Prior’s Court ໂຮງຮຽນສຳລັບເດັກນ້ອຍຄວາມຈຳເລືອນລາງ (ອໍທິສຕິກ) ໃນເມືອງ Berkshire ຊຶ່ງຢູ່ທາງຕອນໃຕ້ຂອງປະເທດອັງກິດ ໄດ້ນຳເຕັກໂນໂລຊີເໝືອນຈິງ ຫຼື ຊຸດຫູຟັງ VR ມາໃຊ້ໃນໂຮງຮຽນ ໂດຍເຈົ້າໜ້າທີ່ໃນໂຮງຮຽນກໍໄດ້ໃຊ້ເຕັກໂນໂລຊີຂັ້ນສູງນີ້ ເພື່ອການຮຽນຮູ້ເພີ່ມເຕີມກ່ຽວກັບເດັກນັກຮຽນແຕ່ລະຄົນດ້ວຍ.
ຜູ້ທີ່ມີອາການອໍທິສຕິກ ມັກຈະປັບຕົວໃຫ້ເຂົ້າກັບສະຖານທີ່ ແລະ ສະຖານະການທີ່ບໍ່ເຄີຍພົບເຫັນມາກ່ອນໄດ້ຍາກແຕ່ຊຸດຫູຟັງ VR ນີ້ຈະຊ່ວຍໃຫ້ຜູ້ສວມໃສ່ຮູ້ສຶກເໝືອນຢູ່ໃນສະຖານທີ່ຕ່າງໆ ຕົວຢ່າງເຊັ່ນ ຄົນທີ່ສວມຊຸດຫູຟັງ VR ຈະສາມາດເບິ່ງເຫັນສະຖານທີ່ຕ່າງໆໄດ້ເຖິງ 360 ອົງສາໃນຂະນະທີ່ຫັນຫຼັງກັບ ແລະ ຍັງໄດ້ຢິນສຽງຂອງສະຖານທີ່ນັ້ນໆໄດ້ອີກດ້ວຍ.
ຄູຜູ້ສອນທີ່ໂຮງຮຽນ Prior’s Court ໃຊ້ VR ເພື່ອແນະນຳໃຫ້ເດັກນ້ອຍ ໄດ້ຮູ້ຈັກກັບສະຖານະການຕ່າງໆ ເຊັ່ນ ການໄປຫ້າງສັບພະສິນຄ້າ ຫຼື ການຂຶ້ນເຮືອບິນ ໂດຍສາມາດເຮັດໄດ້ຢ່າງປອດໄພໃນຊັ້ນຮຽນ.
Nuno Guerreiro ຄູສອນຄອມພິວເຕີທີ່ໂຮງຮຽນ Prior’s Court ບອກກັບຜູ້ສື່ຂ່າວວ່າ ເດັກໆໃນໂຮງຮຽນລ້ວນມີບັນຫາດ້ານການຮັບຮູ້ ດັ່ງນັ້ນ ການໄປຍັງສະຖານທີ່ ທີ່ວຸ້ນວາຍຫຼາຍໆ ອາດຈະເຮັດໃຫ້ພວກເຂົາຮູ້ສຶກອຶດອັດ ແລະ ວ່າການໄປຢູ່ໃນສະຖານທີ່ແປກໃໝ່ນັ້ນ ອາດເປັນເລື່ອງຍາກສຳລັບເດັກນ້ອຍທີ່ມີອາການອໍທິສຕິກ ເພາະພວກເຂົາຈະມັກໃນສິ່ງທີ່ຄຸ້ນເຄີຍ ແລະ ມັກໃນສິ່ງທີ່ເປັນກິດຈະວັດປະຈຳວັນ.
ໂຮງຮຽນ Prior’s Court ດູແລເຍົາວະຊົນທີ່ມີອາການອໍທິຊຶມຮຸນແຮງ 95 ຄົນ ຊຶ່ງບາງຄົນບໍ່ສາມາດເວົ້າ ຫຼື ສື່ສານຄວາມຕ້ອງການຂອງພວກເຂົາໄດ້ເລີຍ.
ເຈົ້າໜ້າທີ່ຂອງໂຮງຮຽນຫວັງວ່າ ການໃຊ້ເຕັກໂນໂລຊີເໝືອນຈິງນີ້ ຈະຊ່ວຍໃຫ້ເດັກນ້ອຍຮູ້ສຶກດີຂຶ້ນກັບການປ່ຽນແປງ ຈາກສິ່ງທີ່ເປັນກິດຈະວັດປະຈຳວັນຂອງຕົນ.
ນອກເໜືອໄປຈາກການເຮັດຄວາມຄຸ້ນເຄີຍກັບສະຖານ ທີ່ໃນຊີວິດປະຈຳວັນໃນໂລກ ແຫ່ງຄວາມເປັນຈິງແລ້ວ ເດັກນ້ອຍຍັງອາດໄດ້ເພີດເພີນໄປກັບປະສົບການໃໝ່ໆ ເຊັ່ນ ການຫຼິ້ນສະກີ ຫຼື ການດຳນ້ຳເລິກອີກດ້ວຍ.