ທີ່ອິນໂດເນເຊຍ: ກ່ອນໜ້ານີ້ປະມານ 3 ປີກວ່າໆ ກະຊວງການຕ່າງປະເທດອິນໂດເນເຊຍ ໄດ້ສ້າງຕັ້ງເຄືອຄ່າຍແອບປະລິເຄຊັນ ຫຼື ແອບ (APP) ເພື່ອຄວາມປອດໄພໃນການເດີນທາງ (Safe Travel app) ໂດຍມີເປົ້າໝາຍສະໜອງຂໍ້ມູນຂ່າວສານສຳລັບປະຊາຊົນອິນໂດເນເຊຍ ທີ່ເດີນທາງໄປຕ່າງປະເທດ ບໍ່ວ່າຈະເປັນການເດີນທາງຊົ່ວຄາວ ຫຼື ເປັນເວລາດົນນານ ຄວາມພິເສດຂອງແອບທີ່ວ່ານີ້ ກໍຄື ມັນສາມາດບັນທຶກຈຳນວນ ແລະ ສະຖານທີ່ຂອງຄົນອິນໂດເນເຊຍ ເວລາເຄື່ອນໄຫວ ຫຼື ທ່ອງທ່ຽວຢູ່ຕ່າງປະເທດໄດ້ຢ່າງລະອຽດ ແອບ ເພື່ອຄວາມປອດໄພໃນການເດີນທາງນີ້ ເຊື່ອມຕໍ່ກັບຖານຂໍ້ມູນຂອງກະຊວງການຕ່າງປະເທດ ຂໍ້ມູນທີ່ບັນຈຸໃນແອບລວມມີຄວາມຮູ້ທົ່ວໄປກ່ຽວກັບບັນດາປະເທດປາຍທາງທີ່ຊາວອິນໂດເນເຊຍ ເດີນທາງໄປ ຂໍ້ແນະນຳກ່ຽວກັບຄວາມປອດໄພ ແລະ ລາຍລະອຽດກ່ຽວກັບສະຖານທູດ-ສະຖານກົງສູນອິນໂດເນເຊຍ ທີ່ຢູ່ໃກ້ທີ່ສຸດ ພິເສດ ແອບນີ້ຍັງມີປຸ່ມ “ສຸກເສີນ” ເພື່ອໃຫ້ຊາວອິນໂດເນເຊຍ ຢູ່ຕ່າງປະເທດໃຊ້ເວລາຕ້ອງການຄວາມຊ່ວຍເຫຼືອດ່ວນ ປຸ່ມສຸກເສີນນີ້ ເຊື່ອມໂຍງກັບລະບົບໂທລະສັບສາຍດ່ວນຂອງກະຊວງການຕ່າງປະເທດ ກໍຄື ສະຖານທູດ-ສະຖານກົງສູນອິນໂດເນເຊຍ ຢູ່ຕ່າງປະເທດ ທີ່ໃກ້ຕົວຜູ້ຕ້ອງການການຊ່ວຍເຫຼືອທີ່ສຸດ ປຸ່ມສຸກເສີນຈະບອກລາຍລະອຽດກ່ຽວກັບບ່ອນຢູ່ ແລະ ຮູບພາບ ຫຼື ວີດີໂອຂອງຜູ້ຕ້ອງການຄວາມຊ່ວຍເຫຼືອດ່ວນ ແບບເພື່ອຄວາມປອດໄພໃນການເດີນທາງໄດ້ສ້າງຂຶ້ນໃນປີ 2016 ໂດຍການຮ່ວມມືຂອງພາກສ່ວນຕ່າງໆ ເຊັ່ນ ບັນດາຫ້ອງການທ່ອງທ່ຽວ ກຸ່ມບໍລິສັດປະກັນໄພ ຊຸມນັກທ່ອງທ່ຽວປະຢັດ ກຸ່ມສົ່ງເສີມແຮງງານເຄື່ອນຍ້າຍ ແລະ ສັງຄົມຊາວອິນໂດເນເຊຍ ທີ່ອາໄສຢູ່ຕ່າງປະເທດ.
ທີ່ ສ ເກົາຫຼີ: ແຫຼ່ງຂ່າວຕ່າງປະເທດໃຫ້ຮູ້ວ່າ ສ ເກົາຫຼີ ມີແຜນປັບປຸງ ແລະ ເພີ່ມທະວີຄວາມປອດໄພຢ່າງຄົບຊຸດ ໃຫ້ເຮືອຫາປານ້ຳເລິກ ລວມທັງການປ່ຽນຖ່າຍເຮືອທີ່ມີອາຍຸໃຊ້ງານເກົ່າແກ່ເກີນກຳນົດ ກໍຄື ການປັບປຸງຊີວິດການເປັນຢູ່ ແລະ ເງື່ອນໄຂການເຮັດວຽກຂອງພະນັກງານປະຈຳເຮືອປະມົງ ທັງໝົດໃຫ້ໄດ້ລະດັບມາດຕະຖານສາກົນ ຂ່າວບອກວ່າ ເຮືອຫາປານ້ຳເລິກຂອງ ສ ເກົາຫຼີ ສ່ວນຫຼາຍແມ່ນສ້າງໃນຊຸມປີ 1980 ແລະ 1990 ເຮືອທີ່ເປັນເປົ້າໝາຍປ່ຽນຖ່າຍ ກໍຄື ຈຳພວກທີ່ມີອາຍຸໃຊ້ງານມາແລ້ວເປັນເວລາ 40 ປີຂຶ້ນໄປ ນອກຈາກນັ້ນຈຳນວນເຮືອທີ່ມີອາຍຸໃຊ້ງານມາແລ້ວ 35 ປີ ຫຼື ນານກວ່ານັ້ນ ກໍຈະຖືກກວດກາມາດຕະຖານຄວາມປອດໄພຄືນທັງໝົດ ທາງການ ສ ເກົາຫຼີ ເຫັນວ່າ ບັນດາເຮືອອາຍຸສູງເຫຼົ່ານີ້ສ່ຽງທີ່ຈະເກີດອຸບັດເຫດໄດ້ງ່າຍ ເພື່ອບັນລຸແຜນປັບປຸງຄວາມປອດໄພຂອງເຮືອຫາປານ້ຳເລິກນີ້ ຈຳເປັນຕ້ອງມີງົບປະມານສູງເຖິງ 170 ຕື້ວອນ (ເທົ່າກັບ 146 ລ້ານໂດລາສະຫະລັດ) ໃນນັ້ນ ເບື້ອງລັດຈະປະກອບສ່ວນ 85 ຕື້ວອນ ສ່ວນເຫຼືອແມ່ນທຶນຂົນຂວາຍຈາກບັນດາເຈົ້າຂອງເຮືອ ແລະ ບໍລິສັດການເງິນຕ່າງໆ ສ່ວນການປັບປຸງຄຸນນະພາບຊີວິດ ແລະ ເງື່ອນໄຂການເຮັດວຽກຂອງບັນດາລູກເຮືອນັ້ນ ຈະເນັ້ນຂະຫຍາຍຂະໜາດບ່ອນພັກຂອງພວກເຂົາເຈົ້າໃນເຮືອ ເງື່ອນໄຂການເຂົ້າເຖິງລະບົບອິນເຕີເນັດ ແລະ ການເບິ່ງແຍງສຸຂະພາບທາງການແພດ ພ້ອມດຽວກັນກໍຈະເພີ່ມຄວາມຮັບຮູ້ ແລະ ເຂົ້າໃຈກ່ຽວກັບກົດໝາຍແຮງງານສຳລັບບັນດານາຍຈ້າງ ສ ເກົາຫຼີ ມີແຜນເຂົ້າເປັນພາຄີຂໍ້ຕົກລົງຂອງອົງການທາງທະເລສາກົນ ພາຍໃນປີ 2023 ແລະ ສົນທິສັນຍາຂອງອົງການແຮງງານສາກົນ ກ່ຽວກັບຊາວປະມົງພາຍໃນປີ 2025.