ກາແດງລາວ ເປັນອົງການໜຶ່ງທີ່ປະຕິບັດໜ້າທີ່ທາງດ້ານມະນຸດສະທຳ ສຸມໃສ່ການຊ່ວຍເຫຼືອບັນເທົ່າທຸກ ແກ້ໄຂຄວາມທຸກຍາກຂອງພໍ່ແມ່ປະຊາຊົນ ໃຫ້ການປະກອບສ່ວນຊ່ວຍເຫຼືອສັງຄົມໃນຫຼາຍຮູບແບບ ທັງປຸກລະດົມຂົນຂວາຍທຶນຮອນທັງພາຍໃນ ແລະ ຕ່າງປະເທດ ໃນການຊຸກຍູ້ສົ່ງເສີມໃນຫຼາຍວຽກງານຂະແໜງການ ຂອບເຂດທົ່ວປະເທດ ໄປຄຽງຄູ່ກັນ ຍັງໃຫ້ການສະໜັບສະໜູນຊຸກຍູ້ຂະບວນການ ໃຫ້ການຊ່ວຍເຫຼືອທາງດ້ານຂະແໜງການສຶກສາໃນຫຼາຍແຂວງ ໃນຂອບເຂດທົ່ວປະເທດ ອັນທີ່ພົ້ນເດັ່ນກວ່າໝູ່ແມ່ນຊາວໜຸ່ມອາສາສະໝັກກາແດງລາວ ຮ່ວມກັບຊາວໜຸ່ມອາສາສະໝັກກາແດງ ສ ເກົາຫຼີ ໃນແຕ່ລະປີ ໄດ້ມີການຮ່ວມມືກັນຈັດກິດຈະກຳ ປັບປຸງ ສ້ອມແປງບັນດາໂຮງຮຽນໃນເຂດຫ່າງໄກ ຂາດເຂີນ ພ້ອມທັງໃຫ້ຄວາມຮູ້ກ່ຽວກັບວຽກງານກາແດງ ການສ້າງເຄືອຂາຍປະສານ ການຕ້ານອຸທົກກະໄພ ແລະ ໄພທຳມະຊາດ ລວມທັງໃຫ້ຄວາມຮູ້ພື້ນຖານ ໃນການປະຖົມພະຍາບານ ໃຫ້ກັບຄູ-ອາຈານ ແລະ ນັກຮຽນນຳອີກ.
ຫຼ້າສຸດ ໃນກາງເດືອນກໍລະກົດ 2020 ຜ່ານມາ ອົງການກາແດງລາວ ມອບອຸປະກອນສ້ອມແປງໂຮງຮຽນ 5 ແຫ່ງ ແລະ ອຸປະກອນເຕືອນໄພລ່ວງໜ້າໃຫ້ 5 ບ້ານ 5 ຄຸ້ມ ເມືອງສະໜາມໄຊ ແຂວງອັດຕະປື ເຊິ່ງພິທີດັ່ງກ່າວ ຈັດຂຶ້ນທີ່ສະໂມສອນບ້ານມິດສຳພັນ ເມືອງສະໜາມໄຊ ແຂວງດັ່ງກ່າວ ກ່າວມອບໂດຍທ່ານ ທອງພະຈັນ ສອນນະສິນ ຮອງປະທານອົງການກາແດງລາວ ຕາງໜ້າຮັບທ່ານ ຄໍຄຽງ ແກ້ວຫອມສົມບັດ ຫົວໜ້າຄະນະຈັດຕັ້ງເມືອງ ພ້ອມດ້ວຍທ່ານ ວຽງໄຊ ໄຊສົມບັດ ຫົວໜ້າຫ້ອງການກາແດງ ແຂວງອັດຕະປື ອຳນາດການປົກຄອງ ພະນັກງານຄູ-ອາຈານ ແລະ ນັກຮຽນເຂົ້າຮ່ວມເປັນສັກຄີພິຍານ.
ໂອກາດດັ່ງກ່າວ ທ່ານ ທອງພະຈັນ ສອນນະສິນ ໄດ້ກ່າວຈຸດປະສົງໃນການລົງມອບເຄື່ອງໃນຄັ້ງນີ້ ໂດຍສະເພາະແມ່ນລົງມອບລະບົບໂທລະໂຄ່ງ ຈຳນວນ 10 ຊຸດ ໃຫ້ແກ່ບ້ານສົ້ມປ່ອຍ ຫາດອຸດົມໄຊ ຕະເງົາ ຫາດຍາວ ຄຸ້ມຫີນສົມບັດ ບ້ານມິດສຳພັນ ຄຸ້ມໂນນກຸງ ຄຸ້ມທ່າເດື່ອ ຄຸ້ມຕະປາກ ແລະ ຄຸ້ມເຊກອງ ແລະ ພິເສດໄດ້ມອບອຸປະກອນສ້ອມແປງໂຮງຮຽນ 5 ໂຮງຮຽນ ຄື: ໂຮງ ຮຽນປະຖົມຫາດຍາວ ປະຖົມຄຸ້ມຫີນສົມບັດ ປະຖົມຕະເງົາ ມັດທະຍົມຕອນຕົ້ນສົ້ມປ່ອຍ ແລະ ໂຮງຮຽນປະຖົມບ້ານຫາດອຸດົມໄຊ ເຊິ່ງໄດ້ຮັບທຶນຊ່ວຍເຫຼືອຈາກອົງການກາແດງລາວ ລວມມູນຄ່າ 123 ລ້ານກວ່າກີບ ເພື່ອປັບປຸງ ສ້ອມແປງອາຄານຮຽນທີ່ເປ່ເພ ຈາກຜົນກະທົບໄພທຳມະຊາດທີ່ຜ່ານມາ.
ທ່ານ ຄໍຄຽງ ແກ້ວຫອມສົມບັດ ໄດ້ກ່າວສະແດງຄວາມຂອບໃຈຕໍ່ອົງການກາແດງລາວ ກໍຄື ພັກ-ລັດຖະບານ ທີ່ໃຫ້ຄວາມເປັນຫວ່ງເປັນໄຍ ໃກ້ຊິດພໍ່ແມ່ປະຊາຊົນ ໂດຍສະເພາະ ພະນັກງານຄູ-ອາຈານ ລູກຫຼານນັກຮຽນໄດ້ນຳເອົາເຄື່ອງມາຊ່ວຍເຫຼືອໃນຄັ້ງນີ້ ຕາງໜ້າອຳນາດການປົກຄອງ ພະນັກງານຄູ-ອາຈານ ແລະ ນັກຮຽນ ຂອບໃຈທີ່ອົງການກາແດງລາວ ກໍຄື ພັກ-ລັດຖະບານ ເອົາໃຈໃສ່ດູແລໃກ້ຊິດສືບຕໍ່ໃຫ້ການຊ່ວຍເຫຼືອຕະຫຼອດມາ ເຊິ່ງອຸປະກອນດັ່ງກ່າວທີ່ໄດ້ຮັບໃນຄັ້ງນີ້ ຈະກາຍເປັນກຳລັງແຮງສຳຄັນ ໃນການປະກອບສ່ວນຊຸກຍູ້ເຮັດໃຫ້ຊີວິດການເປັນຢູ່ຂອງພະນັກງານຄູ-ອາຈານ ແລະ ນັກຮຽນພາຍໃນເມືອງພວກເຮົາ ມີຊີວິດການເປັນຢູ່ດີຂຶ້ນ ເປັນການປະກອບສ່ວນອັນສຳຄັນເຂົ້າໃນວຽກງານການສຶກສາຂອງເມືອງ ແລະ ຈະພ້ອມກັນນຳໃຊ້ອຸປະກອນດັ່ງກ່າວໃຫ້ເກີດປະໂຫຍດສູງສຸດ ແລະ ຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອ ເອົາໃຈໃສ່ເບິ່ງແຍງ ແລະ ສືບຕໍ່ໃຫ້ການຊຸກຍູ້ພວກເຮົາໃນໂອກາດຕໍ່ໄປ.
ນຳສະເໜີໂດຍ: ແວ່ນຂາວ