ອີງຕາມຂໍ້ມູນຂອງເພຈຂ່າວສານ ປກສ ໃຫ້ຮູ້ວ່າ: ວັນທີ 16 ກໍລະກົດ 2020 ຄະນະສານອາຍາສານປະຊາຊົນຂັ້ນຕົ້ນ ນະຄອນຫຼວງວຽງຈັນ (ນວ) ໄດ້ຕັດສິນຈຳຄຸກຕະຫຼອດຊີວິດຈຳເລີຍຄະດີຄ້າຂາຍຢາເສບຕິດປະເພດຢາບ້າ ແລະ ຢາໄອສ ຕາມຄຳສັ່ງຟ້ອງຂອງອົງການໄອຍະການປະຊາຊົນ ພ້ອມປັບໃໝເງິນ 500 ລ້ານກີບ.
ຈາກສຳນວນຄະດີ ຈຳເລີຍຊື່ທ້າວ ພອນຜາສຸກ ຫຼື ພຸ ອາຍຸ 56 ປີ ພັກເຊົ່າຢູ່ບ້ານນາຄູນ ເມືອງນາຊາຍທອງ ນວ ຖືກເຈົ້າໜ້າທີ່ຕຳຫຼວດກັກຕົວມາດຳເນີນຄະດີວັນທີ 6 ມີນາ 2019 ພ້ອມຢາບ້າ 900 ເມັດ ແລະ ຢາໄອສ 1 ຫຼອດນ້ອຍ ກ່ອນທີ່ຈຳເລີຍຈະຖືກຈັບນັ້ນຈຳເລີຍໄດ້ເຄື່ອນໄຫວເສບ ແລະ ຊື້-ຂາຍຢາບ້າມາແຕ່ຕົ້ນປີ 2012 ໂດຍຊື້ຢາບ້ານຳທ້າວ ສິງ ບໍ່ຮູ້ບ້ານຢູ່ ຊື້ຄັ້ງລະ 10-15 ມັດ (ມັດລະ 2.000 ເມັດ) ແລະ ຊື້ນຳທ້າວ ສົມບັດ ຢູ່ບ້ານນາຄູນ ຊື້ນຳທ້າວ ອະນຸໄຊ ຢູ່ບ້ານນາສ້ຽວ ເມືອງນາຊາຍທອງ ຄັ້ງລະ 1-3 ມັດ ແລະ ຜ່ານມາເຄີຍຊື້ຫຼາຍຄັ້ງຈົນບໍ່ສາມາດຈື່ຈຳນວນຄັ້ງໄດ້ ມາຮອດເດືອນພຶດສະພາ 2018 ມີຄົນໂທລະສັບສັ່ງຊື້ຢາບ້າ 1 ມັດ ຈາກນັ້ນຈຳເລີຍໄດ້ຈ້າງຄົນເອົາຢາບ້າໄປສົ່ງໃຫ້ຜູ້ສັ່ງຊື້ ແຕ່ພວກກ່ຽວທັງສອງຄົນຖືກເຈົ້າໜ້າທີ່ ປກສ ຈັບຕົວພ້ອມຂອງກາງ ພາຍຫຼັງທີ່ຈຳເລີຍຮູ້ວ່າຜູ້ທີ່ໃຫ້ ໄປສົ່ງທັງສອງຖືກຈັບ ໄດ້ພາເມຍຊື່ນາງ ໝູນ ໜີອອກຈາກເຮືອນເຊົ່າຢູ່ບ້ານຊຽງດາ ເມືອງໄຊເສດຖາ ໄປເຊົ່າຫ້ອງແຖວຢູ່ບ້ານດົງຊ້າງຫີນ ເມືອງໄຊທານີ ໃນມື້ດັ່ງກ່າວນັ້ນເຈົ້າໜ້າທີ່ໄດ້ເຂົ້າກວດຄົ້ນເຮືອນເຊົ່າທີ່ຈຳເລີຍເຊົ່າຢູ່ບ້ານຊຽງດາພົບຢາບ້າ 13 ຖົງ ລວມມີຢາບ້າ 2.233 ເມັດ ແລະ ຢາໄອສ 4 ຫຼອດນ້ອຍ.
ພາຍຫຼັງທີ່ຈຳເລີຍໜີມາເຊົ່າຫ້ອງແຖວຢູ່ເຂດບ້ານດົງຊ້າງຫີນຍັງສືບຕໍ່ເຄື່ອນໄຫວຄ້າຂາຍຢາເສບຕິດ ໂດຍຕິດຕໍ່ພົວພັນໄດ້ຊື້ຢາບ້ານຳທ້າວ ທອງເພັດ ບໍ່ຮູ້ທີ່ຢູ່ ຊື້ຄັ້ງລະ 2 ມັດ ຜ່ານມາຊື້ຈຳນວນຫຼາຍຄັ້ງ ໃນໄລຍະນີ້ຈຳເລີຍໄດ້ຜິດຖຽງກັບເມຍແລ້ວໜີອອກຈາກຫ້ອງເຊົ່າ ມາຮອດວັນທີ 13 ກໍລະກົດ 2018 ເຈົ້າໜ້າທີ່ ປກສ ໄດ້ເຂົ້າກວດຄົ້ນຫ້ອງເຊົ່ານາງ ໝູນ (ເມຍຂອງຈຳເລີຍ) ພົບຢາບ້າ 1 ມັດກັບ 5 ຖົງ ລວມມີຢາບ້າ 3.000 ເມັດ ແມ່ນຂອງຈຳເລີຍຊື້ມາໄວ້ຂາຍກ່ອນທີ່ທັງສອງຈະມີການຜິດຖຽງກັນ ແລະ ຍັງໄດ້ພົບປື້ມບັນທຶກທີ່ບຸກຄົນຕິດໜີ້ຄ່າຢາບ້າປະມານ 10 ກວ່າຄົນ ພາຍຫຼັງທີ່ຈຳເລີຍຜິດຖຽງກັບເມຍກໍໜີໄປເຊົ່າຫ້ອງແຖວຢູ່ເຂດບ້ານນາຄູນ ແລະ ໄດ້ຊື້ຢາບ້ານຳທ້າວ ສົມບັດ ບໍ່ຮູ້ທີ່ຢູ່ຈຳນວນ 2 ຄັ້ງ ຄັ້ງລະ 5 ຖົງ (ຖົງລະ 200 ເມັດ) ມາຮອດວັນທີ 6 ມີນາ 2019 ຖືກເຈົ້າໜ້າທີ່ ປກສ ຈັບຕົວພ້ອມຢາບ້າ 900 ເມັດ ແລະ ຢາໄອສ 1 ຫຼອດນ້ອຍ.
ດ້ວຍເຫດຜົນ ແລະ ຫຼັກຖານທີ່ກ່າວມາຂ້າງເທິງນັ້ນມີຂໍ້ມູນໜັກແໜ້ນ ແລະ ພຽງພໍໃນການຢັ້ງຢືນວ່າທ້າວ ພອນຜາສຸກ ຫຼື ພຸ ເປັນຜູ້ກະທຳຜິດຕາມຂໍ້ກ່າວຫາແທ້ ສະນັ້ນ ຄະນະສານອາຍາສານປະຊາຊົນຂັ້ນຕົ້ນ ນວ ຈຶ່ງໄດ້ພິຈາລະນາຕັດສິນຈຳຄຸກຕະຫຼອດຊີວິດ ພ້ອມປັບໃໝ 500 ລ້ານກີບ ສ່ວນຜູ້ພົວພັນກັບຈຳເລີຍນັ້ນປັດຈຸບັນຖືກເຈົ້າໜ້າທີ່ ປກສ ນຳຕົວມາດຳເນີນຄະດີຕາມກົດໝາຍແລ້ວ.