ ທັງເປັນການຫຼຸດຜ່ອນລາຍຈ່າຍຄ່າໄຟຟ້າໄດ້ນຳອີກ.