ອົງການ ADA ອະນຸມັດທຶນຊ່ວຍເຫຼືອລ້າ ມູນຄ່າ 4.680 ເອີໂຣ ຫຼື ປະມານ 49 ລ້ານກີບ ໃຫ້ສະຖາບັນການເງິນຈຸລະພາກທີ່ຮັບເງິນຝາກ ປະຕູຄຳ (ສກຈຮ ປະຕູຄຳ) ຈັດຊື້ຄອມພິວເຕີ ແລະ ອຸປະກອນປ້ອງກັນພະຍາດໂຄວິດ-19 ເພື່ອປະກອບສ່ວນອຳນວຍຄວາມຄວາມສະດວກໃນການປະຕິບັດວຽກງານຂອງ ສກຈຮ ປະຕູຄຳ ກໍຄືການພົວພັນ ແລະ ປຶກສາຫາລື ລະຫວ່າງ ສກຈຮ ປະຕູຄຳ ກັບພາກສ່ວນກ່ຽວຂ້ອງ ຜ່ານກອງປະຊຸມທາງໄກ ໂດຍສະເພາະໃນໄລຍະການແຜ່ລະບາດຂອງພະຍາດໂຄວິດ-19.
ສະຖາບັນການເງິນຈຸລະພາກທີ່ຮັບເງິນຝາກ ປະຕູຄຳ ເປັນສະມາຊິກຂອງສະມາຄົມການເງິນຈຸລະພາກ ພາຍໃຕ້ການຄຸ້ມຄອງຂອງກົມການເງິນຈຸລະພາກ ທະນາຄານແຫ່ງ ສປປ ລາວ ເຊິ່ງເປັນໜຶ່ງໃນບັນດາສະຖາບັນການເງິນຈຸລະພາກໃນ ສປປ ລາວ ທີ່ໄດ້ຂຽນບົດສະເໜີຂໍການຊ່ວຍເຫຼືອດ້ານອຸປະກອນ ເນື່ອງຈາກໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ຈາກອົງການ ADA ເຊິ່ງຜ່ານການຄັດເລືອກ ມີ 3 ສະຖາບັນການເງິນທີ່ໄດ້ຮັບຄັດເລືອກໃຫ້ຮັບທຶນຊ່ວຍເຫຼືອລ້າດັ່ງກ່າວ ຄື: ສກຈຮ ປະຕູຄຳ ສະຫະກອນສິນເຊື່ອ ແລະ ເງິນຝາກປະຢັດ ນາກາຍ ແລະ ສກຈຮ ຈຳປາສັກ.