ຍິ່ງອາຍຸຫຼາຍຂຶ້ນ ຮ່າງກາຍຂອງເຮົາຍິ່ງເສື່ອມສະພາບຕາມໄວ ການເຮັດວຽກຂອງສະໝອງຈຶ່ງບໍ່ເປັນປົກກະຕິດັ່ງເຊັ່ນຄົນໜຸ່ມສາວ ຊຶ່ງສັນຍານທີ່ເປັນເຄື່ອງຢືນຢັນວ່າຫຼັກເລກໄດ້ເຂົ້າສູ່ຜູ້ອາຍຸສູງ ນັ້ນກໍຄື “ການນອນບໍ່ຫຼັບ” ແລະ ມີການຕື່ນໃນໄລຍະກາງເດິກຕະຫຼອດ ອັນເປັນອາການທຳອິດບົ່ງບອກຂອງໂລກຕ່າງໆທາງສະໝອງ.
ສາເຫດຂອງການນອນບໍ່ຫຼັບໃນຜູ້ອາຍຸສູງນອກ ຈາກເກີດຈາກອາຍຸທີ່ປ່ຽນແປງຫຼາຍຂຶ້ນ ເມື່ອອາຍຸເພີ່ມຂຶ້ນ ສະໝອງຂອງຄົນເຮົາຈະເສື່ອມໄປຕາມໄວນັ້ນ ພົບໄດ້ໃນຜູ້ອາຍຸສູງທຸກເພດ ແລະ ເກືອບທຸກຄົນ ເຖິງວ່າຜູ້ອາຍຸສູງຈະມີສຸຂະພາບດີກໍຕາມ ສາເຫດທີ່ສຳຄັນຮອງລົງມາຄືມີໂລກເຊື່ອງຢູ່ພາຍໃນຮ່າງກາຍ ແບ່ງອອກໄດ້ຄື:
1. ຜູ້ອາຍຸສູງທີ່ມີໂລກໃດກໍຕາມ ທີ່ເຮັດໃຫ້ຕື່ນຂຶ້ນມາປັດສະວະຕອນກາງຄືນຕະຫຼອດ ເຮັດໃຫ້ມີຜົນກະທົບໃນການນອນ ຕ້ອງຕື່ນຂຶ້ນມາເຂົ້າຫ້ອງນ້ຳ ເຊັ່ນ: ຜູ້ອາຍຸສູງທີ່ເປັນໂລກເບົາຫວານ ໂລກຕ່ອມໝາກໄຂ່ຫຼັງ ຫຼື ໝາກໄຂ່ຫຼັງຊຳເຮື້ອ ໂລກເຫຼົ່ານີ້ເຮັດໃຫ້ປັດສະວະຕະຫຼອດ.
2. ເກີດມາຈາກຢາລະບົບປະສາດ ຫຼື ສະໝອງ ເຊັ່ນ: ການໃຊ້ຢານອນຫຼັບເປັນໄລຍະເວລາດົນ ການໃຊ້ຢາໃນການຮັກສາໂລກພາຣ໌ກິນສັນ ຫຼື ການໃຊ້ຢາຮັກສາໂລກບາງຊະນິດ ເຊັ່ນ: ຢານ້ຳແກ້ໄອທີ່ມີສ່ວນປະສົມຂອງເຫຼົ້າເຈືອປົນຢູ່ ເມື່ອຜູ້ອາຍຸສູງໃຊ້ຢາເຫຼົ່ານີ້ ຈະສົ່ງຜົນຕໍ່ການນອນບໍ່ຫຼັບ ຊຶ່ງຫາກຜູ້ອາຍຸສູງຢຸດກິນຢາເຫຼົ່ານີ້ ອາການນອນບໍ່ຫຼັບ ກໍຈະຫາຍເຊົາໄປເອງ.
ວິທີປ້ອງກັນ ແລະ ປິ່ນປົວໃຫ້ນອນຫຼັບໄດ້ຫຼາຍຂຶ້ນ
ຄວນຫຼີກລ່ຽງການນອນຫຼັບໃນເວລາກາງເວັນເປັນໄລຍະເວລາດົນໆ ງົດການດື່ມເຫຼົ້າ ຫຼື ເຄື່ອງດື່ມທີ່ມີທາດເຫຼົ້າ ການດື່ມນ້ຳໃນໄລຍະ 4-5 ຊົ່ວໂມງ ກ່ອນເຂົ້ານອນ.
ເລືອກຮັບປະທານອາຫານແລງໃຫ້ເປັນເວລາ ແລະ ຄວນກິນອາຫານທີ່ມີໂປຣຕີນສູງ ພ້ອມທັງເພີ່ມກິດຈະກຳ ຫຼື ອອກກຳລັງກາຍໃນໄລຍະກາງເວັນໃຫ້ຫຼາຍຂຶ້ນ ແລະ ເມື່ອເຖິງເວລານອນ ແຕ່ຜູ້ອາຍຸສູງບໍ່ຢາກນອນ ຄວນຫາກິດຈະກຳໃຫ້ຜູ້ອາຍຸສູງເຮັດ.
ຫ້ອງນອນບໍ່ຄວນສະຫວ່າງເກີນໄປ ເພາະແສງສະຫວ່າງຈະລົບກວນການນອນຫຼັບ ແລະ ເຝິກເຮັດສະມາທິກ່ອນນອນ ເພື່ອໃຫ້ຈິດໃຈສະຫງົບຈະເຮັດໃຫ້ນອນຫຼັບໄດ້ເລິກ ແລະ ເຕັມອິ່ມ.
ທັງນີ້ທັງນັ້ນ ໝັ່ນເຮັດໃຫ້ເປັນຕາຕະລາງ ແລະ ແບບແຜນເທົ່ານີ້ທ່ານກໍຈະຕື່ນຂຶ້ນມາພ້ອມກັບຄວາມສົດຊື່ນຜ່ອງໃສ ເພາະສະໝອງໄດ້ຮັບການພັກຜ່ອນ ແຖມສຸຂະພາບຍັງແຂງແຮງ ຫ່າງໄກໂລກ ບໍ່ຕ່າງກັບໄວໜຸ່ມເມື່ອຕອນອະດີດ…
ວ. ດາລາວົງ – ນຳສະເໜີ